Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Хуӆ веӆпасты ёх емаң хатӆ

Last updated on 11 июля, 2021

Там ӆапатн Аканьӆэвм куртан веӆпасты ёх ураңна каш верса

Яӆпа этам коронавирус нэмпи муш хоӆна нох ант воӆыяӆ. Щи ураңна районэв ӆоватн ун порыӆыты лот верты ант питса. Щи еӆпи таӆатн Ӆорвошан па кимет куртатн ар ияха ёхтам мояң хоятат пиӆан хуӆ веӆпасты ёх ияха уйтантысат па таӆаң хатӆ каш верты веритсат.

Тампуш туп куща ёх Аканьлэвм нэмпи курта яңхсат па щита сора-сора рупата щирн мойӆапса ясаң ястасат. Щи тумпина Ямал мувев ун кущаят утчиӆат Горки воша яңхты па щита мойлапсаят яма рупатты веӆпасты хоятата мойӆапса ёша-кура маты.

Хутмет хатаӆн Уйтӆор тыӆащн алансахат эӆты ям наяң хатаӆн хоятат Аканьлэвм курта ёхатты питсат. Ай вотрувие поӆас, ям, пеӆңаят па нипируват торас ант версат. Ун катьр ёхтас. Щи катьран леккарат па каш верты хоятат ёхатсат. Меет оӆаңн леккарат веӆпасты ёх вантсат, муш тайӆат ант тайӆат. Каш верты ёх арыты хопалэт понтсат па ай концерт версат. Велпасты хоятата каш ӆув емаң хатӆэӆн. Мужевский сельхозпредприятие кущаят ёхатсат, ӆэтотат па мойӆапсаят тусат. Хуӆ веӆпасты каркам нэңат мохты каӆнаң питаран ун пасан хатчасат. Тувам ӆэтотат ӆэщатты питсат. Хой муй вератӆ, хой муй юр тайӆ иса нётты питсат. Йи хоп каӆнаңа хойс. Щит Юрий Леонидович Артанзеев. Ӆув хоӆпа яңхмаӆ – яӆап хуӆ тувмаӆ. Иймеӆ, Вера Филипповна, пиӆна ӆын хуӆ няхасты питсаңан па нярхуӆ верты. Яӆап хуӆ пеӆа вантман хон ӆыпийн кумийӆ, сам мохты вохты питӆа.

Юрий Леонидович па Вера Филипповна уӆтэӆ хуват хуӆ веӆпасман рупатӆаңан. Тата 1989 таӆ эӆты рупатӆатан. Меет оӆаң Васькаӆоран веӆпасты питсаңан. Ӆын яртьяң няврэм тайсатан: вет пох па няӆ эви. Айтэӆн няврэмӆаӆ ӆувеӆаӆ нётӆат. Хуӆм похӆаӆ антома йисат. Няврэмӆаӆ иса уна йисат. Ӆув семьяят тайӆат. Роман похӆ вуӆы тащ хотатн рупатӆ. Тампуш ӆув отпускан па хуӆ веӆты нётаӆ. Кимет похаӆ, Пётр, ищи хуӆ веӆпасман рупатӆ.

– Ай похием, хиӆыем, па ты ёхтас. Ӆув нэмӆ Лазарь. Няӆмет класс утаӆтыты етшас Ин тата ӆуң-сыс муң хощяев уӆ, сютчаӆ. Па муй сютчаӆ, – няхиӆыяӆ Юрий Леонидович. – Муңев нётаӆ, кашң хатӆ аӆаңсахат нох киӆӆаман па хоӆпат вантыя манӆаман. Ӆув иса хошаӆ. Там хатӆ емаң хатӆ па еша хувшак оӆас, сютчас.

Эдуард Талигин ясталд катрашк таӆаң хуӆм Аканьӆэвм курт уӆмаӆ. Па кашң куртан таӆаң сус унты хоятат усат. Щаӆта ищки хатӆат ёхаттыйн унта вой веӆты яңхсат па онтатар мощатысат. Там йис нуманшак ӆойты куртан камтса хот ӆойӆ, щита няӆ семья улд. Иӆншак ӆойты Аканьӆэвман ищи камтса сохаӆ хот. Хоят шек ар антом. Катра, ястаӆат, кашң куртан порыӆыты хар уӆмаӆ. Уншак хоятат нэман емаң хатӆ кеша тохи пойкатыты па ох понты яңхсат. Нэман катлдам ун па воянг сух йингка ярман шавимелд. Емаң хатӆэӆ аӆансахат па етна унты гуляйтсэӆ. Хоят ар щи порана. Ӆув кутӆаӆн ётсат, кассат па каш версат. Щаӆта Мужи вош эӆты киномеханикат ёхтыӆымеӆ. Кина ант хуват веритсат аӆаңсахат унты ванты. Щикут касарӆысат. Ям пора уӆмаӆ. Иса муй мосаӆ таймеӆ. Там йис па нуша хорпи. Хуӆ шимӆа йис. Йиты ох па шимаӆ сохаптаӆа. Веӆпасты ёх штрафатн понӆаят. Сохаӆ хотӆаӆ ӆыймеӆ. Мотора понты вой ищи шимаӆ маӆа.

– Веӆпасты сыс уӆты сохаӆ хотӆув усаңа йиты питсат. Ӆыпиян щюңатн ай ведраятн нох тахарсув, вусат эӆты тохи ерт-йиңк щорыяӆ. Туняӆ эӆты кущаята потарӆам, хотӆув ӆэщатты мосӆат. Щиты щи хоӆна вусаңа ӆойӆат. Сохаӆ па толь вохсам контора эӆты, хоӆна ӆавӆасӆув, – потарӆ Юрий Артанзеев. – Катра щиты антом вус. Ин муң эӆтэв туп аршак хуӆ мосаӆ. План мосаӆ маты. Там йиты хой рупатты питаӆ. Сишн щи энамты ёх воӆаң там рупата пеӆа ант вантӆат. Моӆха, 2005 таӆтан, ма па Игорь Филиппович Макаров ун штрафатн понтсаюв. Манэм кат милион па ӆувеӆ хоӆна аршак. Хуӆ совхоза масув. Ӆув па машнаятн ун воша китсыӆаӆ. Юш кутапн щи машна катӆам. Щи ураңна муң йиты охӆув иса нох вуты питсаят. Муңев хоты нэрыты, семьяйӆув ӆапатты мосӆат. Ин хоӆна охӆув кашаң тыӆащ сберкнижкаят эӆты нох ёхатӆаят, йи копейка ант хайӆат. Там хатӆ па смска ёхтас. Кущаят па сормат хащсат, ӆувеӆаӆ нэмоӆты штрафтан ант понтсаят. Ин яма уӆӆат. Манэм ин ешауӆ хутъяң таӆа ванамаӆ. Хоӆна рупатӆам, штраф сохаптаты мосаӆ, хоты верты. Ӆаварт-куш. Щиты щи уӆӆув.

Концерт верты еӆпийн яма рупатам хоятат мойӆапса нэпекатн хойсаят. Почётная грамота Законодательного Собрания ЯНАО эӆты мойӆаса Артём Васильевич Лонгортов. Щи тупина няврэмат амаматчет хуӆантсат па ёнтсат. Ӆув ханшты нэпекатн па ӆаңкар-хиратн мойӆасаят. Еша каш верам юпиян иса мояң пасан сурыя омпсапсат па яӆап эпӆаң нярхуӆ ӆэсат па каврам хошйиңк инщсат. Щикут хой шимӆаң рут мир хоятат реестра ант ханштамтас, пуңӆа вохиӆысаят нэпекат ӆэщатты.

Хуӆ веӆпасты вер щит ӆаварт рупата. Сишн щи хоятат хой щита рупатӆ ант тумтака уӆӆат па аршак охан сохаптыӆаят. Кущаят ант нётап верӆат. Щи пораян, мосаң, энамты ёх ищи ямашк нумас понаӆ щимащ рупатая ӆоңты.

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

+ 8 = 14

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!