Ӆорвош районэвн уӆӆат морт-кем арат тус ёшаң хоятат. Иса муй моӆты верты хошӆат
Тампуш яӆап таӆн айкеӆ ёхтас. Кат шоши ханты хоятӆув: Егор Наков па Геннадий Салтыков почётный звание «Мастер народных художественных промыслов и ремесел Ямало-Ненецкого автономного округа» шитмеӆ.
Аӆ щиты хун. Ӆын хувтэӆн ай пора эӆты нёхратты-вератты утаӆсаңан. Туп ар-сыр куртатн энамсатан па уӆӆатан. Геннадий Николаевич Асов эӆты, ӆув арпелк хуӆ веӆпасты куртаӆн уӆ па щита айнайн хорам пормасат нёхарӆ по хорам хорт ханшаӆ. Воӆаң мутрайң вератты пормас ант тайӆ, ӆайамн па кешийн яма хораң пормасат вераӆ.
Егор Егорович па Питӆор эӆты. Ӆув ищи верантман ай Порават куртыеӆа яңхиӆыяӆ. Щита умащ, катра ханты уӆапса пормасат нох ӆэщатӆаӆы па еӆӆы хоятата этаӆтаӆӆы.
– Ма сэма питсом вуӆы тащ хотан. Яң таӆ унты щита эномсам. Сишн айтэӆн кешийн нёхратты утаӆсом. Щит ай ухӆыет, ӆыйт па ай няӆэт, – потарӆ Егор Наков. – Щаӆта ашкуӆайн утаӆтыман еӆӆы вератты питсам па нумас потсам щи вер еӆӆы туты.
Ашкуӆа етшам юпина ӆув нови тут машнаят пиӆн рупаттыя утаӆтыяс. Щи щирн ӆув пенси унты рупатас. Щаӆта щи юпина хотат верман па рупитыяс. Ин пенсияян уӆман рупатайӆы ищи ант омасӆ. Иса самаңа тайты верӆ еӆӆы туӆ – юх эӆты каман-хорпи пормасат вераӆ па нёхарӆ: ханты анат сунат, хуванат, пасанат, уӆасат…
– Ма ар пормас ӆэщатсам. Ӆуңатты-ки питӆэн, оха ант ёхатӆ. Щиты ма айӆта омасӆам, ротая, нумасман, ант тэрматыӆам, – ястаӆ Егор Егорович. – Сора-сора тэрматыман нэмолты нох ант этаӆ. Оӆаңна унт хуват шушиӆыӆа, хуӆантӆат, сам ӆыпийн ям, умащ. Щалта наңен мосты юх кащаӆыӆен па оша понӆэн, муй ӆув эӆтэӆ этӆ па муй рахаӆ ӆэщатты.
Егор Наков па Геннадий Салтыков туса ӆэщатам отӆаӆ ар-сыр выставкаята па ванты харата китыӆыӆӆаӆ. Москва вошн, Пуӆңаватн па па вошатн рахаӆ ӆувиӆаӆ вантыӆытыя. Фестиваль «Земля мастеровая», «Душа тундры», «Сокровища Севера» па ар-сыр тахаята ӆың яңхиӆыӆтан. Щита ӆув верам пормасӆаӆ умащӆыӆаят, вантӆаят па хоятатн ӆутӆаят. Ат па еӆӆы ӆув щиты рупатӆат па хоятат хорам верам пормасатн амтатӆиӆат.
