Роман Ругин
Сусэн там пуш амуй эӆты еӆшак
Катӆасас па сяӆта ӆыйма йис.
Арсырпия ювантыяӆ веншаӆ.
Нёхлаң хатӆат матты ярас ӆысн.
Ант уятӆэн, хун си кутаӆ сохнаӆ.
Нёхлаң хопаӆ пуңӆа сухтаӆӆы.
Наркамтыты таӆ хун вотэм охаӆ
Мара ювам осма воськаӆӆы?
Муйкем рахаӆ иӆ лунямтам ятан
Хоят ӆыпеӆ кашӆы вертыя.
Ляскатыя матты карты антапн.
Ванты, ант ат хошсан ӆаӆтыя.
Муя симась нопсаӆ усӆы турмен.
Сяӆта муйн сиеӆт хусяпса.
Маты лотна луттасӆы ӆув курмаӆ.
Тахарӆаты симась атам сирн?..
Ма па хоты турам пеӆа ишук.
Метшак кинься лыптаң сусэм леп.
Ащем уӆман, ант ювтыӆысам кевшук.
Атам номас ант ханятсам сепн.
Сикуш уйтӆэм: хоят антам икем.
Тухаӆ отэн сэм ант аӆмаӆ нох.
Ӆув па нопсаӆ – ӆыпеӆ атам сикем.
Нёхлаң сусэн хорпи симась ёх.
Ёхӆы хасьмаӆ ураң си ёх, уӆман.
Ушмасяӆна ат ӆув маӆа ромн.
Пиӆаӆ ям вер паӆаӆна ки хуӆмаӆ.
Веншаӆ сухтаӆ, ӆыпеӆ сутраӆ, хом.
Ӆув урңаӆна иса хоят ям вераӆ,
Ант ат патмаӆтыяӆ яӆап сир.
Менмаӆ ситэн сиӆта хасям ай ӆэр.
Вер ки манаӆ юшаӆ эӆты йирн.
Симась нопсатн ёхтыӆысаям ма.
Артаӆысэм хун ма сусэн ин.
Ханшам отэм ат туп, ӆуӆан, ям мас.
Туңа рахас па ёх самӆаӆ сыӆн…
