Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Роман Ругин нумӆэв

Вет таӆ моӆтас хащас хоты ханты мур эӆты туса ханшты хоятэв антома йис. Ӆув ин антом па ӆув ханшам монсьӆаӆ, потарӆаӆ па ӆуңтарӆаӆ хоятат ӆуаңатӆаят, уятӆаят па нумӆаят

Роман Прокопьевич 31- мет хатӆ 1939 таӆн сэма питас Ханты-Питӆор нэмпи куртан Ӆорвоош районэвн. Ащеӆ-аңкеӆ вой па хуӆ веӆпасман рупатсаңан.

Морт арат Роман Ругин ханшам ӆуңтарт арата понамат, хоятатн ариӆаят. Россия хон мувев ӆоватан арсыр газетаятн па журналатн ханшам па ӆэщатам отлаӆ ищи нох ханшман вуӆӆат. Щи тумпина ханшам рупатайӆаӆ арсыр па хон пелак муват ясңата кертамт па толмащтамат, щит – венгерской, финской, эстонской, французской, итальянской, чешской, испанской, польской па аңлийской па па ясңата.

1958-мет таӆн Пулңават педагогическое училище етшаптамаӆ юпийн Хон Петра воошн А.И. Герцен нэмпи университетан, институт народов Севера хоща вутаӆтыяс. Щи юпина мохты 1964 таӆ эӆты па 1968 таӆ унты Ӆорвоош районэв Васьёханов куртэвн няврэмат ашкулаян утаӆтас. Юхат ашкула директора рупатс.

Щаӆта кимет няӆ таӆ-кем 1972 таӆ унты Пуӆңаватн Ямал мув окружной партия КПСС инструктора вус. Щи юпиян окружной санаторно-лесной ашкулаян кущая рупатс. Щикут кум шитман хоӆна па педучилищайн энамты ёх КПСС историяя па ханты ясңа утаӆтас.

1981 па 1984 таӆ унты рупатӆ инженера охраны окружающей среды объединения «Ямалнефтегазгеология». Щи порана Ямал мувевн веӆщишк путы мув вой па газ мув иӆта нох таӆты питса. Ӆув шоши муваӆ ураңан шеек аратыман вус, сишн муй арат кум шитас муваӆ шавияс. Нэпекат ханшас щи эӆты.

1983 таӆн член Союза писателей СССР хоща вуӆа.

1985 таӆ эӆты лаңкара вуӆты окружной агиткультбригады хоща рупатс. Щи таӆн ун мойӆап нэпекан юкантӆа – «За педагогическую деятельность» няврэмат пиӆна вещката рупатам ураңна РСФСР Министерство просвещения эӆты па «За доблестный труд» нэмпи медалян мевӆа ханаӆӆа.

1992-мет таӆн нумас понаӆ яӆап хорам журнаӆ мосаӆ вертыя. Щиты ӆув понам юраӆн этаӆ яӆап журнаӆ «Ямальский меридиан». Щи нэмпи журналан ӆув олаң кущая рупатс. Па еӆӆы антома инты унты щи журалаӆн щи рупатс.

Меет оӆаңмет ӆуңтарт па потрат, Роман Григорьевич, 1950-мет соханты таӆатн ханшты питчас. Щиты мет оӆаң сборник ӆуңтарат пиӆна этас. Сборник нэмӆ вус – «Ӆыӆаң йиңк». Еӆӆы этӆат книгаят «Погоня», «Снежные мелодии», «Метель на ладони», «Солнце над снегами», «Ранний ледостав», «В ожидании сына». Щи тумпина ханты поэт Прокопий Салтыков пиӆан ӆув ашкулаятн ханты рут ясаң вутаӆтыты ураңан ай няврэмат кеша «Сорни тутые» нэмпи книга ханшсатан.

1988-мет таӆн Роман Ругин Союз писателей СССР эӆты литературной премияян мойӆам «За прозу по- следних лет» кеша. 1990 таӆн – лауреат премии Союза писателей РСФСР. Вуӆтаӆ хуват ӆув 30 моӆтас нэпек книгаят ханшмаӆ. Щимащ воӆаң тынаң рупата ураңна ӆув хоӆна ар тынаң мойӆапсаятн мойӆыӆыса. Меет тынаңшак щит: 2000 таӆ – нэмтӆа «Почетный гражданин города Салехарда». 2001 таӆн нэмтӆа «Заслуженный работник культуры Российской Федерации». 2005 таӆн – «Почётный гражданин Ямало-Ненецкого автономного округа». 2007 таӆн юкантӆа нэм «Легенда СМИ Ямала». Щиканща 8-мет хатаӆн Аспотты тыӆащн 2010 таӆн – нэм Лауреата Всероссийской литературной премии им. Д.Н. Мамина-Сибиряка «За заслуги перед литературой» юкантӆа.

2016-мет таӆн Щохар тыӆащн 9-мет хатаӆн Роман Прокопьевич Ругин антома йис. Ошаң нумсаң ханты хоятэв ханшам отӆаӆн нумты питӆэв.

Ӆыӆаң йиңк

Тови пеӆ ӆор курна,
Сах уӆна лаңкасман, Вот эваӆт шуңа сув каварӆ.
Йиңк пеӆа аңкарсмасам: Ӆаптайӆаӆ рахаӆман
Хуӆ паттаӆ – еңка хащ наварӆ…
Суңа ов сорам кем,
Ӆупахна ёхатты куш,
Тохаӆӆаӆн пурӆаты утщиӆат…
Хатӆ пеӆа уратӆат.
Муй щимащ вер?
– Сарӆ эӆты ат паӆман ущищащат.
Муя ӆув актащӆат?
Муйна ӆув нюхаӆсайт?
– Хаӆам йиңк туятна курмӆсайт.
Уйтсат ӆыӆаң йиңк,
Уӆты ӆыӆ уйтсат!
Хатӆ Ӆыӆн щи йиңкӆаӆн ӆыӆңаӆсайт.
Ӆыӆаң йиңк!
Ӆыӆаң йиңк!
Муй хорпи, нэш, ям!
Ӆояса…
Хуӆӆисэм моньщат эваӆт ма
Щи йиңкна хоят ӆыӆ нох ӆыӆңаӆтыйм,
Вещкат вер щи щирн нох потаӆамаӆ.
Юр тохӆаң сывасна
Щи йиңк туп мошатыйм,
Вещкат мув кимӆата пурӆыман.
Мур нумас век хаӆӆы!
– яма моштасэм –
Муй нумасӆ ма мирем щи ӆыӆаң йиңк эӆты.
Ӆыӆаң йиңк – вольняяң, веӆмасаң уӆапса.
Мурата ӆаӆты ӆыӆ туӆ ӆув.
Ленинэв, Ленинэв питас щи сываса,
Щи йиңкаӆ тувмаӆ кемн, вольняя уӆӆув.
Ӆыӆаң йиңк –
Ленинэв утаӆтам нопсат.
Еӆӆы туты, па мурат напатӆат
Ӆыӆ иты, нуптаң ӆув, па муват яӆпиӆат.
Ӆарпиман мув хуват овӆат.

Ханты лопас lэсятас Иван Сандрин.
Хорат масат: Иван Сандрин, Валерий Пырысев па интернет эlты.

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

33 − = 28

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!