Тампуш яң-мет пуш меет ям нийӆ семья премияятан юкантсаят
Овас муватн катра тэӆн так па ун семьяят уӆӆат. Кашң хоят хоята нётаӆ. Щиты кеншак уӆты. Щи щирн Ямал мувев куща ху кашаң таӆ меет умащшак семьяята премияят мойӆаӆ. Аӆ хун маӆ, мосаӆ ивевн семьяя яма уӆты па кимет хоятата этаӆтыты. Кимет хоятат вантлат па ищи ямашк уӆты уратӆат.
Номинацияян «Творческая семья года» нох питсат семья Рыбиных Пуӆңават эӆты. Илья Викторович па Елена Александровна Пулңаватан ияха уйтантсат па уӆты питсат. Ун похаӆ Игнат 2008 таӆн сэма питас. Ёӆн няврэмаӆ пиӆан омасман, Елена самаңа ёнтасты питас, хоты ӆувеӆ ай порайн аңкеӆн альса. Щи пора эӆты ӆув Пулңаватан уӆты хантэт пиӆан ияха уйтантыты питас па ханты уӆапса еӆӆы альты. Ийкеӆ муй кем веритаӆ иса нётаӆ. Щиты 2017 таӆн ӆув ханты няврэмат ияха актас па «Тут суӆтам» нэмпи фольклорный коллектив верас. Хуӆам няврэмӆаӆ – Игнат, Варвара па Александра – ищи тохи яңхӆат, ханты ясаңна потарӆат па ариӆат. Игнат па Варвара ханты ясаңна верам кинайна «Хон юш. Путь от Оби» ёнтсат.
Семья Рыбиных муй арат веритаӆ иса ар тахаятан, ар лотатн ханты уӆапса этаӆтаӆат па еӆӆы туӆат. Ханты сох нох ӆуматӆат, якты па ариты ищи ӆойты веритӆат. Щи онтасн ӆув Ямал мув куща эӆты премияян юкантсаят. Премияйӆ катсот ветьяң щорс.