Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Ставсӧ и быдлаын ӧтлаын!

Last updated on 23 ноября, 2020

Наталья Николаевна Рочева – уна челядя мам, гӧтыр, ныы, ёрт, уджалысь

Ныа тӧдмасисныс кор нылыслы вӧлi дас вит ар, а зонмыслы дас окмыс. Зонмыс воис армияысь – мича, ён, вына. Нылыс велӧдчис школаын – енбия, юра, шуда. Аддзысисныс йӧктӧм вылын и нӧшта никор из янсыдчылныс.

Тайӧ абу мойд! Тайӧ олӧм! И сэтшӧм висьт зэй сьӧлӧм шонӧдӧ, эскан радейтчӧмӧ, весиг судьбалы. Тайӧ висьтыс Наталья Николаевна да Андрей Геннадьевич Рочевъяс помлась. Ныа быдтӧныс нёль челядь и ӧтлаын нуӧдӧныс, кудз изьватасъяс шуӧныс, бур олӧм.

Ыджыд пиныс – Максим, рэдитчис кор Натальялы вӧлi дас окмыс ар. Рочевъяслӧн ыджыд шуд – ыджыд пиныс таво гӧтрасис. А сичкӧ котырыс лои ыжыджык. «Сыа дзолясянь войлалӧ лызьӧн да национальнӧй спорт вӧдитчис. Мэйми на корлӧмась участвуйтны да пийӧ черсӧ 123 метра сайӧ шыбитӧма. Кӧть и векнин из занимайтчи. Максим миян спортсмен. ӧнi рэбитӧ диспетчерӧн и воще ооны ас выль семьяӧн» – шуӧ Наталья Николаевна.

Максим Рочевъяслӧн дас кык во вӧлi ӧтик челядьӧн. Сэсся рэдитчис Коля пи. Колялы нин 14 ар, бура велӧдчӧ 8-ӧд класстнын и зэй радейтӧ ворсны шахматыӧн. «Мыжыын ворсӧ дедыскӧд и он-лайн компьютерын. Ме нолӧдлi Коляӧс дзолянас Тюменьӧ, мед велӧдiсныс сыйӧ ворсны. Сэн гӧгӧрвоис, мый тайӧ абу прӧст ворсӧм, тан колӧ юр. Сылӧн зэй бура артмӧ математика велӧдны. Нӧшта ворсӧ коймӧд во гитараӧн, ветлалӧ шылада школаӧ» – юксе мам.

Настя, кудз шуӧ мамыс, торъялӧ вокъяссьыс, сыа зэй бурсьӧлӧма да рам. Коля вокыс кык воӧн ыжыджык да Настя пыр сылысь бур пример босьтӧ. Настя сiдз жэ ветлалӧ ворсны гитараӧн. «Тэрыт воис, – висьтоолi Наталья Николаевна, – став чуньыс аняясӧсь, сiдз дыр ворсны велӧдчӧма».

Дзоля ныныслы токо на ӧтик ар – Шуӧныс Машаӧн. Кутшӧм сыа лоӧ – пока водз шуны.

Мед быдтыны челядь, кодӧн тэ кучан гӧордитчыны уна оз ко – куш петкӧдлыны аснад бур пример да сёрнитны ныкӧд. «Никутшӧм гусятор абу менам, кудз быдтыны челядь. Водз ачыд нылы петкӧдлан кудз да мый карны, бӧрвы сыкӧд ӧтлаын каран, а бӧрвы коран, мед тэныд петкӧдлас. Сiдз и мыйӧкӧ ныйӧс велӧдан» – люмъялiгмоз юксе миян ёрт.

Рочевъяс зэй, бурсянь, аслыспӧлӧсӧсь. Нылӧн уна семьяын традиция да асланыс серамторъяс. Чайта да, «семья» кылын сыйӧ и кылан сьӧлӧмнад. Рочевъяс быд рыт ставныс ӧтлаын петӧныс гуляйтны ылла вылӧ, мед абу ставыскӧд мунны, колӧ зэй ыджыд причина. Сiдз жэ Натальялӧн ай-мамыс петалалӧныс накӧд. А Выль во кежӧ Наталья пасьтасьӧ Ёмаӧ, Андрей – Кӧдзыд пӧльӧ и гажӧдӧныс челядьясныссӧ.

Наталья Николаевна нин петiс рэбита вылӧ Маша бӧрын, шуӧ, уна мый оз дэйдит, но ставӧн семьяын ортсалӧныс мамыслы. Коля вермас пӧжасьны, Настя каша пуны и весиг вересыс чӧста пусьӧ. «Медшӧр менум, мед челядьяссӧ вӧлiсныс дзоньвидзаӧн – ме пыр и ставыслы сiдз шуа. Челядь – тайӧ шуд. Ми пыр ёрт ёртлы ортсалам. Петам кӧ дзимлясьны керка дорын – петам ставнум ӧтлаын. Кытчӧкӧ кӧ мунны – ми мунам ставнум ӧтлаын. И ми старатчам сёйны ӧтлаын» – шуӧ миян героиня.

Нӧшта ныа ставӧн радейтӧныс ветлооны мӧд муясӧ. Видзӧдны суйӧр сайсӧ: «Ми Андрейкӧд дзолясянь ныйӧ нолӧдлам быдлаӧ, мед нылын тӧдӧмлунъясныс быдмисныс. Ми таво Машукӧс нин Крымӧ нолӧдлiм. Сiдз жэ радейтам ас район кузя ветлооны. Миян выйим ягын ты дорын керкатор – ветлам сэтчӧ и тӧӧ, и гожӧм. Радейтам вӧр-ва, музейяс, стрэйбаяс. Уна на кытчӧ мӧдам ветлыны, уна визьлыны. Эска, мый став кӧсйӧмнум артмас».

Коля радейтӧ ветлооны ёртъяскӧд вӧрӧ, ставсӧ лэсьӧдас, сёян босьтас, нуас да дасьтас. Настук ныыёртыскӧд ветлалӧ шӧркос вокыскӧд. Мӧдыс чойсӧ босьтӧ да берегитӧ. Пыр суутас дорйыны жаль чойсӧ.

Наталья Николаевна сералӧ, мый сьӧкыд токо вӧлi сэк, кор дыр вӧлi Максим ӧтнас, а бӧрвы челядь керкаын лоис кык по унджык. А коймӧд, нёльӧд челядь – кокниджык нин. Сэтшӧм ритм дорӧ нин велалан – войсӧ лёка узян, а асыынас нин рэбитны колӧ мунны.

«Медча сьӧкыдыс, челядь быдтӧмын, абу петкӧдлыны ассьыд шоглунтӧ челядьлы. Кор воан мыдзӧма рэбитасянь, а челядьыд бӧрдӧ ли, мыйкӧ корӧ ли и сэк абу чарыштны. Вед челядь абу мыжа, мый тэнад рэбита вылын вӧлi сьӧкыд лун» – юксе думъясӧн миян ёрт.

Наталья Николаевна зэй шоныда казьтылӧ ассьыс челядь дырсӧ и шуӧ, мый ай-мамыс велӧдiсныс медшӧрӧ – вылӧ пуктыны семьяад ёрт ёртныдтӧ.

Ми кӧсъям став мамъяслы, и торйӧн кӧ Наталья Николаевналы, крепыд дзоньвидзалун, мыыкыд, вын и уна- уна шуда лунъяс. Мед челядь пыр радуйтiсныс асланыс вермӧмъясӧн!

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

5 + 1 =

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!