Щимащ нэмпи вантапса хар Москва вошн ӆарпиӆыса
Тампуш нийӆхус-мет пуш Москва вошн выставка-ярмарка верыӆыса. Ар-сыр рут хоятат ун Россия хон мувев ӆоват эӆты ияха йи лота ёхатсат. Аратӆ 500-кем хоят 25 регионат хон мувев эӆты. Этаӆтысат хой муй яма верас па верты хошаӆ. Таӆаң вет хатӆ ӆув туса хошты верӆаӆ па самаңа тайты отӆаӆ хоятата альсыӆаӆ. Ункер тыӆащ 28-мет хатӆ эӆты па Аснопатты тыӆыщ 2-мет хатӆ унты мояң хоятат каш версат. Сот хус туса вератты-ёнтасты хоят, хус ариты-якты коллективат па сот етьяң араң-монщаң хоят.
Ямал мувев эӆты ищи ар хоят тохи яңхсат – щит Пуӆңават вош па Тазовский, Красноселькупский, Надымский, Пуровский, Ямальский па муң Ӆорвош районэв эӆты. Ямал мувевн ар хоят уӆӆат хой хошаӆ туса вератты, ёнтасты, ариты па якты. Выставка-ярмарка мойӆапса ясаңна Григорий Ледков пуншас. Ӆув хон мувев сенатор па Ассоциация коренных малочисленных народов Севера, Сибири и Дальнего Востока Российской Федерации хоща лаңкара уӆтыху.
Ӆорвош районэв эӆты ариты па якты коллектив «Ай Ас ёх» яңхсат. Щита ӆув яма арисат па монщ «Нампар Вой» этаӆтысат. Щи ураңна кашаң хоят, хой коллективан уӆ мойӆапса нэпекан «За активное и плодотворное участие в 18 Международной выставке-ярмарке Сокровища Севера 2023 Мастера и художники России» мойӆамат. Щи тумпина кат опи сакңан – Тамара Александровна Пырысева па Наталья Александровна Горшкова – ищи яңхсатан.
Щи выставка хоща хоӆна фестиваль коренных малочисленных народов «Кочевье Севера» уӆмаӆ. Щита конкурс щирн номинацияян «Народный вокал» (сольное испонение) Тамара Александровна Пырысева 3-мет места шитмаӆ. Ӆув кат ар аримаӆ: «Дуня ар» па «Ма аңкием». Ӆув иса уӆтаӆ хуват ариман уӆ. Моӆты-ки вераӆ – арияӆ, моӆты-ки ӆэщатаӆ – арияӆ. Щи арӆаӆ нэпека понӆаӆы па ияха акатӆаӆы. Ӆув арӆаӆ Ӆорвош район хуват па кимет муватн ариӆаят па умащӆыӆаят.
– Ай вош ёхӆан эвие еӆӆы пеӆа па туса арэмия, турэн еӆӆы ӆурыман ат манаӆ, – ханшаӆ Валентина Пырысева.
– Шек ям, ханам нэ! Ариты имев ищипа нох питас. Ханты арсувӆув еӆӆы иса ат хуӆантӆув. Ун пумащипа, аспасипа. Ям номас, – ханшаӆ Федосья Лонгортова.
Щи тумпина туса ёнтасты нэңат ищи ӆув кутӆаӆн этаӆтысат хой хоты ёнтасты хошаӆ. Щиты фестивальн «Этнического костюма», номинацияян «Лучший национальный костюм» Наталья Александровна Горшкова ищи 3-мет местая ханапмаӆ. Ун Россия хон мувев ӆоватан щит шеек ям! Ӆув хорамаң ернасат ёнтмаӆ па нэмн понмаӆ – «Тусаң вератты нэ». Ӆув верам-ёнтам сохӆаӆ «Ай Ас ёх» нэңатан ӆумтамат па хоятата этаӆтамат. Умащ ватты хораман сох пеӆа!
– Антием щимащ ун лотатн нэмолты пораян ёнтам сохӆаӆ ант этаӆтыӆысӆы. Ин Москва вошн туп веӆщи ар хоят сэмата этаӆтас па мохты мойӆапса шитас. Ма аматсам! Ма антием меет туса ёнтасты нэ! – ястаӆ ӆув ун эвеӆ, Елена Рыбина.
Щиты кашң таӆ Ӆорвош районэв эӆты тус хоятат Москва воша яхӆат па этаӆтыӆат хоты ӆув ариты-якты па ёнтасты-вератты-нёхратты хошӆат. Таӆтэӆн ёхӆы ант ёхтыӆыӆат. Ищипа па моӆты местая ханапӆат па моӆты тыңаң мойӆапса туӆат. Ат па еӆӆы щиты уӆ!
