Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Тащ хотн яңхам уӆапса эӆты ханшты нэ

Last updated on 12 апреля, 2021

Лидия Иосифовна Лонгортова (Куртямова) сэма питас кевн Курк тыӆащ 15-мет хатаӆн 1961 таӆн. Тампуш юбилей хутъяң таӆ поснтас. Айтэӆн тащ хотатн энмас па щита уӆтаӆ хуват рупатс. Ин пенсияян уӆ Овкуртан. Ийкеӆ пиӆан ӆапат няврэм энмаӆсатан: няӆ похие па хуӆам эвие. Уӆтаӆ хуват иса ариты нумас тайс. Сишн кевн касӆман арияс. Няврэмӆаӆ иӆ оӆтыман арсыр арт арияс. Ёнтасман ищи ар пиӆан. Иса муй молты верӆ айӆта арияӆ. Щиты айнайн нэпека арӆаӆ ханшты питсаӆӆы. Ин камтса ӆув ханшам ӆуңтарӆаӆ ӆуңтаӆн.

Кева манты юш

Кева манты номпсэм щи питыӆымаӆ,
Овкурт пан нёӆн пайм уӆм версам.
Мохиӆам пиӆан потрэмисам, мосӆтасайм.
Няврэмийӆам пиӆан шаншн ӆэӆапсам.
Оӆңем уккеӆн нёхтаӆэм,
Пелкӆам сувн хойӆаптыӆайт.
Щаня ёхан хуват нохӆы ма манӆам,
Юшэм вана верман арыӆам.
Еӆӆы Харсор ёхатаӆ,
Вуӆыӆам щутщаптыӆам.
Щаӆта Нымвошкурт вана ёхатаӆ,
Щита кумайӆам, пиӆӆам хоща хойӆам
Шай инщӆам, ариӆам па манӆам.
Кирш курт хащаӆ
Ай ӆовсаңхом хащаӆ
Сэма питам куртэма ёхатӆам,
Хот овем портыман омасаӆ.
Еша номпсэм щи шакиӆымаӆ,
Мужи юша питтэм ям юпиян.
Унт юшан уӆыӆам хухаӆӆат.
Тови ат хащмаӆ новия хутӆымаӆ.
Ёхи муң щи ванамасув,
Арыман мув авт сора хащмаӆ,
Вуӆы хота муң ёхатсув.
Арыман мув авт каш сахат хащмаӆ,
Вуӆы хота муң щи ёхатсув.

А хой щахар эӆты шушаӆ

Ма сама мосты ям хоятэм
Ӆув ай молщаң щи эӆан таяӆ,
Восты моӆшаң эӆсохан.
Курӆаӆан питы тупрат.
Ӆув оңат антоп-кеӆ ярмаӆ.
Муя, муя ма уйтыӆымем
Ӆылаң турм уӆты юш сыӆн.
Ям щи, ям щи ма уйтыӆымем,
Ям щи ям щи ӆув ӆикмимемаӆ
Муңев мосты ям хоятэв
Ӆув щи уӆиӆимаӆ.
Муңев мосты ям хоятэв
Ӆув щи уӆиӆимаӆ.

Ма арием

Посӆаң Ущуп кутп эви
Ма щи уӆмем ие,
Щаня нэ кутп эви
Ма щи уӆмем ие.
Щаня ёхан хуват хоты
Щаня хоят тэӆыя.
Щаняя туп муң антев
Хоятат нюхӆыӆыса.
Еӆпи таңха ма ищи
Нумас тайсом
Ун воша манты,
Утаӆтаты, мир ватты.
Уӆты щир иса хун
Аӆ нумаӆмийм щирн уӆ.
Уӆпсаев щиты карэмийс
Ёхи хащты вера йис
Ёхи хащсам муй атом.
Ащем пиӆн Кевн ясхам,
Ханты уӆты щир еӆӆы тусэм.
Пора ёхтас хоят сая ма ӆэӆомтымем.
Ащем кирам хуӆм нови,
Хуӆм нови хоптыем,
Хоӆ щи нумиӆымем
Хоӆ щи нэмн поныӆымем.
Меньнэ оӆңем Шалку уӆмаӆ,
Антием энмаӆтам аввка.
Пелкңаӆам опем юкан,
«Атом сапаӆнэ» похңан уӆман.
Шовр па нови пох нэман поныӆысӆам.
Имоӆтыйн Шалкуием
Кевтумпийн хащиӆымаӆ,
Кевтумпийн тапиӆымаӆ.
Аввкаем щаль ураңан
Кев уншман ар щи верыӆымем.
Пуши най имем войн веӆса
Мойнэ таӆам уӆыем.
Атм товийн тапиӆымаӆ
Хаб нэ ёхана ӆоңиӆымаӆ.
Ӆащми ӆор патыйн
Яймн нёхэӆ уйтыӆыйм.
Нови нёӆпи нэвуӆэм
Хэра Ими иӆпийн
Щита войн мощатыйм.
Уӆы хоты сормаң вой.
Хоятыет тумтак ат уӆӆат.
Юхат камн-пуш юкантыйм вуӆы
Хоты пелаң вер
Самеман тайӆыты
Тухоӆ ант шавиӆайт.
Хоӆтыйӆам уӆыӆам
Хоӆые тумтак ат уӆӆат.

Ханты лопас ӆэсятас Иван Сандрин.
Хорт верас Татьяна Паршукова, Вениамин Горяев.

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

20 − = 14

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!