Тампуш хащам лапатан Пулңаватан меет каркам касты ёх тынаң мойлапсаятн хойсаят
Ямал мувев ловатан ар хоят ар-сыр касапсаятн юращӆ. Хой муй самаңа тайӆ щитан ешащал. Меет самаңа тайӆа щит ӆохан хухаӆты касапса па Овас мир касапса. Щиты кашаң таӆ Пуӆңаватан акатӆаят меет юураң касты ёх па нэңат.
Ӆорвош районэвн ищи юраң хоятат уӆӆат. Кашаң таӆ районэв эӆты Спортивная элита Ямала хоща хоятӆув хойӆыӆат. Тампуш па Мария Артемовна Куртямова хойса.
Ӆув ашкуӆа пора эӆты касапсая яңхты питас. Щита ӆув сора хухаӆты утаӆтаса, тынщаң сува утӆас ёваӆты па кат курн хой хувашк наварты. Ӆувеӆ меет олаңан утаӆтыты питас Александр Семенович Конев – заслуженный работник физической культуры Ямало-Ненецкого автономного округа. Щаӆта ашкуӆа етшам юпина Мария Пулңавта манас еӆӆы утаӆтыты. Щита ӆув касапсайӆ еӆӆы туты питсаӆӆы. Ӆувеӆ щита утаӆтаты питсат Александр па Денис Лонгортовңан.
Ин Мария – мастер спорта России по северному многоборью. Туняӆ ӆув Россия хон мувев ӆоватан 2 места шитмаӆ. Па щаӆта Кубок России хоща оӆаң места вуймаӆ. Тампуш па Ямал мувев ӆоватан ӆув ухаӆ шоппи 349 пуш навармас.
Ёӆн, Ӆорвош районаӆн рутӆаӆ па ӆухасӆаӆ ивевн Мария эӆты ям айкеӆат хуӆӆиӆат, хоты ӆув па ипуш яӆап местаят щитаӆ па нох питаӆ. Ащеӆ па аңкеӆ вуӆы тащ хотан яңхӆат. Хун кум шитӆат, курта ёхтыӆыӆат па ям айкеӆат хуӆӆат. Самӆаӆн ям, эвеӆ ишакман тайӆэӆ!
