Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Дона лыдьысьысьяс, ми чолӧмалам тiянтӧ Выль Воӧн да Рӧштвоӧн!

Last updated on 26 февраля, 2021

Кӧсъям, медум Ӧшлӧн воыс сетас ставнумлы крепыд дзоньвидзалун,  уна югыдтор да помтӧм радлун, бур олӧм, вын, ыджыд вермӧмъяс да  нимкодь аддзысьлӧмъяс! Берегитӧ асьныдтӧ да ассьыныд матыссаяснытӧ. Мед Шыр воыс став лёксӧ нуас, а 2021 воыс бурсӧ ваяс!

Выль вося мойд

Ыджыд нопъя Кӧдзыд пӧль мунӧ вӧрӧд да лыддьӧ кывбур.

Нопйӧй сьӧкыд, туйыс кузь.
Выль во войӧ ме ог узь.
Парма шӧрын мича коз
Баситӧны бара – йӧз.
Мудер Руч и тэрыб Кӧч,
Винёв Кӧин, Ёма пӧч?
Нопйӧй козинъясӧн тыр,
Мед жӧ эбӧсӧй оз быр.
Лым-ныв, отсыштны вай лок,
Тэ ӧд том на, тэрыб кок.
Шойччышта, мед ог жӧ усь.
Нопйӧй сьӧкыд, туйыс кузь.

Кӧдзыд пӧль пуксьӧ мыр вылӧ, мыш сайсьыс лэдзӧ нопсӧ. Ёма гусьӧн матыстчӧ, нопъясьӧ, пышйӧ.

Локтӧ Лым-ныв.
Коми мусӧ лымйыс
ньӧжйӧ шебралӧ.
Воис тӧлыс
Выльгортӧ и Кебраӧ.
Усьӧ лымйыс
Мича еджыд бисерӧн.
Пажгаӧ и Гарьяӧ,
И Висерӧ.
Ме Лым-ныв.
И муса тайӧ кадыс мем.
Кӧнкӧ тані менам ёртъяс
Уна эм.
Дерт нин найӧ
Важӧн баситісны коз.
Ме моз найӧ оз жӧ узьны,
Тӧда, оз.
Кӧдзыд пӧльӧй менам,
Гашкӧ, важӧн сэн.
Колӧ тэрмасьӧмӧн
Сэтчӧ мунны мен.

Петӧны Руч да Кӧч. Ручлӧн киас козин.

ӧти козин кыкӧн вылӧ.
Кыдз нӧ юкны, челядь йылӧм?
Миянлы кӧ сійӧ сюрис,
Кужам юкнысӧ ми бура.
Но ӧд кольӧ Кӧин пайтӧм.
Ёма пӧчыс тшӧтш жӧ, чайтам.
Ог жӧ кыкӧн сӧмын сёйӧй
Чӧскыдторсӧ Выль во войӧ.
Абу лӧсьыд, абу мича,
Ог кӧ ёртлы сійӧс видзӧй.
Кӧинлы кӧ вичмас тайӧ
— Ыджыд радлун сылы ваяс.
ӧти козин кыкӧн вылӧ
Огӧ юкӧй, челядь йылӧм.

Ёма пӧч мунӧ Кӧдзыд пӧльлысь пышйӧдӧм нопйӧн да сьылӧ.

Ук-ук-ук дай ок-ок-ок,
Абу рыж на менам кок.
Пӧрысь выжыв, таляв туй.
Нопйыд менам, а тэ уй.
Мед кӧ сарапанӧй важ,
Сытӧг лоас меным гаж.
Нуски-узи кольӧм во,
Таво дьӧбӧн ме эг ло.
Ок, и чӧсмася ме дыр,
Некод пайӧ оз нин пыр.
Виньгыртасны Руч да Кӧч.
Сёяс ставсӧ Ёма пӧч.
Кӧин лоӧ нӧшта лӧг — Кӧчлы плешкас сизьдас йӧг.
Таво сэсся и Лым-ныв
Аттьӧястӧ оз жӧ кыв.
Ук-ук-ук дай ок-ок-ок,
Абу рыж на менам кок.
Пиньтӧм вомӧн тяпка дыр,
Кытчӧдз чӧскыдтор оз быр.

Ёма воӧ баситӧм коз дорӧ, а сэні ставӧн сьылӧны нин.

Ывла югдӧма
едждӧдӧм мусьыс.
Тӧрыт лунтыр ӧд
небыд лым усис.
Талун кӧдзыдыс
чеплялӧ ныртӧ.
Коми пармаӧ
Выль восӧ пыртӧ.
Вай ми сувтамӧй
ёртасян кытшӧ.
ӧта-мӧднымлы
радлун и мытшӧд.
Тэн кӧ бур, меным бур
да и долыд.
Дона ёрт, муса ёрт,
бара волы.
Тэ мен радлунсӧ
аскӧдыд ваян.
Медся донаыс
му вылас тайӧ.
Эзысь тӧлысьыс
югӧрсӧ койӧ.
Йӧктам-гажӧдчам
Выль вося войӧ.

Кӧдзыд пӧль юклӧ быдӧнлы козинъяс. Ёмаӧс на, весиг, ошкӧ нопсӧ кыскӧмысь.

Сьылӧны. Кӧдзыд пӧль.

Кӧдзыд пӧльтӧг
тӧв оз лок, тӧв оз лок.
Тані ме кӧ,
гажа ок, гажа ок.
Лым-ныв.
А Лым-нывтӧг
кысь нӧ лым, кысь нӧ лым.
Котӧрті да,
бандзиб пым, бандзиб пым.

Кӧдзыд пӧль.

Муыс-ваыс
кын да кос, кын да кос.
Юяс вомӧн — йиа пос, йиа пос.

Лым-ныв.

Гӧн вольпася
видз и му, видз и му.
Лызя зонкаӧс ог су,
ме ог су.

ӧтлаын сьылӧны. Кӧдзыд пӧль да Лым-ныв.

Ю дор кырйын
абу чӧв, абу чӧв.
Коми муын
гажа тӧв, гажа тӧв.

Александра Мишарина.

Выль во

Кӧть и вой тӧв швичкӧ яра,
Выль во, Выль во воис бара!
Нырвом коляоз кодь гӧрд,
Жыръяд менӧ он на йӧрт.

Лызьӧн, даддьӧн исласьыштам,
Кӧдзыд пӧльӧс чуксалыштам:
— Пӧльӧ, пӧльӧ! Лок нин, лок!
Кутшӧм ньӧжмыд тэнад кок.

Кӧсъян кӧ, и паныд волам,
Коз пу дорын ёна колан.
Зонпоснилы козин вай,
Пуктышт тшӧтш и меным пай.

Да эн вунӧд сьӧрсьыд босьтны,
Лымъя нывтӧ вӧрсьыс корсьлы.
Сыкӧд котралӧмысь ворсам,
Тэысь дзебсямӧй, да корсьлан.

Лоӧ миян гажа рыт,
Кутам казьтывны во быд.

Нина Куратова.

Выль вося сьыланкыв

Лыдтӧм кодзулӧн дзирдалӧ-ворсӧ
Миян войвылын Выль Вося вой.
Шуда воӧн, Выль воӧн, бур ёртъяс,
Муса ныв, дона вок, ыджыд чой!

Мед небесаысь усьӧ
Быд пельпом вылӧ лым,
Пӧсь муслунтӧ оз кусӧд,
Кор сійӧ биысь пым.

Аски сьыланкыв садьмӧдас бара
Тэчны керка да лӧсьӧдны гӧр.
Миян сьӧлӧмъяс смелӧсь да ярӧсь,
Миян флагным кодь кыаыс гӧрд!

Коли во, а ми томджыкӧсь лоим,
Татшӧм, тыдалӧ, миян бур шуд.
Мича олӧмсӧ Выль Вося войӧ
Аслад вежӧрӧн донъявны куж!

Мед небесаысь усьӧ
Быд пельпом вылӧ лым,
Пӧсь муслунтӧ он кусӧд,
Кор сійӧ биысь пым.

Серафим Попов.

Коми листбоксӧ лэсьӧдiс: Ирина Терентьева.
Снимокъяс: Татьяна Паршукова, Татьяна Ануфриева, интернетысь.

09 января 2021 года №1

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!