Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Ими хиӆы па порнэ

Last updated on 25 октября, 2021

Владимир Енов

 (Ханты моньщ)

Имоӆтыйн утща мув аватн, утща щуң аватн ими хиӆы щащел пиӆн йис вушат эӆты ияха уӆӆаңан-хоӆӆаңан.

Щиты уӆтэӆ-хоӆтэӆ кутн щащеӆ ими ӆувеӆа тамиты щи потартыйӆ: «Наң, хиӆые, ӆэваса хув тахая хотэн эӆты аӆ яңха!» Щи ясаңӆаӆ ястомаӆ юпийн ин щащеӆ имийн сотпаң карты кешийн юкантӆа, уншъюх эӆты арсыр вой нёӆатн ямсыева верӆа па люмъюх эӆты юхаӆн менытӆа.

Щаӆта ими хиӆы хотаӆ эӆты ким щи этаӆ. Каман тыеӆ-тохеӆ хухатӆитаӆ кутн ворщик шияӆаӆ. Ин щищки и тахайӆ эӆты кимет тахая сора ӆатомтаӆ. Кимет тахайӆ эӆты нох пурӆаӆ па яӆпа ил омасӆ па, ай похие шияӆоман, матты-ки нэман такан-такан ӆуйтыя керӆаӆ:

– Кат кут щев-щев-щев! Тамхатӆ манты юшен нови, хаӆэвт – хой уятӆ?

Ими хиӆы еӆӆы ворщак юпийн ал нюхӆасаӆ. Щиты нюхӆастаӆ кутн ант па моштаӆӆы, муй щирн ӆув ищи куромн атэӆт падл рэп ӆоңӆа нох хуңхаӆ. Щи тахаяӆн хорамаң сорнең ухаӆ шияӆаӆ, иӆ ӆойӆ па щиты нумасыйӆ: «Я-а-а, ма-са щи сорнең ухаӆн еша хататӆиӆом!»

Щиканща сорни ухӆаӆа ӆэӆомтаӆ па рэп ӆоңаӆ эӆты ищи куромн иӆ щи хатомӆ. Иӆӆы пеӆа хатомӆ па караң порнэ имен тонты эӆты вером хинтаӆ ӆыпия щи питӆ.

Порнэ имен, щимащ вер моштоман, такан-такан еӆ няхаӆтаӆ па, нох аматман, щиты нюхмаӆ:

– Ей, хиӆые, ма моӆхатӆ хатӆ вуш унты наңен тата щи ӆаваӆӆэм. Ин ма туса вером тонты хинтэм ӆыпия щи питсан!

Щитаӆн порнэ ими тонты хинт овал ямсыева ӆап тухартсаӆы па ёхӆы пеӆа ун курматн сора-сора шушмаӆ.

Ими хиӆы ӆап тухром хинт ӆыпийн, ияха муңкарӆоман, омасӆ па щиты нумасыйӆ:

– А муй верты ин манэма мосӆ? Муй щирн там караң порнэ ими эӆты еӆ хонтаты рахӆ? Щаха, ант-ки хонтаӆом, ин имемн тата щи ёхи ӆэӆаём!

Щиканща щи номасӆаӆ пиӆн ими хиӆы кешеӆ нох таӆӆаӆы па порнэ имеӆ тонты эӆты вером хинт патэӆ ям ӆоваткем вус унты щи караӆаӆӆы, щи караӆаӆӆы. Имоӆтыйн хинт паты иӆ лакномтаӆ, па ими хиӆы ким навармаӆ.

Ин похлэңки еша хувашак хухаӆмаӆ, иӆ ӆойӆ па караң порнэ имен пеӆа щиты щи уваӆтаӆ:

– Я-а-а, ма, имем ими, щи мантсом наң эӆтаен, щи хонтасом!

Порнэ имен еша-еша ёхӆы пеӆа карэмаӆ па щиты ӆувеӆа нюхмаӆ:

– Я-а-а, хиӆые, манӆан-ки, мана! Кимет пуш ищипа ма ёшңаӆама питӆан!

Щитаӆн ими хиӆы ёхи ёхатӆ па щащеӆ имия иса нэмоӆты ант па ястаӆ. Щиты моӆты уӆтэӆ-хоӆтэӆ кутн щащеӆ ими па щи ӆувеӆа потарӆ: «Наң, хиӆые, ӆэваса хув тахая хотэн эӆты аӆ яңха!» Ими хиӆы щащеӆ ясңата ант па хуӆатӆ. Еша уӆӆы ким этаӆ, юхӆаӆ эӆты нёӆат поса эсаӆтаӆ кутн, па щи ворщик шияӆаӆ. Ин щищки и тахайӆ эӆты кимет тахая ӆатомтаӆ. Кимет тахайӆ эӆты нох пурӆаӆ па яӆпа иӆ омасӆ па, ай похие шияӆоман, матты-ки нэман такан-такан ӆуйтыя керӆаӆ:

– Кат кут щев-щев-щев! Там- хатӆ манты юшен нови, хаӆэвт – хой уятӆ?

Ими хиӆы еӆӆы ворщак юпийн аӆ нюхӆасаӆ. Щиты нюхӆастаӆ кутн ант па моштаӆӆы, муй щирн ӆув ищи куромн атэӆт паӆ рэп ӆоңӆа нох хуңхаӆ. Щи тахаяӆн хорамаң сорнең ухаӆ шияӆаӆ, иӆ ӆойӆ па щиты нумасыйӆ: «Я-а-а, ма-са щи сорнең ухаӆн еша хататӆиӆом!

Щиканща сорни ухӆаӆа ӆэӆомтаӆ па рэп ӆоңаӆ эӆты ищи куромн иӆ щи хатомӆ. Иӆӆы пеӆа хатомӆ па караң порнэ имен суматъюх эӆты туса вером хинтаӆ ӆыпия щи питӆ.

Порнэ имен, щимащ вер моштоман, такан-такан еӆ няхаӆтаӆ па, нох аматман, щиты нюхмаӆ:

– Ей, хиӆые, ма моӆхатӆ хатӆ вуш унты наңен тата щи ӆаваӆӆэм. Ин ма туса вером суматъюх хинтэм ӆыпия щи питсан!

Щитаӆн порнэ ими суматъюх хинт оваӆ ямсыева ӆап тухартсаӆы па ёхӆы пеӆа ун курматн сора-сора шушмаӆ.

Ими хиӆы ӆап тухром хинт ӆыпийн, ияха муңкарӆоман, омасӆ па щиты нумасыйӆ:

– А муй верты ин манэма мосӆ? Муй щирн там караң порнэ ими эӆты еӆ хонтаты рахӆ? Щаха, ант-ки хонтаӆом, ин имемн тата щи ёхи ӆэӆаём!

Щиканща щи номасӆаӆ пиӆн ими хиӆы кешеӆ нох таӆӆаӆы па порнэ имеӆ суматъюх эӆты вером хинт патэӆ ям ӆоват-кем вус унты щи караӆаӆӆы, щи караӆаӆӆы. Имоӆтыйн хинт паты катна тохаӆ, па ими хиӆы ким навармаӆ. Ин похлэңки еша хувашак хухаӆмаӆ, иӆ ӆойӆ па караң порнэ имен пеӆа щиты щи уваӆтаӆ:

– Я-а-а, ма, имем ими, щи мантсом наң эӆтаен, щи хонтасом!

Порнэ имен еша-еша ёхӆы пеӆа карэмаӆ па щиты ӆувеӆа нюхмаӆ:

– Я-а-а, хиӆые, манӆан-ки, мана! Кимет пуш ищипа ма ёшңаӆама питӆан!

Щитаӆн ими хиӆы ёхи ёхатӆ па щащеӆ имия иса нэмоӆты ант па ястаӆ. Щиты моӆты уӆтэӆ-хоӆтэӆ кутн щащеӆ ими па щи ӆувеӆа потарӆ: «Наң, хиӆые, ӆэваса хув тахая хотэн эӆты аӆ яңха!» Ими хиӆы щащеӆ ясңата ант па хуӆатӆ. Еша уӆӆы ким этаӆ, юхӆаӆ эӆты нёӆат поса эсаӆтаӆ кутн, па щи ворщик шияӆаӆ. Ин щищки и тахайӆ эӆты кимет тахая ӆатомтаӆ. Кимет тахайӆ эӆты нох пурӆаӆ па яӆпа иӆ омасӆ па, ай похие шияӆоман, матты-ки нэман такан-такан ӆуйтыя керӆаӆ:

– Кат кут щев-щев-щев! Тамхатӆ манты юшен нови, хаӆэвт – хой уятӆ?

Ими хиӆы еӆӆы ворщак юпийн аӆ нюхӆасаӆ. Щиты нюхӆастаӆ кутн ант па моштаӆӆы, муй щирн ӆув ищи куромн атэӆт паӆ рэп ӆоңӆа нох хуңхаӆ. Щи тахаяӆн хорамаң сорнең ухаӆ шияӆаӆ, иӆ ӆойӆ па щиты нумасыйӆ: «Я-а-а, ма-са щи сорнең ухаӆн еша хататӆиӆом!»

Щиканща сорни ухӆаӆа ӆэӆомтаӆ па рэп ӆоңаӆ эӆты ищи куромн иӆ щи хатомӆ. Иӆӆы пеӆа хатомӆ па караң порнэ имен карты эӆты вером хинтаӆ ӆыпия щи питӆ.

Порнэ имен, щимащ вер моштоман, такан-такан еӆ няхаӆтаӆ па, нох аматман, щиты нюхмаӆ:

– Ей, хиӆые, ма моӆхатӆ хатӆ вуш унты наңен тата щи ӆаваӆӆэм. Ин ма карты эӆты вером хинтэм ӆыпия щи питсан!

Щитаӆн порнэ ими карты эӆты вером хинт оваӆ ямсыева ӆап тухартсаӆы па ёхӆы пеӆа ун курматн сора-сора шушмаӆ.

Ими хиӆы ӆап тухром хинт ӆыпийн, ияха муңкарӆоман, омасӆ па щиты нумасыйӆ:

– А муй верты ин манэма мосӆ? Муй щирн там караң порнэ ими эӆты еӆ хонтаты рахӆ? Щаха, ант-ки хонтаӆом, ин имемн тата щи ёхи ӆэӆаём! Щиканща щи номасӆаӆ пиӆн ими хиӆы кешеӆ нох таӆӆаӆы па порнэ имеӆ карты эӆты вером хинт патэӆ щи караӆаӆӆы.

Хув муй ван кут ӆув карты хинт паты караӆас па кешеӆ катна морэмасӆы.

Щиты ими хиӆы порнэ именан ёхи туса, карты хинт эӆты ким эсаӆса па ӆувеӆ ӆавӆасты партса.

Хув муй ван кут порнэ ими яңхас па еша уӆӆы ун тутъюхаң аӆтэӆ пиӆн ёхи ӆоңас, щохалаӆ аӆас. Щаӆта путңаӆаӆ аӆэмас па йиңк тутыя омлэпа манас. Ими хиӆы па ӆув яңхтаӆ кутн нумасты питас, муй верты ӆуӆн караң порнэңен иӆ охаӆтаты?

Имоӆтыйн ӆув карты порли шияӆас, щитаӆн пиӆн ов нумпелак норма нох хухңхас. Туп порнэ имен йиңки путңаӆаӆ пиӆн ёхи ӆоңемас, хоты ими хиӆы порлийн ӆувеӆ нумыӆта такан юватсаӆы. Ин порнэ ими щих щи ракнас.

Ёхи ёхатмаӆн, ими хиӆы щащеӆа потартас, муй щирн порнэ имеӆ охаӆтас па сорнең ухӆаӆ ёшңаӆаӆа паитсаӆы. Щащеӆ ими па ӆувеӆ тамиты ястас: «Ма кашаң хатӆ щи ураңан наңен ӆэваса хотэн эӆты хува яңхтыя ант эсаӆсэм, ванта, муң куртаң ёхӆав иса щи караң порнэңан ёхи щи ӆэсайт, наң аңкен-ащен – ищи».

Ин тамхатӆ унты ими хиӆы щащеӆ пиӆн щуняң-хоӆаңа уӆӆаңан. Ӆын яңхты юшеӆн йинтоп-ки вощкаӆа – эӆопн оӆаӆ. Хоятат ӆын хощеӆа хатаӆн шушӆат – атаӆн шушӆат.

Ханты лопас ӆэсятас Иван Сандрин. Хорт масат Владимир Енов, Василий Максаров, Елена Лонгортова, Иван Сандрин па интернет эӆты.

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

23 − 17 =

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!