Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Най-Уртаң ху

Last updated on 28 сентября, 2021

(Ханты моньщ)

Имоӆтыйн и нуша ху-лэңкие уӆ. Куш хоты яма рупитӆ па ищипа нуша верӆаӆн ант хайӆа. Щиканща йиңка-ки манаӆ – туп пут каварты арат-кем хуӆ мощатӆ. Унта-ки вой веӆтыя яңхаӆ – ищиты туп-туп пут вертыя араткем вой ёшңаӆаӆа пайттаӆ. Щишан там хатаӆн шитам ӆэтотӆаӆ пахатӆ хоӆаӆат па ин каркам икилэңкие па щи йиңка муй унта мантыя тэрмаӆыйӆ.

Хув муй ван кут нуша хулэңкие щиты ус па имоӆты пушн щимащ ям номасн, етна пелка еӆан норы хуватн щутщатыя оӆман, айӆтыева щи ёхатӆа:

– Муйсыр вер ураңан ма щиты, шук тувман, уӆӆам? Ант рупитсам-ки, ванта, тамащ уӆапса щир шеңк манэма рахас. Муй-кем арат юр па ошщащ тайӆам, щи рупитӆам хоты. Туп щи верэм иса нэмоӆтыя ант ёхатӆ. Тамиты уӆапсаем керӆас, хоӆна еӆӆы уӆтыя кашем иса хоӆ уштасэм. Щи номасӆаӆ пиӆн ин ики так оӆамн ёхатса па щитаӆн япсыена иӆ щи нёсэмасӆы.

Аӆаңсахатн моӆты кумраң сый эӆты нох верӆас. Оӆас, оӆас, щаӆта нох киӆас па ким хотаӆ эӆты этмас. Ин каман тащаң куртаң ёхӆаӆ шуңат тахая мантыя ӆэщатыӆңан: ухӆат паркатӆаңан, япсыена ат сысан щутщам ӆовңаӆаӆ кат хоят щирн нох кирӆаңан. Ин ху-лэңкие еӆӆы пеӆа па щиты, ӆув щираӆн, тамиты нумасыйӆ:

– Аӆпа, тащаң ёхӆув тамхатӆ ай ӆов хот вуса туп тата мосванан паром рутэӆ ураңан нох хортыя вутщиӆңан?

Щи кутан ин уӆв ёхңаӆаӆ потрат хуӆаӆ. Апщеӆ ун яйӆ эӆты инщасӆ:

– Яйе, мосаң, нуша отэмн па тамхатӆ муң пиӆэван хаӆаща патан вохӆэман?

– Щий ат уӆ, апщие! Ӆув эӆтайӆ муй хорасоп ай муй ун онтас муңева питӆ, щит, ма нумастэман, иса нэмоӆтыя ант рахтыя хоятлэңкие?!

Щитаӆн кат яйңан ухаӆңаӆаӆа омасӆаңан, ӆовӆаӆ такан воштаӆңан па ищи куромн ӆый мантэӆ сый ай куртыеӆ хот шаншатн сора ӆап щи хурӆас.

Ин ики-лэңкие ищи сонтамас шуңат тахая яңхтыя па аңкеӆ-ащеӆа моӆты аншуп омасты. Щаӆта ӆув манты ӆэщатыйс па курн тохи щи шушмас.

Хув муй ван кут нуша ху манас, хаӆаща щи ёхтас. Щиканща иӆ ӆойс па йирасты харэӆ пеӆа вантыӆыйӆ: щита тащаң ёхӆаӆ йирэӆ тувмеӆ, нёхи пут кавартмеӆ, порыӆымеӆ па ӆэтыя-йинщтыя питмеӆ. Нуша ху ӆый хощаеӆ ант манас па тый ёхтам юшаӆ пуңаӆн ищиты моӆты ӆэтотаң аншуп омсаӆтас.

Еша уӆӆы ӆув куртаң ёхӆаӆ порыӆыты сый хуӆмас. Тумет па имоӆты ишан, хаӆащн уӆман, шеңк такан потартыя па няхтыя китомтак питщасңан.

Щи вуш морман айӆтыева етная йис. Ёхңаӆаӆ китомтак хоты ратхар пуңаӆн омассаңан, щита щи оӆамн ёхатсайңан. Нуша ху-лэңкие ищиты иӆ оӆты таха ӆувеӆа канштыя питас, нэмоӆты ант уйтмаӆ кеман туп щиты ястас:

– Я-а-а, ма-са рут хоятӆам лепн иӆ оӆӆам-сары, ӆый манэма хун куншемаӆат!

Щи ясаңӆаӆ пиӆн ху-лэңкие лёхиӆам хоятӆаӆ кутн иӆ щи нёсэмасӆы.

Аӆаң хущаӆн ӆув шеңк ищкийн певса, щи ураңан сора нох верӆас, ёхӆы куртаӆа мантыя вутщас. Щиканща ху-лэңки иса щимащ номасн ёхатса:

– Куртаң ёхӆам а муй ёхи мантсаңан, а муй па хоӆна тата хаӆащн оӆӆаңан? Ма хоты щикуш ӆыкан этӆайм па ищипа яңхӆам-сары па ӆынан вантыӆыӆам!

Щитаӆн ӆув тащаң куртаң ёхӆаӆ ванттыя ёхатӆ па туп шияӆаӆ, хоты порыӆыйм ратхар кат пелакн яйңан оӆӆаңан, хонңаӆаӆ пелки ванщамат, суӆӆаӆ хоӆыева ким таӆамат па пут каварты юх оӆңата япсыена ёвартамат.

Щиты там ху-лэңкие Най-Уртаӆан ям сэман вантса. Иса щи вуш эӆты ӆув ар хуӆ па вой веӆпасӆатыя питас па нуша вераӆ таӆаңтэӆн хоӆ ёрэмасӆы.

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

+ 66 = 69

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!