Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Ешак омет, аңкет, унаңкет, аңкимет, щащет, емхатӆ пиӆна!

Last updated on 14 декабря, 2020

Хон Рущ мувевн Аспотты тыӆащ соханты хатӆатн аңки емхатӆ поснтаӆа. Щи емхатӆ 1998- мет таӆ эӆты ӆуңатты питса. Аңки – щит кашң хоят уӆапсаян меет воӆаң хоят. Меет тынаң хоят. Щи хатаӆн кашаң аңки мойӆапса ясаң ӆаваӆаӆ. Ӆув щи хатаӆн сам хошиман, аматман пошахӆаӆ вана ӆаваӆӆаӆы.

Кашң хоят, хой уна уӆа, хой ая уӆа, кашң пораян аңки эӆты нумасӆ. Ӆувеӆ самаңа тайӆаӆӆы. Симась ям ясаңат потарсат муң Ӆорвош мувевн уӆты хоятӆув.

Там аңкет емхатӆ кеша Ӆорвош районэв куща Андрей Головин ар энмаӆтам няврэмат аңкета мойӆапсаят мойӆас. Симась медалян «Материнская слава Ямала» Оксана Ребась юкантса. Ӆув вет няврэм энмаӆтас.

– Самаңа тайты аңкием нэмӆ Оксана Гавриловна. Ӆув сэма питас Овкуртан па щита энмас. Семьяяӆ ун вус, ар яйт па опет тайӆ. Ӆув нийӆмет яртьяң няврэм эӆты. Мосаң, сишн ӆув ищи ун семья тайӆ. Ӆув ащеӆ-аңкеӆ хуӆ веӆпасман рупатсат. Сишн аңкем айтэӆн яйӆаӆ, опиӆаӆ пиӆн ӆувеӆаӆ нётсат, – ястаӆ меет ун эвеӆ, Наталья Абайдуллина (Ребась). – Аңкем ащем пиӆан хуӆ веӆты питсаңан. Ащем хуван антома йис. Аңкем ин хоӆна Горковский рыбзавотан хуӆвеӆпасман рупатаӆ. Кашң таӆ муң Ёханкурт эӆты Туңӆора касӆысув хуӆ веӆты. Ин аңкема нётӆат ма апщиӆам – няӆ пох. Ма па ин ищи аңкия йисам. Кат няврэм тайӆам: пох па эвие. Аңкиев, унаңкев шеек самаңа тайӆэв. Туп кум шитӆув ӆув хосяеӆ аӆ китӆаюв. Ӆув муңева меет ям самаңа тайты хоятэв.

Тамара Александровна Пырысева (веншпелакн) аңкеӆ (кутӆапан) па апщеӆ Наташа пиӆан

– Ма аңкем, Татьяна Егоровна Ребась (Лонгортова), Ёхан тай куртан уӆмаӆ. Там йис Еври курт. Аңкем семьяяӆн хуӆмет эви. Ащемн ӆув Ёхан тай эӆты Айвош ёхана туса. Аңкем катхосьяң няврэм тайӆыйс. Щи тыхаӆ эӆты ӆапат няврэм нох энампсат. Иса яма энмаӆсаюв, утаӆтасаюв. Меет ун яйем Андрей па меет ай апщем Валера аңкем-ащем пиӆн нёттыя хащсат. Ванты, аңки-ащи уна пелка питты питсатан па ӆувеӆаӆ ӆаваршак рупатты питас. Меет ай апщем ины унты щи хуӆ веӆпасман рупатӆ, – потарӆ Тамара Александровна Пырысева. – Аңкем эӆты туп шеек ям ясңат. Туңа-щира энмаӆсаюв. Атом ясаң ястаты нэмоӆты пораян ант эсӆыӆысаюв. Такан турсыйн нэмоӆты пораян муңев ант ястыӆыяс. Ант увсаюв. Аӆ туп пойкман потартас. Ӆув ясңаӆ инты унты нумӆэм – «Эвиет, похиет, яма туңа-щира уӆаты. Муң веншӆув аӆ еӆэмтаӆн». Нумӆэм хоты антемн ёнтасты утаӆтасаюв: муң айиет, ванан омасӆув па тупар ётӆув. Сишн айтэӆн щиты щи ёнтасты хошты питсув. Симась ям анти тайсув! Ма аңкем юкана камтса ӆуңтарт ханшсам. Итӆ ӆуңтаӆн:

Па си ёхтас тови пора,
Хатӆат еша ракатсат.
Наев нохӆы эӆӆас паӆа,
Ёхтас емаң хатаӆ па.

Кашаң хоят аңки таяӆ,
Аңкеӆ саман хошмаӆӆа.
Камн ят куш ёхтыӆыяӆ
Аңкен пеӆа нан хуӆма.

Аңкем ястам ям ясңи- ем,
Еӆӆы пеӆа туӆэм ма.
Аңкем хаям тус арием
Хоӆта унты нумӆэм ма.

Аңкем самаӆ наем иты,
Манэм ситы хошмаӆтаӆ.
Ӆув сэмңаӆаӆ хусат иты,
Манэм ваттэӆ и пуша.

– Аңкием, аңкием, мосты аңкием! Ям потрэм ястаӆэм, ям арэм арыӆэм. Сора ёшийӆан яхӆат хошман ёнтасты пораян, вератты пораян. Манэм наң энмаӆсэн, манэм наң нёхаӆсэн, – аремиман аңкеӆ нумаӆмасӆы Людмила Ильинична Кельчина. – Ӆув нэмӆ Дарья Дмитриевна Ямру (Талигина). Щаня мув, Тыӆтам курт эӆты уӆмаӆ. Нийӆъяң таӆ моӆтас ус.

– Ӆыӆаң пораян ӆув манэм ястыӆыяс Тыӆтама яхты. Ма ин щи хоӆна тохи манӆам, кум ант шитсам. Моӆты щирн мосаӆ щи аңкем мува ёхтыӆыты. Аңкем Тыӆтам эӆты Унтсоӆкурта туӆа. Щи мувн ма сэма питсам па энампсам. Шеек ям нумас няврэма уӆты пора эӆты тайӆам. Аңкеман иса муй мосаӆ яма энмаӆсаям. Арат-монщат ай тэӆн ӆув эӆтэӆ хуӆантсам. Щи арат няврэмӆама арисӆам па утаӆтасӆам.

Васьёханован ашкуӆа-интернатан уӆты па утаӆтаты ай эвиет ищи аңкиӆаӆ самаңа тайӆаӆӆаӆ. Сишн ӆув камтса ям ясаң ӆув антиӆаӆ эӆты ханшсат па хорам хор версат.

Ксюша Талигина: «Ма аңкем хорамаң. Ӆув хошаӆ ёнтасты. Манэм ищи утаӆтаӆӆы. Ӆув ёшӆаӆ сорни. Аңкем пиӆн яма ӆухса уӆӆаман».

Аня Талигина (6-мет класс): «Ма аңкем самаңа тайӆэм. Ӆув хорамаң. Самаӆ ӆэпат. Ӆув меет ям аңки»

Валерия Максарова (5- мет класс): «Аңкем рупатты каркам. Ма ӆувеӆа иса нётӆам. Ӆув манэм этаӆтаӆ хоты мосаӆ уӆты. Ӆув самаӆ хошам. Самаӆ кашаң няврэм ураңан хошияӆ».

Ксюша Максарова (5-мет класс): «Ма шеек самаңа аңкем тайӆэм. Ӆув-ки ванан уӆ манэм иса ям».

Настя Озелова (8-мет класс): «Аңки меет тынаң хоят. Ӆув уӆапса мас манэма. Ӆув савры – каркам анти. Туса вератаӆ. Манэма этаӆтаӆ хоты ёнтасты мосаӆ. Аңки ясаң сама понман тайты мосаӆ».

Аңкие – щит кашң хоята меет тынаң ясаң! Ай хоятые веӆщи потарты питчаӆ – аңки ясаң – мет оӆаңн! Меет хошам па сама хойты ясңат муң ӆытӆув аңкия ястаты па потарты. Мур ӆоватан кашаң хоят ёхи ӆытаӆ аңки шияӆаты, мосаӆтаты па вана апаӆматы! Аңкиӆан шавиман таяты!

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

+ 89 = 99

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!