Нажмите "Enter", чтобы перейти к контенту

Варук Еле

Last updated on 8 мая, 2022

Сідз Восяховса вӧлэсьтын шуисныс Елена Егоровна Коневаэс, код вӧйна дырйи кудз и мукед ныыяс пуктіс ыджыд пай Вермем вылӧ Рӧдитчылӧма Елена Егоровна Из сайын кӧрвидысь семьяын. Ай-мамыс кӧрдорсаясэн вӧлэмась. Асланыс вӧлэма зэй уна кӧр. А кор йӧзсэ кучемась раскулачитны, айыс, Егор Иванович Ануфриев, пырас оленколхозэ рӧбитны и став кӧрсэ сетас государствелы. Вокъясыскед нылэн вӧлэма медводь бригада.

Но олӧмыс бергетчис сы пӧраас сідз, мый коомысис Елена Егоровналы оомедчыны Мыжи вӧлэсьтэ. Кӧрдорысь пуксем бӧрас олӧмась Якула Петра керкаын. Водз пыр сетче волэмась гӧсти. Сэк сыа вӧлі дасвит арэса ныы. 1939 восянь кучема оленколхоз кантораын посъяс мыськыны. Вокъяс воде айыс моз жэ пыр ветлалэмась кӧрдорэ. Ыджыд воксэ шуӧмась Митрофан, дзоляджыкьяссэ Эликсей да Петра. Чойыс Из сайэ Щельяюрэ вересса мунлэма. Мыжиыс сы пӧраас дзоля вӧлэма, сулалэмась ляпкыд пу керкаяс. И кудз ачыс казьтылэма: «Сэк Мыжыын нин кино петкедлэмась. Вичкоо местэсэ клуб улэ лӧседэмась, сэн немей кино мунлэма. Ми тай пыр сералім: турунла мунэ – лӧбынсэ вунэдас, пес кероны мунэ – черсэ коляс. Тарухаяс видедэныс да бура и сералэныс. Сэтшӧм и вӧлі киноыс».

Том дырйи пыр ныыяскед да том детинаяскед чукарчылэмась вечоркаяс вылэ, ворсанинъяс вӧлэмась. Водз кодлыке беличасныс, поссэ бура лыаэн мыськасныс, а сесся нин вечорка ӧктасныс. Быдла чукартчылӧмаӧсь, кодлэн керкаыс ыджыджык вӧлэма да код лӧдяс. Сэн пыр сьылэмась, ворсэмась да йӧктэмась. Ворсэмась кругэн, ветлэмен. Сы пӧраас том йӧз кужисныс гажэдчыны. Сідз жэ сэн и тӧдмасьӧмась ёрта ёртныскед.

1940 во вылын оленколхозас зэй уна кӧр чукатчылэма, дёнь сизим стад. Сэк куим стад Ляпинэ ыстэмась, сэтче и мунэма сылэн ӧтик вокыс бригадирэн, а коляс кӧрсэ Обдорскее нуӧмась и сэтче мунэмась мӧд вокъясыс. 1943 во вылын ныэ босьтӧмась Ыджыд тыш вылэ. Сы бӧрын Елена Егоровна сесся неӧтпыр из адзыл ассьыс вокъяссэ, ныа ставныс пуктэмась ассыныс юрныссэ биас.

Тыш дырья Елена Егоровна рӧбитэма мехмастерскейын. Вурэмась сэн ватнэй фуфайкаяс да гачьяс. Ватаыс местэ шырэм гӧн тэчемась. Ыджыд кӧр вольысь вурэмась шубаяс да гӧна вачегъяс. Кӧрыс сэк вӧлэма уна и вольсэ лэтчедлэмась кӧрдорысь эстяк Мыжыэ, сэн Молдас гӧтыр карэма: небзедэма да вуштэма, дась лӧседэма вурсян кежэ. Том ныыяс сэтысь вӧлэн ноолэмась. Бригадирыс нылэн вӧлэма Татьяна Ивановна Свалова рӧднэй тьӧт Тамара Петровна Чупровалэн. Сы пӧраас специальнэй мастерскей абу вӧлэма и вурсемась Макар Вань Петра (Артеев Пётр Иванович) керкаын. Ачыс хӧзяиныс сэк Ыджыдтыш вылас вӧлэма. Вӧйнаэдь сэн вурэмась дӧра паськем, костюмьяс да шапкаяс. Ны костын вурсьысьясэн вӧлэмась: Кат Мишелья Окулина (Филиппова Акулина Ильинична), Истомина Павленья Дмитриевна, Шахова Секлятиялэн мамыс, Артеева Агрипина Никаноровна, Конева (Ануфриева) Елена Егоровна мамыскед да мукедъяс. Сідз 1948 воэдь и вурсемас сы мастерскейас. А мастерскейас на рӧбитыг костас ныа ягын пес керолэмась да вӧлэн лэтчедлэмась райкомлы да райисполкомлы. Сы пӧраас рӧбетаысь из пооныс. Кудз бы сьӧкыд из вӧ – кытче ыстасныс сэтче и мунэныс, рыбзаводын ке ортсооны колэ и сэтче мунэныс, турун ке колэ карны и сэн ытшкысясныс, куртасныс да нооласныс.

1948 во вылын Елена Егоровна петэма вересса тыш вылысь воӧма том морт Василий Петрович Конев сайэ, да мунэ ооны Восяхов вӧлэсьтэ. Пырэ сэк рӧбитны «Гӧрд туй» колхозэ, а бӧрвы и совхозас. Пенсия петэм бӧрын уна воо мыськема клубас пос. Кыпедэмась гозьен квайт челядь, куим ны и куим пи. Уна во сайын нин быри Елена Егоровна, но сыэ пыр пӧмнитэныс и радейтэныс восяховса олысь.

Будьте первым, кто оставит комментарий!

Добавить комментарий

Ваш адрес email не будет опубликован.

89 + = 97

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!