Кашң таӆ Ямал мувев ӆоватн пирыӆа, хой ӆув шоши рут ясңаӆн яма ханшты хошаӆ
Пирыӆаят конкурс щирн – конкурс по присуждению специальных премий имени П.Е. Салтыкова, Л.В. Лапцуя па С.И. Ирикова. Хуӆам шоши рут мир ясңатн ханшты мосаӆ, щит – ханты, ур па селькуп ясңат.
Тампуш ханты ясаңна меет туса ханшмаӆ Венера Яунгад (Перчеда). Ӆув Харсойм курт эӆты Приуральский район эӆты уӆтаӆ. Сэма питас ӆув Охсарка нэмпи вошан. Рупатӆ няврэмат шавиты хотан. Хун кум шитаӆ ханты ясаңн нэпека потрат ханшаӆ. Щиты ӆув вет таӆ моӆтас хащамн ханшам потарӆаӆ ияха акатты питсаӆӆы. Ай пораян ӆув унаңкеӆ Анастасия Степановна Перчеда ӆувеӆа монщат па потрат потартыяс. Щи потрам отӆаӆ нумаӆмаман нэпека понты питсаӆӆы. Щиты ханшам потраӆ конкурса китсаӆы, хота ӆув пирыса. Сишн ӆув мойӆапса ох шитас ветьяң щорс.
Ур ясаңн меет ямашк потар ханшмаӆ Лариса Окотэтто. Ӆув Пуӆңават эӆты уӆтаӆ. Потраӆн ӆув хуӆ веӆпасты хоят эӆты ханшмаӆ, хоты ӆув уӆапса юшаӆ тувмаӆ. Щи потар ураңна ӆув ищи 50 щорс охн мойӆаса.
Селькуп ясаңна меет туса потрат ханштаӆ Нелля Бадида. Ӆув Толька нэмпи вош эӆты уӆ. Ай пора эӆты ӆув шоши рут ясаңаӆ ант ёрэмаӆӆы. Ханшаӆ ванан уӆты хоятӆаӆ па шоши муваӆ эӆты. Ханшам потраӆ нэмӆ «Токый мач» (Толькинский бор). Щи ураңна ӆув ищи 50 щорасн мойӆаса.
Тамщ касапса нэман кашң таӆ верыӆыӆа. Вантӆа муй арат хоят ӆув шоши рут ясаңӆаӆн яма па туса ханшты хошаӆ. Шимӆаң рут мир пеӆа уӆты департамент кашң таӆ хуӆам хоята щимащ премияят мойӆаӆ. Сишн хой тампуш ханшам потарӆаӆ нох ант питсат па хой хоӆна нумас таяӆ ханшты, веритӆат кимет таӆн верам отӆаӆ пирытыя китты.
