Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Мича да бур изьва сёрниӧн – пэтан

Last updated on 28 февраля, 2020

Мария Яковлевна Семяшкина пасйис гӧгрӧс пас – 85 ар!

Декаб 29-ӧд лунӧ ассьыс 85-ӧд нимлунсӧ пасйис Мария Яковлевна Семяшкина. Паспортын гижӧмаӧсь рэдитчан лунсӧ ноябр тэлысь 29-ӧд лун, кудз кӧ дзугсьӧмаӧсь гижӧдiгас. Быдмис и олӧ Мыжыын, татэн и Семён вересыс сайӧ петiс. Быдтiсныс куим ныы: Наталья, Ирина да Людмила. Нук-нучкаясыс ставыс зэй бура велӧдчисныс и велӧдчӧныс школаын, ӧнi кодкӧ студенталӧ, а кодкӧ рэбитӧ. Озыр и правнукъяс вылӧ, дзоляяс пыр волӧныс Маша баб дораныс.
Мария Яковлевна помлась ӧтик кылӧн позе шуны: «Пыр бурсӧ карӧ чээчӧ».
Сибыд, рам, туян, бур сьӧлӧма, скромнӧй – сэчем морт миян именинницанум. Мария Яковлевна зэй нин мичаа изьва кылӧн сёрнитӧ – пель радлӧ. Миян ёрт оз радейт ыждӧдны асьсӧ и олан туйсӧ казьтылӧ мӧд йӧз пыр.
«Миян вӧлi зэй ыжыд семьянум, ме мед дзоля. Маме, Ирина Ивановна, зэй любитiс кино видзӧдны. Сылӧн вӧлi пыр местӧ бронируйтӧма: коймӧд рад коймӧд местӧ. Рэбечэй мальчасӧ куляс и пышйӧ киноӧ. Рэбитiс олӧм чэж колхозын: конюхен, кирпич карис да уна мукӧд. Тэдiс бура ягсӧ, ветлалiс понмыскӧд, став трӧпасӧ тэдiс. Ветлалас водзджык видзӧдалас кытӧн вотысыс быдме да бэрвы миянтӧ катас. Бабаяс пыр проситчисныс миян дорӧ, а маме шуис: «локте, локте! Ягыс ӧд ыжыд, вотысыс ставыслы сюрас». Ставыс миян воӧмась Из сайысь, код мыйӧн: вӧӧ, кӧр, пыж. Сэтӧн тшыг олӧм вӧлӧма. Татэн кык чом вӧлӧма: ӧтик шор бӧкас яран чом, мӧдас – ӧсьтяк. Миян народ, кор локтӧмаӧсь юалӧмась кытчӧ оомедчыны позяс, а олысьяс местӧ сетасныс. Водзӧс изьватас сетӧныс, мый выйим нылӧн: вӧӧ ке вӧӧ, кӧр ке кӧр, мӧс ке мӧс. Кор татчӧ локтӧмаась мамелы вӧлӧма 15 ар. Водзджык карӧмась чом, сэсся вэлян дзоля керкатор дедӧ карӧма. Бэрвыджык, томнас, маме олiс чомйин Анна чойыс дорын– ортсасис.
Ае, Яков Фёдорович, рэбитiс колхозын завхозӧн, амбаръяссӧ видзис. Зэй любитiс лыддьысьны: газет, журнал. Ае вӧлi зэй рам, а маме зэй туян.
Ми дзолясянь вошйим рэбитны, менум дас куим ар из на вӧ, сэк став челядьыс рэбитiс да старухаяс. Ставыс вӧлiсныс вӧйна вылын. Олыштӧмаяс окучивайтiсныс гӧжӧмбыд картопельсӧ, а ми бара посьнидсӧ кисьталiм.Сьӧм из мынтыныс, шуисныс, мый дзоляӧсь зэй да мамъяслы мэдiсныс «трудодень» гижны, сэсся ог тӧд гижлiсныс али из. Александра Емельяновна Рочева, миян бригадир, рэбита бэрын ваяс ведраӧн костёр вылын жаритӧм картопельсӧ да шуас: «на сёе, тшыгъялiнныд вед», а ми иг, мыйнэ тшыгъялам, велалӧмась нин да. Картопельсӧ мэдам мыськыны, а сыа висьталӧ: «ин мыське, санас и сёе – вынаджыкӧсь лоанныд». Сыдз и сёям, ставнанум саасям да бэрвы шорас васӧ юам да мыссям. Сэсся бара сёртнисӧ кисьталам, гырысь сёртниыс быдмас. Сые чукартам да Салехардӧ нуасныс. Рысь, нэк, ульлё да став быдтассӧ сэтчӧ нуасныс. Колхозсӧ миллионерӧдз вайӧдiм. Сэсся бара лэччиганум турун ычкам мӧснумлы да маме сые вердас. Бэрвы кучим мамекӧд кирпич карны. Гожӧмнас скӧтсӧ нуӧдасныс, а ны местӧын кирпичсӧ карим. Пока детинаяс Гӧне Генка да Витя Проша вӧӧяссӧ корсясныс – лэдзасныс да, ми сёйсӧ талялам – кругыс ыжыд. Фёдор Алексеевичлӧн мамыс да Фёдор Степановичлӧн мамыс пыр сералiсныс: «Ныясӧ, мӧддес вед кокъясныд висьны кучасныс», а ми сералам: «кудзнӧ бара кокъяснум кучасныс висьны», вот ӧнi и висьӧныс. Сэсся Юганӧ лэччам, мыськам кокнумес да сералiгтыр каам: «Тайӧ колхозыс гынсапег миян подаритiс, а висьталанныд лыясныд доймыны кучасныс».
Кирпичсӧ береге лэдчӧдасныс вӧлӧн, пыжӧ тэчасныс да нуам калитны сые Восяховоӧ. Туй шӧрын чай юам, кодлӧн няньтор выйим, а кодлӧн нинӧм сёйнысӧ. Сыдз тай и юим. Кирпичсӧ нуам сунэмен да сы лунас бӧр Мыжыӧ локтам.
Кудз вошйис вӧйнаыс ог помнит. Вокъясӧс нуисныс, медбӧрын айӧс. Сэк топыд старикъяссӧ нуисныс Нижний Тагилӧ военнӧй завод вылӧ. Вӧлi ыжыд пароход «Усиевич», сынас нуӧдiсныс. Ставыс бӧрдiсныс, маме тшӧтш, а ме сылы бӧжас кучиси да висьтала: «Маме, мыйнэ бӧрдан? Ае вед воас». Мунiныс да из воныс. Вокъяссӧ воисныс раненнӧйӧсь. Миша вокелӧн юрас вӧлi ранение, куйлiс татэн сознаниетӧг 18 лун, нуисныс бэрвы Салехардӧ да профессор Москвасянь вызовитӧмась. Хирур гыс локтӧма вӧйна бӧрын когтӧм, но окмыс час карӧма операция да став осколоксӧ шэдӧдӧма.
Ме зэй мэдi велӧдчыны. Сизимӧд классын январӧдз велӧдчи, а сэсся Миша воке висис – Салехардӧ нуисныс. Валентина вӧлi 6 арӧс, а Фёдор вӧлi дас месеча – кытчӧ ные колян, маме рэбитӧ. Ме велӧдчӧмсӧ чээтi да ные видзи.
Ваня воке 25 во служитӧма, кор вошйис вӧйна вӧлi армияын самей, да локтӧма офицерӧн раненнӧйӧн жэ, сылы сетӧмась «Орден Красной Звезды». Бэрвы Лопхариӧ сельсовет председательӧн вӧлi, челядьыс ӧнi сэтӧн и олӧныс.
Кор вӧйнаыс эштiс мамеяс бабаяскӧд карисныс сур, пӧжасисныс да песняяс сьылiсныс. Маме пыр велӧдiс юксьыны сёянӧн да ульлёлӧн кодлӧн абуджык.
Томнам пыри районоӧ рэбитны техничкаӧн, мынтiсныс 27 руб. Бэрвыджык Валентина племеничаӧ корис больничаӧ санитаркаӧн пырӧдчыны, сэтӧн унджык мынтiсныс. Рэбитi сэтӧн 18 во: пач ломтiм, васӧ вылысанум гожӧмнас катлiм – быдчӧмасӧ карим. Став томсӧ гожӧмнас пыр ыстiлiсныс турун карны.
Больничасӧ пыр проверяйтiсныс сӧстӧм вылӧ ватаӧн; ставсӧ бураа мыським да димлялiм.
Больнича пыр карис концертъяс празьникъяс вылӧ – ми сьылiм изьватас песняяс, кӧть быдсяма народ рэбитiс сэк. Сыдз жэ ветлi коми хорӧ, миян сэк Лев Николаевич руководителен вӧлi – зэй уна народыс хорас вӧлi. Быдлаын выступайтiм: Тюменьӧ, Салехардӧ и сыдз водзӧ. Менам Семён верес зэй бура ворсис гармошкаӧн, ачис велалӧма вӧлi. Гажаа олiм.
Рыбкопын на рэбитi техничкаӧн, уна нясьтисӧ димлялiм.
Код кудз вермис, сыдз и олiс».
Мария Яковлевна аслас олӧмын пыр ставсӧ карӧ совесть вылӧ, бур вылӧ и тайӧ сёрниӧ из тэр ставыс, мый позе висьтооны тайӧ бур морт помлась.
Мария Яковлевналы ми кӧсъям став бурсӧ, югыдсӧ да, медшӧр, дзоньвидзалун. Кузь нэм да бур шуд! Мед ми нэшта на волiм да чэстаа сёрнитiм.

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

− 2 = 2

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!