Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Туса нёхрам няр нёха па няр хуӆ

Last updated on 21 января, 2021

Там таӆ кимет пуш фестиваль «Ямальская строганина» верыӆыса.  Яӆап муш этам ураңн ӆув онлайн интернет хуват этаӆтыса

Хой ант ӆавантыяс нярхуӆ па няр нёха? Овас муван уӆты хоятат айтэӆн симась ӆэтот уятӆат. Туп веӆси сэма питӆан мохты вур инщӆан па вуӆы хон лохн шэпты маӆаян. Няр хуӆ ищи мампась иты эпӆаң. Муң мувевн симась лэтотӆы воӆӆы уӆапса антом.

Меет оӆаңн симась касапса Вуӆэң ёх емхатаӆн верыӆыса. Вуӆэң ёх ӆув кутӆаӆн касты кут симась лот кум шитса верты. Хоятат симась эпӆаң касапаса пеӆа ям нумас понтсат. Сишн организаторат нумас понтсат щи вер еӆӆы туты. Щиты туняӆ, 2019-мет таӆн оӆаң фестиваль-конкурс «Ямальская строганина» верса. Ур мув Ямальский района Яр-Сале нэмпи воша хуӆ па нёха нёхарты хошты хоятат ёхатсат. Муң Ӆорвош районэв эӆты кат хоят яңхсат. Щит Леонид Петрович Лонгортов па Емельян Кириллович Куртямов. Ӆув иимиӆаӆ па патан нётты яңхсат. Ӆув хоты айтэӆн утаӆсат эпӆаң няр хуӆ па няр нёха ӆэщатты щиты щи версат. Патан туп антапкеӆӆаӆ пастыкешет пиӆна вусат па щи. Воӆаң мутра ант мосаӆ. Щиты ӆув катңан нох питсаңан. Леонид Петрович няр нёха нёхарман меет тусшак уллмаӆ па Емельян Кириллович хуӆ меет хорамаңа па эпӆаңа ӆэщатмаӆ. Ияха понман ӆув хуӆмсот щорс ох шитам патан Ӆорвош район мувева тусат.

Тампуш па яӆап щир. Яӆпа этам коронавирус муш ураңан ар хоята йи лотан ияха актащиты ант рахаӆ. Щи касапса па щирн верса. Мосмаӆ хоты хуӆ па нёха нёхарӆан видеоролика ханшты. Щи видеоролик туп хуӆам минут. Хуӆам минут сыс мосас хуӆ нёхарматы, нёха нёхарматы па хорамаңа ана понты. Щи кут мосас потарты холща наң уӆӆан па хоты туңа щира няр хуӆ па няр нёха нёхарты, муй щи ураңан мосаӆ верты.

Округев ӆоват эӆты хуӆамхосьяң хоят видеороликат китсат. Туп яң хоят еӆӆы касты эсаӆсаят. Там пуш Ӆорвоош районэв эӆты Егор Наков, Галина Лобанова па ма, Иван Сандрин касты нумас понтсув. Щи касапса ураңна яма ӆэщатысув. Ямшак хуӆ па нёха пирысув. Ма ваттэмн ур ёх нянь кешетн па рущ ӆапка кешетн нёхратӆат. Сишн хуӆ, нёха ваӆщамӆаӆ еша куӆашк тыйӆат. Хой йишн симась кешет нох сохнапӆат. Муң па ханты хоятӆув ӆув верам кешетна туса нёхратсат. Кашң хоят ӆувеӆ хоты мосаӆ щиты кеши вераӆ, ӆув ёшаӆ ураңн ӆэщтатӆаӆы. Щи ураңна щи видеоролик хуват мохты ныӆа хоты ханты кеши туса хэңхаляӆ.

Егор Наков шеек ям видеоролик вермаӆ, хота ӆув камн, унт ӆыпиян, сыстам тахаян щохар хуӆ туса нёхрас. Ӆув ёшаӆаӆн верам хув ана понстаӆӆы, хорамӆасӆы. Па иимеӆ пиӆан ӆухӆаӆа порыӆысӆы. Шеек ям. Умащ ваттыя. Кимет хоятэв, Галина Лобанова. Ӆув Казым-Мыс курт эӆты. Щи касапсаян нэ воӆӆы шимаӆ вус. Галина Ун Асн уӆ па ун вояң вуш няр хуӆа версаӆы. Щикем туса нёхарсаӆы. Вуӆы нёха па ищиты версаӆы. Кешеӆ пасты, яма нёхарӆ. Ёх хоятат эӆты, ма ваттэмн, ёхи ант хащаӆ. Тус па каркам нэ.

Ма па ищи хоты вератсам, хоты хошӆам ищи юр версам. Щохар хуӆ вуӆы хот ӆыпиян нёхарсам. Хув ана няр нёха пиӆан ияха понтсыӆам па вурты рыхан хорамӆысӆам. Хой инщасӆ – хоты наң утаӆсат щиты нёхарты? Вуӆы хотан энамты, куш веӆпасты панат эӆты няврэмат воӆаң нэмоӆты хоятан нёхратты ант утаӆтыӆаят. Ӆув ун хоят, аңки-ащи пеӆа вантман утаӆӆат. Хоты ун хоят вераӆ – няврэм ищиты. Сишн хоты ма хошӆам, хоты айтэӆн вантсам щиты щи хуӆ па нёха ӆэщатсам. Туп меет ӆаварт вус щит видеоролик верты. Йи хуӆам минут кум мосмаӆ щи арат верты. Ӆухсэм Иван Алексеевич Тогачев видеороликат шеекяма хошаӆ верты. Ӆув щи манэм нётас. Ӆувеӆ ун пумащипа.

Йи хоят па Ӆорвоош районэв эӆты вус. Ӆув туп ин Пуӆңават воошан уӆ па рупатӆ. Щит ма яйм, Герман Романович Сандрин. Ӆув ищи айтэӆн туса хуӆ па нёха нёхарӆ. Мир ӆоватэвн ар-сыр рут туристата нярхуӆ верыӆыяс. Ма ваттэмн ӆув сэм ӆап хатчаман вератаӆ няр хуӆ нёхарты. Там пуш ӆув няр нёха меет хорамаңа па тусашк нёхрас. Сишн нох питас, оӆаң места шитас.

Нярхуӆ эватман ур ики Эдман Хасэвтевич Неркаги нох питас. Йи хуӆаӆ шупиман эватсаӆӆы, киметаӆ – соӆамата рэскасӆы, шука тохас. Щи ураңна ӆув нох питмаӆ…

Видеоролик хуват воӆаң ант ныӆа хоты нёхарӆа. Мосаӆ ияха, туняӆ иты, ёхтыӆыты па этаӆтыты хой каркамшак па тус. Кимет таӆн па иты нох вуратты питӆув. Ат аршак ханты няврэмат этаӆтыӆат хоты туса няр хуӆ па няр нёхи нёхарты хошӆат!

Потам хуӆ

Ӆавантысты нын па хаӆся
Веӆси нёхрам потам хуӆ?
Хошам няӆмен потам валсямн
Хун па хойӆа оӆаң пулн?
Матты хорс сус пошам хуват,
Пекӆан яхӆат кентан, аӆ,
Лыпен хуват ёлах руваӆ,
Хоят ая верман манӆ.
Вояң уш ки ӆэты питӆан,
Няӆмен понӆа – ӆэты каш.
Таремиты унты ӆэӆан,
Ат туп вертӆан манты шаш.
Хаӆңаяң ки сух пул няӆма
Ёхтаӆ – уңӆэн хувӆа ойн.
Си рувенна таӆаң хатаӆ
Самен матты овӆа ойн.
Потам хуӆан сот сыр умась,
Тайӆат – ястаӆам ин хун,
Сишан ханты мояң ёха
Мет оӆаңна омтаӆ хуӆ.
Потам хуӆан тайты упсят,
Ат ястаӆам таӆта еӆ.
Умсьӆаӆ ватты утсиӆан ки –
Ёхта Аса – моштаӆэн.

Роман Ругин.

№3 16 января 2021

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

19 + = 24

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!