Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Хорсты вер етшаптасат

Last updated on 21 января, 2021

Катра таӆ соханты хатӆатн вуӆэң ёх таӆ хуват верам рупатайӆ версыӆаӆ

Мужевский сельхозпредприятияян хут бригада уӆ. Кашң бригада таӆ хуват ар юр понас тащ энмаӆты ураңан. Щи эӆты ӆувеӆаӆ йиты ох йиӆ семьяйӆаӆ ӆапатты ураңан. Яӆап таӆ емхатӆат кеша мосӆат мойӆапсаят па ӆэтотат ӆутты.

Хут тащ тыӆащ-кем хорссат. Туняӆ яӆап хорсты щир этас. Рущ щиран. Мужи воош ӆеп яӆап хорсты лот ӆэщатам. Щи унты мосаӆ хорсты тащ воштаты. Туняӆ хорты воят вездехотан хорсты хар унты таӆӆысаят. Симась вер атом уӆмаӆ – вуӆэт ӆувеӆаӆ эӆты тапалмеӆ па нёхиӆаӆ атма, востыя ювиӆымеӆ. Сыйоӆаңӆаӆ тапалтамат па майя хирӆаӆ тохмеӆ, нёхи атом эпаӆн авмаӆ. Сишн тампуш кашң хорсты тащ хорсты лот унты аӆ воштасаят.

Хуӆмет, няӆмет, ветмет па хутмет тащат Мужи воош пеӆа нэман ванашк таямт. Хув воштаты ант мосӆат. Ӆаваршак верас туп шимаӆ ӆонщ – вуӆэт мохты ёхӆы уратты питсат, воош пеӆа ант ӆытсаят. Ивевн, атаң-хатӆ, сэм-ватман воштысаян хорсты хар унты. Хутмет тащ сот молтас-кем километра воштасаят. Ветмет тащ еша вананшак уӆмаӆ. Хуӆам-кем хатаӆ воштасаят, вуӆэт па хоятат метсат. Хуӆмет тащ Кузь-ёль каралян ӆуңатсаят. Няӆмет тащ па Пожемаю каралян.

– Па мув эӆты щи хувата ӆаварт воштаты. Яма метсув, – потарӆ пастух Андрей Пугурчин. – Тата па, Мужи воош леп тэӆыя воошаң акар ампат актащмеӆ. Ӆув ищи морт-кем ӆаварт версат. Ий похӆэв караль эӆты сохнаптас, ампатн еӆ туса. Щи ураңна па ӆувеӆаӆ Мужи воош ёхан хуват акатсыӆув. Щаӆта акар ампат нюхатӆысув, пошканан оратсыӆӆув.

Меет хувшак хорсты хар эӆты вусат олаңмет па катмет тащат. Ӆув тащӆаӆ Соях коралян ӆуңатсыӆӆаӆ. Ёханкурт ӆеп эӆты Васьёханов пеӆа воштасӆаӆ. Васьёханов там пелакн ат сютчисат па па еӆӆы Нильчим сойм пеӆа мантсат. Щиӆта тыӆтам юш пеӆа па хорсты хара ёхатсат. Оӆңашк катмет тащ щи юш хуват воштаса. Ӆув хорссат. Щи юпиян веӆщи олаңмет тащ ёхатсат. Щи тащ меет юхат хорса, Яӆап таӆ унты ӆапат туп хащыӆыяс.

Вуӆэң ёх куща Алексей Худи ястаӆ: «Воӆаң ӆаварт туняӆ таӆат иты антом вус. Тампуш вуӆэт веӆмаңт па турам ищкеӆ ищи морт-кем вус. Вуӆы нёха яма потса па шаш вой тайӆ. Хорсты хоятат ищи тармат вусат. Иса яма рупатсат. Вуӆы леккарат нёха ватман тайсыӆэӆ. Вур анализа вусат. Сорашк рупата манты ураңна хорсты хотан нэман митаӆыям ӆэтот каварты хоят тайсув. Щит повар – Аркадий Григорьевич Севли. Ӆув ветхосьяң (15) хоят ураңна кашаң хатӆ кат-пуш ӆэтот кавартыяс».

– Ван хатӆап тыӆась 22-мет хатаӆн хорсты етшасув. Па мохты хорсты хотэв сыстапсэв, нох лёхатсэв. Рупатаев яма манас, – айкеӆ китас МСП «Мужевское» куща ху, Александр Севастьянов. – Аратӆ щорс катсот ветъяң (1215) ох хорсув. План хуват щит – няӆъяң пеӆа нийӆ (38) тонна вуӆы нёха. Яӆап нёха мохты ӆутты питса. Хорм эӆты шупӆ уже ӆутсаят. Тампуш нёхэӆ ям, туняӆ эӆты вояңшак. Шука эватман па фарша верман ӆапка сахат хоятат яма ӆутӆат.

Кашң тахаян яӆап вуӆы нёха ӆаваӆӆа. Горки вооша катхосьяң хир эвтам нёха китам. Ашкулаята па детский садиката яӆап нёха митаӆыям. Хоя мосаӆ вератӆат таӆаң тэӆн нёха морозильник эӆты ӆутты. Щиты еша тынӆышак питаӆ. Куща ху ястас, муй нёха хащаӆ кимет куртата китӆат па Ёмвоош мув Березовский район пеӆа.

МСП «Мужевское» хоща аратӆ хут тащ ӆуңатман нийӆ щорс моӆтас вуӆы ох уӆ. Меет аршак хорсты масат оӆаңмет па хуӆмет тащат. Сишн ӆув премияян маты вер тайӆаят. Хащм таӆ муй кем арат яма манас. Яӆап таӆн хоӆна ямашк рупатты вуӆэң хоятӆува па турамн ат нётӆаят. Касаӆты юшӆаӆ ат туңа манӆат. Ин па ӆувеӆаӆ мосаӆ Вуӆэң ёх емхатӆ кеша айӆта ӆэщатыты. Еӆӆы тумтака ат уӆапсаеӆ туӆат!

№3 16 января 2021

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

5 + 4 =

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!