Там ԓапатан Ԓорвош район музеян ханты ясаӈна ханшам ԓуӈтарат ԓуӈатсат
Тампуш хуԓмет таԓ хоты Ԓорвош район музеян щимащ каш верты лот ԓэщатыԓа. Меет оԓаӈн хоят шимаԓшак щи ёхтыԓыяс. Щаԓта кашӈ таԓн аршак хоят ханты ясӈеԓ пеԓа ванты питсат, ханты ясӈна ԓуӈатты па ԓуӈтарат утаԓтаты. Там таԓн меет ар хоят вус. Меет ай няврэма вет таԓ, ун хоятат ветъяӈ моԓтас таԓа ювман уԓԓат. Ям хун ияха ԓуӈтарат ԓуӈатԓат ай няврэмиет па ун хоятат.
Щимащ лот нэман ԓэщатты питса, ванты, хоты ханты рут ясӈев ёрэматы питсэв. Ин па хоятԓув щи щирн ханты ясӈев нумаԓматы питсэԓ па няврэмԓаԓ, рутԓаԓ ищи вохԓыԓԓаԓ ханты ясаӈна ханшам потрат ԓуӈатты па утаԓтаты. Щи тумпина ханты ясаӈна ԓуӈтарат ԓуӈатты питсат па рут мир хоятат – рущат, саранат па тувинцы нэмпи рут хоятат.
Жюри хоща омассат няԓ хоят: Дмитрий Тарагупта, Ирина Игнатьева, Вениамин Горяев па председатель Надежда Аляба. Ԓув шеек яма хуԓантсат па умащԓыман потартсат хоты ԓув хувн щи арат ар ԓуӈтар ханты ясаӈна ант хуԓԓисат.
Щиты няврэмат кутан нох питсат:
– 5-6 таԓ – Маша Пирогова;
– 7-8 таԓ – Ксюша Романова
– 9-11 таԓ – Лиза Озелова
Ун хоятат ястаԓат мосаԓ ивеваншак ханты ясаӈн ԓуӈатты, потремиты па щипораян ясаӈ нумман тайты питԓэн. Щиты Татьяна Степановна Романова ястаԓ:
– Няврэмԓам пеԓа нэман потарԓам, ат ханты ясаӈ хуԓԓат. Ин там конкурс ураӈна Прокопий Салтыков ханшам ԓуӈтар таԓаӈ хатаԓ утаԓасув.
– Муӈ па кат хатԓ ԓуӈтар утаԓтасув. Эвем сама уратты питас тамщ тахайн ханты ясаӈна ԓуӈтар ԓуӈатты, – потарԓ Татьяна Куртямова (Конкина). – Манэмн ԓавартшак ханты ясаӈна ԓуӈатты, потарты кеншак. Сишн ун пумащипа ястаԓам хоятат пеԓа хой ханты ясаӈ еԓԓы туԓат.
Па там иты кимет таԓн ияха уйтантыԓув па рут ясӈевн ханшам потрат па ԓуӈтарат ԓуӈатԓув, утаԓтаԓув, ямашк потарты питԓув!
