Щи куртан Калтась-Аңки луңхат уӆӆат. Ӆув пеӆаеӆ пойкман йир верса
Меет оӆаңн Калтась-Аңки ӆуңхат Калтысьяны нэмпи куртан Октябрьский район Ханты-Мансийский автономный округ хоща тайсаят. Иса хой ванан-хуван хантэт па охалят усат иса щи луңх-имен хоща пойкащты ёхтыӆысат па ой вохсат.
1941 таӆн иса ёх Ун ляля мантсат, па щи товийн ун ийңк ёхтас па иса куртые ӆап вуса. Щи юпина щи куртан нэмолты хоят уӆты ант питас. Хоятат ванан паӆшак тахаян уӆты Муликурта касаӆсат. Щи курт унты ихосьяң километра. Калтысьяны курта туп порыӆыты яңхты питсат. Щалта ахойн щи емаң сорни тахайн накӆат вермаӆ, иса лакки ёвӆамат па нох кертамт. Щи юпина Калтась-Аңки Муликурта тувам, инты унты щита уӆ.
Меет оӆаңн там куртан уӆты питсат Посоховат опращ нэм хоятат. Ӆув уйтсаят хоты ӆув шеек яма паварт хотат ӆонщты хошсат. Сишн кашң семья ям такан омпсам хотан вусат. Хуӆ веӆпасан, вой веӆман па рых акатман уӆмеӆ. Ун воӆаң ляль еӆпина щи куртан ар хоят, сот молтас, вусат. Щита вус интернат, ашкуӆа, нянь верты хот, ӆапка, баня па каш верты хот. Щи пораятн шеек ун вош па хоятӆаӆ яма тэӆаңа вусат. Еша яма уӆман Сталинский репрессияят ёхатсат па яма уӆам хоятат кулаката версаят, тайты пормасат иса нох вусаят.
Шепанат па кимет хоятат хойт паратсаят, хойт еӆӆы Овс мува китсаят. Щаӆта щи юпина Ун воӆаң ляль питчас – тохи па морт-кем арарт ёх хоятат китсаят. Сишн яма уӆам вошые ай куртыя ювмаӆ, уӆты хоятӆаӆ воӆӆы шимаӆмамеӆ па нушая ювмеӆ. Сишн ай куртые эӆты хащам хоятӆаӆ па тахаята касаӆты питсат. Нэпекат эӆты щи куртые воӆӆы нох вуям.
Ищипа па щи куртыенан камтса семья хащсатан, ивевн ёхтыӆаӆт, куртыеӆ ант ёрэмаӆэӆ. Щит Лысковы па Проскуриковы семьяят. Хоӆна тохи пора-пораян хантэт па охалят ёхтыӆат порыӆыты хара па Калтась-Аңки пеӆа пойкащты, ой вохты, ат еӆӆы туматка уӆӆат па няврэмӆаӆ энамӆат.
Щиты тампуш тохи, щи Муликурта, Ӆорвош районэв эӆты хантэт па яңхсат. Яӆаптаӆ тыӆась 24-мет хатаӆ 2023 таӆн Овас шимӆаң рут мир хоятат Совет Ӆорвош район куща эӆты тохи ёхтыӆымеӆ. Щит Степан Петрович Куртямов па Нина Владимировна Озелова. Ӆув уйтантысат хантэт пиӆан хой общественный организация «Спасение Югры» пеӆа уӆӆат. Щит хоятат Ёмвош эӆты, Суматвош, Игрим, Нягань па Карымкары вошат эӆты. Щи кутан Любовь Васильевна Кашлатова, ӆув щи куртан сэма питас па куртаӆ ант ёрэмаӆӆы, иса ханшаӆ, нётаӆ. Щи тумпина Ӆорвош район Овкурт эӆты тохи яңхас Геннадий Степанович Еприн йимеӆ пиӆн. Ӆув ияха Калтась-Аңки пеӆа пойкащсат, порыӆысат па йир версат. Щита ханты ёх хоят ёш мосас нёттыя.
Президент организации «Спасение Югры» Людмила Александровна Алфёрова Муликурт эӆты уӆ, сишн Калтась-Аңки эӆты ант ёрэмаӆ, ивевн нётап вераӆ ханты уӆапса щирт ант ёрэматы ураңна. Сишн ханты уӆапса щирт ант ерэматы па еӆӆы туты ураңна Ӆорвош район хоятӆув пиӆн ямас потремияс. Щиты нумас понтссат – мосаӆ ван кутан ияха уйтантыт па ханты катра порыӆыты щират па емаң хатӆат нох ӆэщаттыя па емаң ӆуңхӆув ант ёрэматы.
