Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Кев уншты ӆэщатысат

Last updated on 11 мая, 2021

Па йи таӆэв хащас. Вуӆэң ёхӆув уӆапсаеӆ щирн Кев пеӆа касаӆты пора ёхтас. Еша сютчисат, ияха уйтантысат, емаң хатӆэӆ порыӆысэӆ. Ин па еӆӆы касаӆты мосаӆ

Мелк тови найаң хатӆатн ӆонщ сора ӆоӆаӆ па йиңк этаӆ. Вуӆэң ёх хоятӆув вуӆылаӆ пиӆан Кев тумпелка актащты питсат. Туп ох-шук ӆаваӆсат. Щи онтасна ӆув касӆты сыс па ӆуң сыс ропаха ӆэтот сопасӆыӆат, шек ар ант мосаӆ: шай, саккар, юхвой, пуӆка-ӆат па еша шук ӆэтот. Нёха па хуӆ ӆэты арат унтан мощатӆат. Щиты, йиты ох ӆаваӆты эӆты зимник нэмпи юш атмащ ювмаӆ. Куща ёх еӆпи ант нумасӆат. Оӆңашк рахас ох йиты щирн нэпек ӆэщатты. Па хойн симась юш эӆты хоятӆув Пуӆңавта тутӆыӆаят.

– Ванты, Пуӆңаватан па Ӆапатнаңкан муй хорпи мосаӆ щи ӆэтот ӆутты рахаӆ. Щи тумпина тынӆышак, – ястаӆ оӆаң-мет Мужи вош сельхозпредприятие тащн рупатты пастух Михаил Озелов (Ун Мишка). – Юш нёхӆаңа йис. Машинаян вевтам манты. Иймем пиӆна ӆонщхопан мантсаман. Муй мосаӆ иса ӆутасаман, ухӆэв хуншсэв. Ёхӆы ювман Катравош ӆеп картшупем понькамтас, шукаӆас. Сишн нумасты питсув муй верты. Акаем Пуӆнаватан уӆ. Ӆувеӆ телефон хуват ястасам. Ӆув трэкол машнаян ёхтас. Нётап верас, ӆэтотӆув-пормасӆув Васьёханов унты тусӆы.

Щиты хой кум шитас, хойн нётап верамн Пуӆңаватн ӆутассат. Щита ин тэӆыя тынӆы «Пятёрочка», «Фикс-Прайс» нэмпи ӆапкаят пуншамт. Хой кум ант шитас, щит ӆув куртӆаӆн ӆапкаятн ӆутассат. Ай вошатн па куртатн ӆэтот па пормас тынаң. Па хоты верты, касаӆты мосаӆ. Муй арат тармас вуӆэң ёх сопас версат.

– Мужи вошн щи муң ӆутассув. Муй ӆапкаяӆ тайс щит щи ӆутсув. Йи «Марина» нэмпи ӆапкаян ӆэтот ӆутсув. Ма семьяема – антем, ащем, иймем па похием – сот-кем щорс манас. Щи ураңна муң хоя муй арат ох мосаӆ аванс юкан ханшӆтасув. Ӆуң сыс яңхты эӆты соханӆ, – потарӆ пастух Пётр Артеев. – Няньн ищи муй арат семьяя мосаӆ муң заявка версув па щаӆта трэколан Соях унты тусаят. Охотоведат омасты кордон эӆты муң ӆонщхопатн няньӆув хот унты таӆсыӆув. Хой яӆап няньт кутн хир хоща катра хахрэм няньт лукемамт. А муя па щиты верӆат? Вуӆэң ёх муй анта хоят?

Ин тови сыс, мелк хатӆат па няр-нёха воӆаң ант хорӆат. Понты таха антом, аӆ шакӆ. Щи ураңна тохӆаң войт тэӆыя яңхӆат: хор-куропаткаят, лук-икет па ешауӆ васэт, ӆунтат, хотңат пурӆыман хошам муват эӆты ёхатӆат. Касӆты сыс еңк эӆты хоӆап понӆыӆат. Яӆап сорт хояӆ ищи ям – эпӆаң хошъйиңк инщӆа. Авкаят ищи самаңа соӆаң хуӆ хошъйиңк инщӆат.

Сельхозпредприятие «Мужевское» тащат иса ӆэӆтасмеӆ. Иса муй мосты пормасат па ӆэтот патан вуймеӆ. Ин ӆув нумас понмеӆ кумамтыты. Ущӆа йис, мосаӆ нёхӆыты. Муй шеек мосаӆ патан вуӆат. Ант мосты от, торас верты от Юхң Кев хотваӆатн хайӆэӆ.

– Няврэмӆув ашкуӆа эӆты ёхи эсаӆсаят. Муй мосаӆ, ӆуңатты, ханшты нэпекат патан вусӆаӆ. Уншак няврэмат апщиӆаӆ утаӆтаты питӆат. Щикут няврэмӆув шеек ун нётап верӆат. Касӆты пораян кашң ёш мосаӆ. Ай няврэмиет сох ватухӆа аӆӆат, юх па йиңк туӆат. Вет-ӆэм таӆ эӆты вутча ухаӆн хошӆат яңхты. Хоптэт ватӆтаӆат. Уншак няврэмат онас туӆат, – потарӆ пастух Семён Озелов. – Ёх няврэмат тащ воштаӆат, ӆавартшак рупатаян нётӆат. Ин ёлахшак пуӆяң уншак па ӆаварт пормас похэмн ӆонщхопан еӆшак таӆӆаят.

Вуӆэң ёх касӆты юш хуват атом ёханат тайӆат. Оӆаң-мет тащ касӆты юш хуват уӆ ун ёхан. Ханты щирн нэмӆ – Вомту ёхан, рущ щирн – Ванктывис. Ӆув аӆаң пелки питӆ. Хаӆтатӆ уна йиӆ. Ин потам щирн ӆувеӆ мосаӆ уншты. Катра еша ёхи хащӆан-ки щи – норм верты мосаӆ. Щиты таӆаң хатӆ ватухӆат па хотат па пелка таӆӆаят. Тащ ущман папелка питаӆ. Щи порана ар шаншйиңк вантыӆысат. Щи тумпина еӆӆы пеӆа хоӆна Ун юн тайӆат. Ӆувеӆ ищи кумамтыман туӆас эӆты мосаӆ уншты. Хой пораян так ураңн туӆас эӆты норм понӆа. Щаӆта Тань-Ю ёхан пеӆа питӆа-ки щи ям, еӆӆы рахӆ ант тэрматыман касӆты. Ӆавӆасӆа, суювт юраңшака йиӆат па еӆӆы пеӆа Кев уншты манӆа. Щикут кашң вой самӆ вохӆа: веӆщи нох верӆам мойпарат ӆэты ӆытӆаят, еврат па ӆоӆмахат яңхӆат, нумӆта па курк-икет ай суювт куншематы вуратӆат. Тащ сэман вантман тайты мосаӆ. Щи хатӆатн тащ шавиты ёх атаң-хатӆа пелтащман рупатая этӆат.

– Туняӆ муң ийкем пиӆн, ай похэм па ун похэм пиӆн касаӆсув. Щи порана кутап похэм – Мишка (Ай Мишка) – соӆтанан яңхас. Тампуш па ун похэм – Андрей, соӆтанан яңхаӆ. Ин Мишкаем нётӆ. Утаӆтаты манты утчияӆ. Ин яӆап щир. Ант-ки утаӆтыӆан – рупатая ӆаварт ӆоңты, – ястаӆ Наталья Озелова. – Тампуш хоӆна муңев Кев уншты нётӆатан ун яйем па аньхэм эвиеӆ пиӆна. Ӆув туняӆ нык хащсатан, пенсияян уӆӆатан. Марэмасайтан, вохсаӆам, мохты кашащсатан. Яйем похлӆаӆ пиӆна мохты Пулңавата яңхас шукӆэтот па нянь ӆутас. Ин нянь ванщты па сораӆты питӆув. Ищипа уӆтэӆ хуват вуӆэң хотатн рупатсаңан. Тампуш муңев касаӆты кеншак питаӆ!

Ӆуңн вуӆы леккарат ищи Кев пеӆа манӆат яӆпа этам суювт ӆуңатты па биркаятан понты. Вуӆэң ёхӆува тумтака Кев унштыя, аршак суюв энмаӆты па вуӆыӆаӆ яма шавиты! Ат Най Уртан шавиӆаят па юшӆаӆ туңа манӆат!

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

74 − = 73

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!