Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Менам оланiн – медча мича да бур

Last updated on 25 мая, 2020

Ямгортын олысь сяма да енбия ань. Сёрни мунас Валентина Васильевна Рочева помлась

Матыстчан Ямгортö и Сыня юсяньыс миме тыдалö мичаа карöм еджда-турунвижа керка. Сэн олö миян героиня – Валентина Васильевна Рочева.

Карöма керкасö Валерий Павлович вересыс, – сыа вöлi зэй туян да сяма. Став Рочевыс сэтшöм, – люмъялiгмоз шуö Валентина Васильевна.

Ачис Коми АССРса Гажаяг сиктысь, но ветымын кык во нин олö Ямгортын. Сёрнитам Валентина Рочевакöд роч кылöн. “Ае из ло, кор менум вöлi öтик ар и маме миянтö куимöн öтнас быдтiс. Гажаягын олiганум сёрнитiм комиöн, а бöрвы, кор мунiм ооны Ухта дор Пионер-Гора сиктö, ставыс гöгöр роч кылöн сёрнитiсныс. Маме кык рэбита вылын уджалiс, мед миянтö вердны. Вöлi сьöкыд и сыа сетiс менö интернатö велöдчыны. Велöдчиганум интернатын миян комиöн из тшöктыныс сёрнитны, кöть и сёрнитысь челядь ватага вöлi. Менам кык вок. öтикыс месюм дас арöн ыджыджык. Кор быдми, сыа нин мунiс мöдлаö велöдчыны, бöрвы гöтрасис и сылы нин из меöдз вö. Мöд вокö кык арöн дзоляджык. Ыджыд вокö бура сёрнитiс комиöн, сiдз кудз Гажаягын дас кык во олiс. А ме сiдз и воштi мам кылöс. Верма гöгöрвоны сёрнисö, мыйкö вуджöдны, но уна воштöма. Дзоля вокö нöшта на меысь лёкаджык тöдiс комисö” – юксьö миянкöд Валентина Васильевна.

Челядьдыр кад помлась пыр шоныд казьтылöмъяс, кöть кутшöм сьöкыд олöм из вö. “Кор маме уджалiс, ме вокöс воспитывайтi. Миян кöза вöлi, сэк школаö иг на ветлö, сыйö лысьтам. Вокöс юта, ачум юа, няньтор сёйыштан и мунан водзö. Маме неуна порсьяс на видзис. Став бурджык яйсö вузалiс, мед миянтö пасьтöдны. Миян порсьсьыс куш чорöгъяс сюрлiсныс. Мед чöскыд, кор жаритан выйöн и няньöн сюйсьылан.

Няньсö нормаöн вузалiсныс – öтик морт вылö. Ми дзоля вокöкöд кык нянь ньöблiм. И кодкö мöдö кö, лишнöй няньсö босьтны, сэк ме вокыс нылы сетла, а ныа миян сы вылö мыйкö юмотор. Сiдз и олiм” – казьтылö миян ёрт.

Валентина Васильевна эштöдiс кöкъямыс класс Ухта районын. “Волiс миян дорö интернатö Юрий Афанасьев да агитируйтiс Салехардса педучилищеö поступайтны, а ме пыр мöдi велöдчыны велöдысь вылö. Ухтаын куш кык техникум вöлi: Горно-нефтянöй да Леснöй. И ме мунi, дас квайт арöса ныы, Салехардö да помалi педучилище. Училищеын нёль во велöдчи начальнöй классъясын велöдысь вылö. Быд ордйысьöмын да походын ме вöлi. Зэй любитi лызьöн войлооны да баскетбол ворсны. Миян велöдчан группанум зэй вына вöлi баскетболын и быд ордйысьöмын ми вöлiм вермысьясöн” – висьтоолö Валентина.

Код бура велöдчöма босьтлöмась походö Сыня ю кузя и сэк миян сёрни ёрт медводдз аддзылöма Ямгорт. – Ме шуи “Кутшöм мича ин!”, зэй менум лэсялiс татöн, – юксьö Валентина Васильевна.

Миян олöм артмö унаöн случай серти. “Менö ыстiсныс направленньö кузя Восяховоö. Ямгортын сэк вöлi вийöмась велöдысьсö и дзоля школаас рэбитöмась мама-ныла. Из позь рöдлы öтлаöн рэбитны и миянтö ныылыскöд вежисныс: сыйö ыстiсныс Восяховоö, а менö Ямгортö. Квайт во рэбитi школаын, а бöрвы сыйö сиптiсныс да челядьсö ыстiсныс Овгортö велöдчыны. Ме мунi рэбитны библиотекаö. Челядьö пыр мекöд ветлалiсныс сэтчö. Сэк уна йöз лыддьысис. Сiдз и рэбитi библиотекаын комын вит во” – шуö Ямгортса олысь.

Семья – тайö мед донатор. Валентина Васильевна шуда морт, сылöн сыа зэй ыджыд: “Менум тöö кежö из судз пес и Ямгорт кузя корси, кодлысь ньöбны. Сiдз и тöдмаси аслам верескöд, Валерий Павловичкöд. Сыа менум пес ваис. Миян чужис нёль челядь. Ыджыд нылö, Антонина, олö Ямгортын семьяыскöд. Вика да Лёня олöныс Мыжыын, а Миля нылö олö Ростовскöй областьын. Öнi менам быдмö дас нук-нучка да вит правнук”.

Валентина Васильевна вылö видзöдан и гöгöрвоан, мый мыйкö кö мöдан велöдчыны карны: аддзы,видзöд да юась. И ставыс артмас! “Ме дзолясянь аканьяслы паськöм вури. Пöмнита, мöдi дзоля гач вурны, а менам никудз из артмы да маме ортсалiс. Быд тöварторсö маме чукартiс да менум сетлiс. Кор школаö мунi, думайтi, мый ме ыджыд нин аканьöн ворсны да сетi ставсö дзоля суседка ныылы. Маме зэй бура крючокöн кыис да вышывайтчис, и менö велöдiс. Водз матушкаö баляяс видзис и ме сылы ные шырны ортсоолi. Сыа менö велöдiс печкыны. Бöрвы Валерий Павловичкöд асьнум босьтiм баляяс. Менам пыр вöлi квайт баляöн. Кык по вонас шыран и тööбыд печкан сыысь. Матушкакöд баля гöнсö краситлiм, а водз краситель из вузась и ме кучи корсьны кутшöм турунысь позе рöм аддзыны. Петшöр диныс краситi кольквижöн, турунвиж – тусяпу вотыс. Бöрвы нин быдпöлöс краситель позис ньöбны. Уна и краситi ме баля гöнсö олöмам!” – шуö миян сёрни ёрт.

Водз став паськöмсö челядьлы ассьныс кыйöмась. Валентина Васильевналöн ныыясыс дзолясянь кужöныс бура кыйны да вурны.

Öнi миян героинянумлöн медшöр хобби – тайö бисерöн кыйсьöм. “Маша кейö велöдiс челядьяс школаын бисерöн кыйны и ме вощи тшöтш челядьöлысь велöдчыны. Бöрвы кори Машаöс и менö велöдны. Сыа кучис менум висьтоолыны да петкöдлыны. Сiдз вöлян да вöлян велалi. Кор петi пенсия вылö кучи нин карны ыджыд да сьöкыд мичмöданторъяс”, – казьтылö миян ёрт.

Валентина Васильевна ачис серпасалö схемаяс, чукартö став дзоридз серпасъяссö журналъясысь, корсьö öтуввезйысь выль мöвпъяс. Чукартöма нин нёль кыз папка схемаясöн, мед карны выль мичмадантор. Керкаас, сяма мортлöн, тырыс-тыр бисерысь карöмторъяс.

Миян героинянумлы никор оз оолы гажтöм. Оз кö кый бисерöн, лыддьысьö. Оз кö лыддьысь, пукалö öтуввезйын телепон пыр. Оз кö телепонас, видзöдö кино. Оз кö кино, мунö ыыла вылö. И сiдзи водзö.

Валентина Васильевналöн зэй уна небöг. Радпырысь висьталö радейтöм жанръяс помлась да радейтана небöгъяс помлась. И, тöднин, небöгъяс помлась кодъяс виччысьöныс лыддьöмсö.

Кöсъям Валентина Васильевналы дзоньвидзалун да уна вдохновенньö выль мичмöданторъяс карöм вылö! А ми на волам да гижам мича кедрия Ямгорт помлась да сылöн олысьяс помлась!

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

− 3 = 6

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!