Ас нопатты тыӆащ соханты пораян поснтаӆа меет сама мосты хоятӆув хатӆ – Аңкет емаң хатӆ
Муң Лорвоош районэвн ар умащ па вещкат аңкиет. Ӆув семьяйӆаӆ шек самаңа тайӆыӆаӆ. Няврэмӆаӆ яма энмаӆсат. Ин камтса щимащ вещкат нэңие эӆты еша ханшӆув.
Анастасия Архиповна Максарова сэма питас яӆап тыӆащ оӆаң-мет хатаӆ 1941 таӆн Ёханкуртан. Ащеӆ па аңкеӆ Архип Гаврилович па Прасковья Афанасьевна Аляба хуӆ веӆман уӆсаңан. Анастасия 12-мет няврэм семьяйна уӆмаӆ. Хут таӆ ӆоватн Васьёханов ашкуӆая утаӆтыты манас. Щита няӆ таӆ утаӆтас. Ӆув айтэӆн ащиӆаӆа нётас мис пусты, касаӆты па хуӆ веӆты. Щи тумпина ӆув шек самаӆн еӆӆы утаӆтыты ӆытса. Сишн 1958 таӆн ӆув Пуӆңавта утаӆтыты манаӆ па специальность «приёмщик» шитаӆ. Мохты Мужи вошн рупатая ханшӆтаса па Кушеватский рыбозавода. Щита ӆув шеек самаңа рупатас ишканщап нэпекатн мойӆам па Доска почёта хоща ханшӆтам. Рупата нормайӆаӆ аршака вермаӆ па 110% питмаӆ. Окружной депутата пирыӆыйм па щи рупата щирн съездата Пуӆңавта яңхиӆыяс. Щи тумпина областной съездата Тюмень вошата яңхмаӆ. Щи юкана ар ишканщап нэпекат па грамотаят тайӆ.
1965 таӆн Анастасия Архиповна ху сая Прокопий Герасимович Максаров хоща манмаӆ. Хуӆ веӆпасты вер эӆты вуӆэң ёх вер туты питас. Ӆын ӆапат няврэм энмаӆсатан. Иса вещкат хоята йисат. Кат похӆаӆ вуӆы тащ хотатн рупатты хащсат. Анастасия Максарова почетный книга совхоз «Горковский» хоща ханшман уӆ. Ар ишканщап нэм тайӆ, щит: «Мать-героиня» па медалят «Материнская слава» 2 па 3 степени. Ӆув яма па хорамаңа ёнтасаӆ. Ийкеӆ пиӆн 2020 таӆн поснтасат хоты ияха 55 таӆ уӆӆатан. Почетный знак «За любовь и верность» тайӆатан. Тампуш Анастасия Архиповна сэма питам 80 таӆ юбилей хатӆ поснтас.
Любовь Григорьевна Артеева сэма питас 1961 таӆн Ёхановкуртан. Иса ай порав эӆты ӆув вуӆы тащ пиӆан ванан уӆ. 1980 таӆн совхоз «Мужевский» хоща рупатая ханшӆтаса. Пенсияя манты па 2011 таӆ унты щита рупатас. Еша сютчамаӆ юпина па ёхӆы рупатты манас. Ант вератӆ аӆ щиты йи лотан омасты. Иса мосаӆ молты верты. Вуӆы хотан рупата ар. Иса ханты нэңат хошӆат. Ийкеӆ Андрей Алексеевич пиӆн вет няврэм энмаӆсатан. Ин няврэмӆаӆ иса уна йисат, семьяят тайӆат. Катңан хиӆыӆаӆ энмаӆты нётӆатан. Ин ӆув юшеӆ еӆӆы туӆ ай похаӆ – Пётр. Щит аңки сама меет ям хун няврэм аңки-ащи вер еӆӆы туӆ. Оӆаң-мет тащ МСП «Мужевское» хота ӆув рупатӆат кашң таӆ нох этаӆ. Ӆув меет ямашк тащеӆ шавиӆэӆ па аршак нёха хорӆат. Щимащ каркам нэңат онтасн ёх яма еӆӆы уӆӆат.
