Паӆаңна лап вуям емпасы кеват эваӆт илащ овам йиңкат щелох иты ныӆайт. Хой хантэт эваӆт еӆпи нумасыяс. Муң тащаң Асэв тынаң кев иты волиман хаӆща оваӆ?
Тынаң кев иты волиман кеват эваӆт илащ овам ай тольпайет. Яха питӆат па кат кеваң ёханны илащ нявар сурна овӆаңан. Йи ёханаӆ нэмаӆ Катунь, кимет ёханаӆ нэм Бия. Мета хув ныкащ овсаңан, Бийск вос кат пелак эваӆт ныкащ. Хутъюң километра мантан юпина, яха питӆаңан. Щи юпина муң Асэв этас. Щи ёханңан эваӆт щарас хоща ёхаттаӆ моса, щи хорпи вуӆӆы ӆарпиӆаӆ, йи пелкаӆ хоӆна ант ныӆа.
Хуӆаң тащаң Асэв каман рут нэңхет ӆув эваӆтэӆ хонӆаӆ ӆаптаӆӆат, каман хорпи хопат яңхӆат, вуӆ тутаң хопат. Пормас, ӆытат па тутвой таӆлиӆат. Ӆув кат путараӆ хоща уӆты хиӆыӆаӆ, хуӆ веӆман, атӆ-хатӆаӆ рупитӆат, нявремӆаӆ энмаӆӆат. Асэв муң мувевна уӆты ёх хуӆна ӆапатӆаӆӆы. Алтай омеӆ хорас тэваң уӆтаӆ порайна, ӆув ӆоңӆаӆна манты паӆңат эваӆт нумӆытыӆӆы. Щита ищимащ нави паӆңат. Венс вантат иты Ас ӆоңаӆ хутлияӆ, паӆңат йиңк щар эӆты овна нёхаӆӆаят, ищимет сэңк тынаң щащкан Ас ӆоңаӆна лопкаса.
