Курк тылащ соханты хатӆатн Ёмвошн Обско-угорский институтн нэпек ӆуңатты хотн вантопса хар пуншса. Щита ханты ученый нэ Федосья Макаровна Лельхова (Лонгортова) ханшам нэпекат ӆарпаман понамт. Там ванан ӆув 55 таӆ поснтас. Сэма питас ӆув Щаня мувн. Вуӆы тащ хотан энмас, сишн ханты рут ясңаӆ айтэӆн торӆы яма уйтӆаӆы. Щиты ӆув нумас понас ханты ясаң еӆӆы туты.
Федосья Макаровна кандидат филологических наук па хантэт филология тахайн Обско-угорский институт хоща кущая уӆ. 1991 таӆн ӆув Хон Петра вошн институт им. А.И. Герцена утаӆтаты етшамаӆ. Щи щирн ӆув учитель русского языка и литературы, хантыйского языка и литературы. Щи юпина ӆув Финляндия мувн Хельсинский университет кафедра финно-угроведения хоща хуӆам таӆ утаӆтымаӆ.
Ӆув ханты ясаң ӆэрамтаӆ, арсыр яӆап верат оӆаңаң нумсан нэпекат ханшаӆ. Щит ханты литература па лингвокультурология. Ӆув ханты ясңев теория щирн ӆэрамтаӆ. Щи тумпина практической нэпекат ханшаӆ.
Там ванан няврэмат кеша ханты ясаңан касапсайт (олимпиада) ӆэщатты щира киника эсӆас. Ӆув Ёмвош округ ӆоватан арсыр этам киникайт редактора па рецензента уӆ. Нэпек хот вантапса харн Федосья Макаровна ханшам па ӆэщатам киникайт шияӆаты рахӆ, щит: «Структурно-семантические типы словосочетаний в хантыйском языке» (2011), «Словарь глаголов хантыйского языка» (2012), няврэмат кеша ӆэщатам учебно-методической нэпекат па па арсыр киникайт.
Хой Ёмвошн уӆ па хой кум шитаӆ тохи яңхты, вантапса хара рахаӆ ӆоңемиты. Щи выставка айкер тыӆащ 27-мет хатӆ унты рупатты питаӆ. Ёхтыӆыяты па мосты киникайт ӆуңтаты! Федосья Макаровна ат па еӆӆы тумтака уӆ па мосты нэпекат ханты ясаң ураңна ӆэщатаӆ!
