Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Ямалса Войвыысӧ медводз сьылӧдысь

Last updated on 5 апреля, 2021

Иван Григорьевич Истомин – медча нималана Ямалса изьватас

Ми ставӧн тӧдам, мый Иван Истомин чужис 1917 вося февраль тӧлысь 7-ӧд лунӧ  Мыжыын, чери кыйысь коми семьяын. Сылӧн челядьдырыс колис дзоля Об ю горулын, кӧн орччӧн олӧныс казымса эсьтякъяс, манси, яранъяс, комияс да рочьяс. Куим арӧсӧн Иван зэй висьмис, нэм кежлӧ коли инвалидӧн, ӧкмыс арӧсӧн суутіс кӧстыль вылӧ. 1934 воын эштӧдіс Мыжыын 7 вося школа, вуджис Салехардӧ. Вит вылӧ помаліс 1938 воын национальнӧй педагогическӧй училищӧ. Педучилищӧын водзмӧстчис да мукӧдыскӧд ӧтвылысь лӧсьӧдіс литературнӧй кружок да кипомысь «Ямал тату» журнал.

Дас кык во Иван Григорьевич велӧдіс роч да яран кыыяс, серпасасьӧм школаясын. 1950 воын КПСС-лӧн комитет вуджӧдіс сійӧ «Нарьяна Нгэрм» кытшса газет редакцияӧ редакторӧс вежысьӧн, вуджӧдіс яран кыы вылӧ роч гижӧдъяссӧ..

«Олень» медводз кыыбурсӧ Иван Истомин йӧзӧдіс газетын 1936 вося рака тӧлысьӧ. Сэксянь кыыбур да висьтъясыс, очерк да публицистика гижӧдъясыс петалісныс кытшса да Тюмень обласьтса газетъясын, «Омский альманах», «Сибирские огни», «Дружба народов», «Урал» да «Нева» журналъясын, «Войвыв кодзув» журналын, «Полярный круг» альманахын да мукӧдлан.

1958 вося ӧшым тӧлысьӧ вуджӧ ооны Тюменьӧ да уджалӧ Тюмень небӧг лэдзанінын медшӧр редактор вежысьӧн, уджыслӧн нырвизь – национальнӧй литератураа, бэрвы – гижан уджын.

Иван Истоминлӧн медводз небӧгыс – яран кылӧн «Миян Войвыы» кыыбур чукӧр – йӧзӧдӧма Ленинградын. Тюмень, Шӧр Урал, «Современник», «Советский писатель», «Художественная литература» небӧг лэдзанінъясын петаліс Истоминлӧн кызь сайӧ небӧг – повесьтъяс, висьтъяс, кыыбуръяс яран да роч кыыяс вылын, «Живун» да «Встань-трава» романъяс.

Иван Истомин бура тӧдіс ӧтпырйӧ некымын кыы, кодъяс вылын и гижис: роч, яран, эсьтяк да коми кывъяс. Иван Григорьевич вуджӧдаліс рочсянь яран да коми кыыяс вылӧ. Сылӧн уна кыыбур вылӧ гижӧма сьыланкыы.

1963 воын Тюменьса театрын пуктісныс роч кыы вылӧ вуджӧдӧмӧн сылысь «Цветы на снегу» драма. Пӧмнита и ми сыйӧ петкӧдлiм сцена вылын, чайтiм, мый ми артистъяс. Сыдз гижӧма кокниа и настоящӧя, мый ворсны абу сьӧкыд.  Нӧшта Иван Григорьевич серпасасис. Сылӧн кык серпас «Арест легендарного вождя ненецко-хантыйской бедноты Ваули Пиеттомина» да «Ленин на Ямале» выйим Салехардса краеведческӧй музейын. Велӧдан да гижан уджысь Иван Истоминлы сетӧма «Почёт Пас» орден, «За трудовую доблесть» медаль. 1955 восянь И.Г. Истомин пырӧ СССР-са гижысь котырӧ.

Тайӧ, сыдз шуам, кос фактъяс. Сьӧлӧмсянь кӧ, ме эськӧн зэй мӧдi ооны ӧтик пӧраӧ и тӧдмасьны миян гижыськӧд. Кор ме лыддьы сылысь мойдъяссӧ, дзоля юрам локтiс уна мӧвп. Кудз авторыс тӧдiс мыйысь шыр да кӧр оз ветласьныс. Кытысь сыа тӧдiс кудз черияс ваын ооны кучисныс. Мыля кӧ менум воисныс лыддьыгӧн татшӧм мӧвпъяс. Иван Григорьевич чукартӧма тайӧ мойдъяссӧ сы дорӧ воысь народлысь. Тайӧ мойдъясыс пыр на ветлалӧныс чомйысь чомйӧ, прӧстӧ неуна мӧдпӧлӧса ные висьталӧныс кӧр дорсаяс. Менум висьтоолiсныс жӧ ные чомса дедъяссӧ.

Ми, ӧнi кадӧ олысьяс, ог тӧдӧ Иван Григорьевичӧс синмӧ, но кор лыддян, кудз сы помлась шуӧныс ёртъясыс, челядьыс, сыа лоӧ топсе матыса мортӧн.

Дивутча, мый сылӧн сы мыйта вӧлi вын ооны. Лёксӧ топсе абу аддзӧма, шуӧныс, пыр бур руа мортӧн вӧлӧма. Кор лыддян сылӧн олӧм помлась, став тэнад мытшыд олӧмын кажитчӧ дзоляӧн, юрад мӧвп, мый ставсӧ верман карны. Сичкӧ Иван Григорьевич колис ас бӧрын бур коляс – гижӧдъяссӧ, кодъяс сетӧныс вын и би олӧмын. Кор лыддян Иван Григорьевич помлась казьтылӧмъяс, дивутчан, кутшӧм сылӧн вӧлi ыджыд сьӧлӧм и юрвем, позе кӧ сыдз висьтооны.

Бэр кыы местӧ шуа, миян орччӧн олӧ сы мыйта сяма, енбия йӧз, код вылӧ видзӧдан токо, а сьӧлӧм радлӧ, а кор кӧ и сьылӧ.

Владимир Тимин гижлiс: “Бур зэй, выйим кӧ мыыкыд друг. Кодкӧд ӧтик могӧн олан. ӧта-мӧдлы кодыр колан. Но и ышнясьны он кут. Бур зэй, выйим кӧ мыыкыд друг, шог и гажсӧ дась код юкны, коді быттьӧ тэнад юкӧн. Дружба сыкӧд нем оз дзуг. Бур зэй, выйим кӧ мыыкыд друг”. Чайта да, ставыслы, кодлы мойвиис тӧдсаасьны миян Ямалса Войвыысӧ сьылӧдыськӧд – вӧлi шуда.

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

5 + 1 =

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!