Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

«Тэрмасьны никытчӧ нин, а пыр пышъя»

Сёрниыс мунас Галина Фёдоровна Урубковалӧн олан туй помлась

«Миян выйим мастерица, код зэй мичаа вурӧ коми ака­ньяс. Тайӧ Галина Фёдоровна Урубкова», – пыр кылi ме народсянь. Ола нин нёльӧд во Мыжыын, но из артмылы тӧдмасьны Галина Фёдоров­накӧд, кӧть и векнин телефо­нам гижлi сылысь номерсӧ. Артмис аддзысьлыны лун кык сайын да тӧдмасьны. Водз гижа кутшӧм менам кыыкӧртӧдъяс мортыс кузя лоисныс тӧдмасьӧм бӧрын, а бӧрвыы, тӧднин, висьтоола Галина Фёдоровналӧн олан туй помлась. Медводдз, мый ме казялi, тайӧ энергичнӧй морт. Кокниа соглашатчӧ выльторъяс вылӧ, татшӧм йӧзкӧд зэй бур рэбитны. Рытнас, телефон пыр, сёр­нитчим аддзысьлӧм вылӧ да кори Галина Фёдоровнаӧс пасьтасьны изьватас пась­кӧмӧ. Вои мӧдасы лунас, видзасим, сьӧлӧм вылам лои кокньыджык – мортыс люмъялӧ, рад менум. – Тэ пуксьы видзӧд журналъяс, сэн ӧтик статья ме гижи, а мӧдсӧ ме помлась, – шуӧ ме­нам сёрнитан ёрт, – ме пока изьватас паськӧмӧс пасьтала. Тайӧ висьталӧ, мый мортыс ставсӧ думыштӧма, лэсьӧд­чӧма, юрас кутӧ сценарий нин. Дельнӧй! Казялi, мый менам ёрт крут, висьталӧ пыр веськыда. Ме думатча, мый сыа медбур мортлӧн черта, татшӧм мортыс оз кучи хусьлысьны и оз пре­дайт, сыа восьса. Лыддьӧ став газетсӧ и бӧрвыы нин сёрни кузя тӧдмалi, мый ёртӧ дзолясянь уна лыддьысьӧма и тайӧ сылы ортсалӧма олӧ­мын. Зэй эддзӧн ставсӧ карӧ, бусьтӧ, кытчӧгӧ колӧ эторни пышйыны. – Пышъя лав­каӧ, мыдзы и ачум думайта, мый нӧ ме пышъя, – серала миян героиня, – менум вед никытчӧ тэрмасьны, тайӧ привычка нин.

Галина Фёдоровна никор оз пууко ӧтик местӧ вылын, пыр мыйӧкӧ велӧдчӧ, лыд­дьӧ, пробуйтӧ.

– Ыстан фотояссӧ смартфон вылам, – горзӧ мӧд жырсянь менум Галина Фёдоровна. – Ог гӧгӧрво, – шуа ме, думай­та, мый тайӧ Мыжыса кыы, кодсӧ ме ог тӧд. – Смартфон вылам ыстан меша, – пет­кӧдлӧ телефон вылас. И ме токо сэк гӧгӧрвои. Галина Фёдоровна зэй современнӧй морт, нылыскӧд сёрнитӧ ин­тернет кузя, видзӧдӧ и лыд­дьӧ став новостьяссӧ. Внукъ­ясыс велӧдӧмась.

Кодъяссӧ сыа зэй нин лю­битӧ. И медча ыджыд кӧсйӧм Урубковъяслӧн ооны сэтчӧдз пока Богдан внукыс, Даша да Злата внучкаясыс эштӧдас­ныс университет. Бура тӧдӧ аслас семъялысь история. И, тӧднин, вурӧ мичасис мича аканьяс. Аканьясыс дыр керкаас оз ооныс, Галина Фёдоровна ставсӧ водясьӧмӧн сеталӧ. И менӧ тшӧтш мича аканьтӧг из лэдзныс.

Ылыс 1941 воын апрель 25-ӧд лунӧ Мыжыын рэ­дитчис Галина Фёдоровна Попова, ӧнi нин вересыс кузя Урубкова. Айыс, Попов Фёдор Петрович, вӧлi слу­жащӧйӧн. Мамыс, Феодосия Фатеевна, сэк вӧлi на том, 17 арӧса, из на рэбит. Айыс мамсис дас арӧн ыджыдджык вӧлӧма. Выйим Вера чой, ӧтик арӧсӧн токо дзоляджык Галинаысь. Олiсныс ныкӧд дедыс и бабыс. «Айӧ пыр вӧлi служащӧйӧн. Вӧлi и рыбкопын председательӧн. Медбӧрын сыа вӧлi воин­комӧн заведущӧй. Октяб 1942 воын врагыс Мӧсква дорӧ матастчыны кучис, армиялы колiс усиленньӧ. Айӧ ставсӧ татысь чукартiс, кодлы позис тыш вылӧ мун­ны. Ачис мунiс тшӧтш. Кудз мамӧ висьтоолiс, народыс зэй уна чукартчис – 3 палубаа параходас. Салехардсянь и матыс сиктъяссысь мунӧ­мась Омскӧдз. Серпасыс зэй страшнӧй вӧлӧма, ставыс бӧрдӧмась. «Миян 1944 воын воис извещенньӧ, мый айӧ усьӧма Западнӧй фронт вылын. Сыа сюрлӧма и Кур­скӧй битваӧ. Вӧлi младший лейтенантӧн. Краснӧй знамя орденӧн наградитӧма. Сыдз ыджыд тышыс босьтiс мен­чум айӧс» – казьтылӧ Галина Фёдоровна мамыслысь вись­талӧмасӧ. Кор эштiс ыджыд тышыс Галиналы вӧлӧма нёль ар, но сыа пӧмнитӧ кудз народыс радлӧмась и сыа дзоляӧ тшӧтш. Пӧмнитӧ, кудз мамыс шуӧма: «Радлам, а айныд никор оз нин во ми доранум».

Сыдз Феодосия Фатеевна кольӧма ӧтнас кык дзоля челядьӧн ки вылас. Галина Фёдоровналӧн дед-бабыс 1945 воын модор югдӧ мунӧмась. Галиналӧн мамыс, 21 арӧн, колис ӧтнас. Мунӧма рэбит­ны колхозӧ, вердны челядьсӧ кудз кӧ колi. Вӧлӧмась коркӧ кӧръяс, но видзӧдны вӧлi ни­кодлы – ныа вошӧмась.

Кӧкъямыс арӧн Галина мунӧма велӧдчыны школаӧ. «Дас во мысьти ӧштӧдi сыйӧ, ӧторни висим, олiм нужнӧя и кольлi, баракӧ, велӧдчыны ӧтик классын кык во. Шко­лаӧ мунiганум асыынас вӧлi кӧдзыд и туч пемыд – ни­кутшӧм битор из вӧ. Мунан и думайтан мед кӧть кӧиныс из сёй. Школаын миянтӧ из вердныс. Пӧмнита, пукалан сёйны мӧдан, эдденджык бы керкаӧ пышйыны, а миян велӧдысь, Антонина Павлов­на Витязева, урокъяс бӧрын кольлiс миянтӧ. Пукалан да виччысян керкаӧ мунӧмсӧ, мед сёиштны нин. Сыа ми­янтӧ зэй бура велӧдiс роч кылӧ. Ми иг зэй бура велӧд­чи школаын, но уна лыд­дьыси дзолясянь. Пач дорын лыддьыся, а мамӧ висьталӧ, мый пачас ӧнi книгаӧс сюяс. Меша сюй, деньга мынтан. Сералiм. Дзолянанум зэй вӧлi сь-кыд песнас. Мыжыысь чаг он вермы аддзыны, сэк вед ставыс ломтысисныс. Коркӧ тӧӧнас мамӧ висис, а сэт­шӧм кӧдзыд вӧлi, сы лунас весиг колхозникъяс турун­ла из мунныс, а ми мунiм Веракӧд песла. Гӧгӧр лым тыртӧма,туй абу. Ме бӧрдны кучи, ог и помнит, гашкӧ, бӧр нинӧмтӧг и воим. Пыр пес ноллiм ас выланум. Миян вӧлi квартирантка Татьяна, школаысь воа и сыкӧд мунам кыдзсӧ да мыйда кералам. Гожӧмнас неводникӧн ваям ношаӧн. Сэк и юмоыс из ты­рмы, а сыдз окота вӧлi сёйны юмотор. Огородӧ петам да бадь карнюсӧ нятшкам. Всё равно вӧлi миян бур челядь­дыр. Миян вӧлi мӧс, чери да яй, тӧднин, из вӧ» – висьто­олӧ челядьдыр помлась Гали­на Фёдоровна.

Культпросвет училищӧын, Нина Петровна Коломнико­ва, 1959 воын медводдзысь восьтӧма «Библиотечное дело» велӧдчан нырвизь. Мыжыӧ волӧма представи­тель и гижалӧма кӧсъысьяссӧ велӧдчыны. Галина Маша ёртыскӧд тшӧтш гижсьӧ­мась. «Ми сэтшӧм полысьӧсь вӧлiм, гашкӧ, из кӧ никод из лок корны – иг никытчӧ и мунӧ велӧдчыны. Сале­хардӧ мунны сьӧм туч из вӧ. Рэбитыштi больничаын санитаркаӧн, копейка босьтi и сы вылӧ мунi. Велӧдчим группаын куш ныыяс зэй дружнӧя», – казьтылӧ люмъ­ялiгтыр миян ёрт. Казьтылӧ и кудз Таисия Алексеевна велӧдысьныс нылы дыня вайлӧма и ныа медводдзысь сыйӧ сёйӧмась. «Таисия Алексеевна воис урок вылӧ апрель 12 лунӧ 1961 воын и мӧдӧ, но оз вермы висьтоо­ны – задыхатчӧ. – Но мый лоис? – юасям ми. – Ой, ой, ой! Наш. Земляк. Полетел. В космос», – юксе миянкӧд героинянум.

Ставсӧ тӧдӧ, и казьтылӧ, и висьталӧ кутшӧм группаын ныыяс вӧлiныс. Нёль во мысьти, училищӧ эштӧдӧм бӧрын, Татьяна Ивановна Белова руководительныс, нуӧдӧма став группассӧ Ле­нинградӧ экскурсия вылӧ. «Сьӧм из вӧ, ми сэк асьнум быдтiм порсьяс, вузалiм и та вылӧ ньӧбим билет. Миян из сетлыныс стипендия, но весь вердiсныс. Кор мунiм поездӧн миян сетiсныс кон­серва банкаяс: сгущёнка, тушёнка. Дзонь вежолун ветлалiм, мичасӧ видзӧдiм», – казьтылӧ студенталӧм кадсӧ миян ёрт.

Училищӧ бӧрын Галинаӧс ыстӧмась Шурышкарӧ би­блиотекарьӧн, тшӧтш куим вонас и клубын рэбитӧма.

Мамыс сы пӧра вузалӧма ассьыс став мича паськӧмсӧ да карӧмась сы вылӧ дзо­ля керка. Босьтӧма рэбита вылын кызь сизим шайт и таысь на сетӧма керка вылас судаӧ быд тэлысь. Галина зэй любитӧма студенталӧм кадӧ да Шурышкарын олiгас волыны мамыс дорӧ керкаӧ, сьӧлӧмас миме вӧлӧма бур­койд.

«Мыжыӧ локтi ооны 65 воын, библиотекарь из коо татӧн и мунi рэбитны садикӧ воспитательӧн. Сы пӧраӧ жӧ Лев Николаевич корис менӧ сьыыны коми чукарӧ. Сыа зэй бур морт вӧлi – ачис и йӧктӧм пуктас, и ворсас, и сььыны велӧдас. Быдлаӧ ми ветлалiм выступайтны. Гажаа олiм, мусӧ видзӧдiм. Сэсся, 1968 воын, воссис архив и менӧ корисныс сэтчӧ. Мунi сэтчӧ. Ветлалi вэлӧсьтъяс кузя материал чукартi, кари опись, лэсьӧдi да ыстi Салехардӧ» – висьто­олӧ Галина Фёдоровна. Сыа ыджыд пай пуктiс Лорвож районса архивлы, кытӧн уд­жалӧма вит во дорӧ. Бӧрвыы вуджӧдӧмась райисполкомӧ заведущӧйӧн. Кучема рэбит­ны депутатъяскӧд.

Сы костi петӧма Геннадий Григорьевич Урубков верес­сайӧ. Тӧдсаӧсь ныа садик­сянь на, бӧрвы велӧдчӧмась ӧтик классын и кудз гозъя олӧныс ӧтлаын нин нелямын окмыс во! Рэдитчӧма Уруб­ковъяслӧн пи – Александр, бэрвыджык ныы – Ольга.

Кык челядьӧн сьӧкыд нин вӧлӧма рэбитны райисполко­мын и дас во мысьти Галина Фёдоровна мунӧма сэтысь рыбкопӧ инструктӧрӧн. Бара жӧ дас во талы сетӧма. Бӧр­выы мунӧма рэбитны челядь библиотекаӧ и пенсияӧдз рэбитӧма сэтӧн. «Библиоте­каын сетiм урокъяс, ордй­ысьӧмъяс нуӧдiм, сценарий­яс гижлiм, рытъяс нуӧдiм, пыр челядьскӧд книгаяссӧ обсуждайтiм. Бура, дельнӧя рэбитiм. Кор внукъяс рэ­дитчисныс, кольчи керкаын нянчитчыны» – люмъялӧ миян ёрт.

Дзоля нук-нучкаясыскӧд нянчитчӧм пӧраыс вӧлӧма зэй шуда, уна быдпӧлӧс историяяс ныкӧд, кодъяссӧ Галина Фёдоровна любитӧ казьтылыны. ӧнi нин бы­дмемась, ставыс олӧныс и велӧдчӧныс Тюменьын. Даша нин велӧдчӧ медбӧр во, лоас архитекторӧн. Бог­дан коймӧд во велӧдчӧ Не­фтегазовый велӧдчанинын, а медча дзоля Златочка велӧдчӧ мӧд курс вылын. Злата лоас серпасалан урокъяс велӧдысьӧн, мамыс моз. Злата дзолясянь бабы­скӧд сьылӧма, быд концерт бабыскӧд сцена вылын югъ­ялӧма. А бабыс радпырысь вурӧма мича изьватас пась­кӧм – быдмыштас да бара выль.

Урубковъяс олӧныс кер­каын, кытӧн колӧ и пач ломтыны, и ва пыртны. Кыкнаныслы нин сьӧкыд тайӧ карнысӧ. Дзоньвид­залунныс абу нин томъ­яскойд. И медча ыджыд кӧсйӧм олӧмас олышны керкаын, кытӧн батарей ачис шонӧдӧ керка, а ваыс локтӧ трубассянь. Но выль керкаяс ӧнi Мыжыын оз стройтчыныс и ыджыдъяс куш паськӧдӧныс киясна­ныс. Ми став сьӧлӧмсянь кӧсъям Геннадий Григо­рьевичлы да Галина Фёдо­ровналы, мед став нылӧн кэсйӧмыс пырис олӧмӧ. Медшӧр, мед вӧлi крепыд дзоньвидзалун и мед, ми аддзысьлам газет листбокъ­яс вылын, кор Урубковъяс кучасныс пасйыны 50 ар ӧтлаын олӧмлы!

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

3 + 5 =

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!