Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Фестиваль «Сокровища Севера» – хон мувев ӆоватн тус хоятат иха актащияс

Last updated on 28 сентября, 2021

Тампуш хутхосьяңмет-пуш Москва воша ёхтыӆысат. Овас мув шимӆаң мур рут уӆапса умасьӆыты па альӆыты ёх

Иса хон мувев ӆоват эӆты хой Овас муватн уӆӆат ёхатсат. Кашң рут хоятат ӆув мувеӆ муй арат веритсат – умасьӆысэӆ па вантапса харн альӆысэӆ: арисат, яксат, хорам туса ёнтам сохӆаӆ ӆумтыӆысӆаӆ, уӆты хотӆаӆ, пормасӆаӆ па эпӆаң ӆэтотӆаӆ этаӆтысӆаӆ. Тампуш муң Ямал мувев хоятӆув па нох питсат. Муң Ӆорвош районэв эӆты хоятат ищи яңхиӆысат. Меет ун пумащипа ястаты мосаӆ ай эвиӆува. Ӆув шеек яма ханты ясаңна арисат.

Мужи вош эӆты яңхсат няӆ эвие. Щит – Марина Клепикова, Виолетта Малофеева, Ксения Нензелова па Алена Никулина. Ӆув айтэӆн фольклорный «Хатӆ най» нэмпи ансамбля яңхӆат па щита ариӆат. Айшак эвиет ищи ариты яңхӆат. Любовь Гавриловна Витязева ариты ӆувиӆаӆ утаӆтаӆ.

– Шеек ям нумасн яңхсув. Выставка-ярмарка пунштыйн па етшаптыйн арисув. Щи тумпина кат ар арисув, щит – «Няврэм сый» па «Акем ар». Эвиңаӆам хоӆна хорамаңа ёнтам ернасат ӆуматӆысат па ты-тохи каремиман мир кутн этаӆтысат. Мастер-классата ищи ӆойӆысат каркам эвиӆам, – потарӆ утаӆтаты нэ Любовь Витязева.

Тамщ лотата энамты хоятата шек ям ёхтыӆыты. Ёӆн-ки рут ясңаӆн ант потарӆат, тамщ выставкаятн ищипа шимӆаң мур рут улапса пеӆа вантман па самӆаӆн понӆат нумас ӆув рут ясңаӆ еӆӆы тутыя.

Ун хоятӆув аӆ щиты ищи ант омасӆат. Ӆув куртӆаӆн рупатӆат па кум шитман сама тайты верӆаӆ еӆӆы туӆат. Номинацияян «Резьба и роспись по дереву» хуӆмет места вус – Геннадий Салтыков, Асов эӆты. Егор Наков Питӆор эӆты ищи мойӆапсаян мойӆыса. Ӆув, номинацияян «Возрождение утраченных традиций», ищи хуӆмет места шитас. Лауреат нэм номицацияян «Лучшее произведение национального народного искусства» шитмаӆ Галина Лобанова, Касым нёӆ эӆты.

Муң Ӆорвош районэвн сэма питам хоятӆув кимет районатн па вошатн ищи уӆӆат. Ищипа ханты мур уӆапса щита еӆӆы туӆат. Па ӆув ищи вантапса хара яңхсат. Сергей Аляба айтэӆн ун хоятат пеӆа вантман кешиян нёхратты питас. Ашкулая манамн иса хошас муй мосаӆ нёхарты па сэварты. Сишн щита ӆув кружок хоща яңхты питас. Самаңа тайты верӆ еӆӆы туты питсаӆӆы. Еӆӆы уншак тахаятн утаӆтыяс, ин па Окружной дом ремёсел хоща рупатӆ. Шеек туса хорт вераӆ, нёхратаӆ па вератаӆ. Ар пуш касапсаятн нох питыӆыяс. Россия хон мувев ӆоватн уйтӆа. Тампуш ӆув па мойлапса шитас. Номинацияян «Художественная обработка кости и рога» ӆув кимет места шитас.

– Муң делегацияев тохи манты ураңна Надымский филиал ассоциацияевн «Ямал – потомкам!» акатса. Ӆаңкара уӆты нэ – Вера Павловна Окотэтто. Щи фестиваль-конкурсан усат каман моӆты номинацияят: выставка ДПИ поныӆысув, уӆты хот этаӆтысув, арисув, яксув, пормасат па ернасат ӆуматӆысув па подиума яңхсув, – ястаӆ Галина Граблевская (Тогачева). Щита муң ишканщап нэпекатн масаюв: Ма хорам сох па ернасат ёнтам ураңан – 2 местая ханапсам, Серафима Анагуричи – 3 места шитас па Алена Анагуричи – специальный приз ёшаӆа митаӆыса. Любовь Ельпина па Ксения Канева диплом лауреата мойӆасаят.

Щи тумпина ӆув арисат па монщь этаӆтысат. «Кукушка» нэмпи монщь вермеӆ па этаӆтымеӆ ур па ханты ясаңна. Щита ӆувеӆаӆ нётты ёхтылысат утаӆтыты похат Надымский колледж эӆты – Иван Анагуричи, Эдуард Анагуричи, Андрей Худи, па ассоциация правление эӆты – Виталий Нахрачев. Яма па ошаңа этаӆтыям ураңна дипломна масаят.

– Щита ун мирна ёхатсат каман-хорпи хоятат Север, Сибирь па Дальний Восток Хон мувев эӆты. Щикем яма арисат па ӆув ясаңна потарсат па яксат. Умащ вантыя, – нумаӆмиман потарӆ Галина Михайловна Граблевская. – Хоӆна муң па ӆоңтысув ур хота. Ханты-Мансиийск эӆты ёхатсат муң рутӆув. Щита пасан омассат мойӆаты хоятат ураңна. Шай инщемисув па потремисув хоты муң уӆӆув па хоты ӆув уӆӆат.

Ёмвош округ хоятат тохи ёлта тувмеӆ сыр-сыр пормасат. Умащ вантыя: ёшна верам пасанат па уӆасат, хув анат, сох эӆты ёнтам сахат, вайят, нюки вайят. Ёшна туса верам вуӆы ухал тохи тувам. Шайпутат па ар-сыр каман-хорпи путат тувамт. Ай няврем оӆты онтап нох тахартам. Иса муй мосты пормасат, хоты ханты хоятат уӆӆат, тувамат. Муй щиран ханты хоятат веӆпасӆат, щи пормасат ищи тусат: яхӆат Аса па ёханата хуӆ веӆты, унта – вой катаӆты. Щи веӆпасты пормасат иса щита этаӆтысӆаӆ! Няврэмат ураңан арс-ыр каман-хорпи ётты отат верамт, щит ищи щита вус!

– Там ун хон Москва воша фестиваля ёхтыӆысат няӆсот хоят хус вет регион эӆты. Вантапса харт ватты па ӆутасты ураңна ёхтыӆысат ун вошна уӆты хоятат. Щит 15 щорс-кем хоят, – потарӆ Галина Граблевская. – Ар-сыр ёхат культураят: Тыва, Бурятия, ЯНАО, ХМАО, Таймыр, Хабаровский край эӆты ёхтыӆысат. Каман-хорпи ансамблят, ариты па якты хоятат вантсув. Щимащ тахаята шеек умащ яңхты па вантыя. Муң ханты уӆапсаев ищи шеек самаңа тайӆэв па яма морта эталтасэв. Па еӆӆы туты питӆэв!

Щиты еӆӆы ханты ясаң па тур-сый туты эвиет Ӆорвош районэв ӆаңкар куща Олег Николаевич Попов ӆув хощаеӆ шай инщты вохиӆысӆы па ӆувеӆаӆ ун пумащипа ястас. Па ун пумащипа ястас ӆувиӆаӆ утаӆтаты нэ Любовь Гавриловна Витязева пеӆа. Ӆув хольмаң моӆтас таӆ ай эвиет утаӆтаӆ ханты ясаңна ариты. Щимащ няврэмат рахаӆ Овас мув тынаң сорнета нэматтыя. Там йис воӆӆы шимаӆ няврэм рут ясаң еӆӆы туӆат. Ат «Хатӆ най» еӆӆы нявремиет ханты ясңа еӆӆы утаӆтаӆ!

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

− 5 = 2

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!