Тампуш Владимир Лонгортов ун тынаӈ мойԓапса нэмн понам – «Заслуженный работник рыбного хозяйства РФ»
Хуԓ веԓпасты рупата кен антом. Щи рупатая ԓоӈсан-ки ун юр тайты мосаԓ. Рупатаен самаӈа тайты мосаԓ. Щимащ хоят хой рупатайԓ самаӈа тайԓаԓы, хун тарам ищкет, хун каман вотас, хун ертаӈ хатаԓ ԓув ищипа рупатая манаԓ, щит – Владимир Романович Лонгортов.
Ԓув яма рупатты ураӈна ар-сыр тынаӈ мойԓапсаятн па нэпекатн мойԓыԓыса: 2009 таԓн почетная грамота Департамента по делам коренных малочисленных народов Севера ЯНАО, 2011 таԓн почетное звание «Заслуженный работник рыбного хозяйства ЯНАО», щаԓта 2013 па 2014 таԓатн благодарность Департамента агропромышленного комплекса, торговли и продовольствия па 2020 таԓн почетная грамота Департамента агропромышленного комплекса ЯНАО. Щи тумпина районэв ԓоватн ԓув ищи ар ишканщап нэпекатн хойԓыԓыса. Ин па тампуш ԓув меет ун тынаӈ нэмн понам – «Заслуженный работник рыбного хозяйства Российской Федерации». Щи почетный нэм понты ураӈна указ ханшас Владимир Путин, Россия хон мувев президент.
Владимир Лонгортов сэма питас ветмет хатԓ Аснопатты тыԓащ 1957 таԓн. Ԓув ащеԓ Роман Маркович ищи хуԓ веԓпасман па вой веԓман рупатас. Яма рупатам ураӈна знак «Отличник социалистического соревнования рыбной промышленности СССР» мойԓам. Ԓув нэмԓ районэв Книга Почёта хоща ханшман уԓ. Уԓапса юшԓ сора сохнамтас, 29 таԓ туп вус. Хащсат йи похие па вет эвие.
Щи похие, Владимир, ащеԓ юш еԓԓы туты питаԓ. Ин ԓув районэв ԓоватан иса яма уйтԓа. Ашкуԓаян яӈ таԓ утаԓтыйм юпина ԓув 1975 таԓн мохты рупатты Азовский рыбоучасток Горковский рыбозавод хоща ԓоӈас. Щаԓта соԓтана манты пора ёхтас. Тихоокеанский щарас флот хоща ԓув таԓаӈ хуԓам таԓ соԓтан вера утаԓтыяс. Ёхи ёхтам юпина мохты рупатая ёхԓы ԓоӈас па инты унты самаӈа тайты вер ант ёрэмаԓԓы па ант вощкаԓԓы.
Ун йиӈк пораян ԓув Тукԓор нэмпи тахаян веԓпасаԓ. Щит Асов эԓты ветхосьяӈ-кем километра. Щита щи ԓув ащеԓ па ван рутԓаԓ ищи хуԓ веԓпасман рупатысат. Хун йиӈк сорты питаԓ ԓув Ямпан пеԓа веԓпасты касԓаԓ. Тампуш ԓув ищи ԓэщатыяԓ, туп ёӈк туԓа мохты самаӈа тайты верԓ еԓԓы туты питаԓ.
– Кашӈ таԓ йи хорпи антом, хой пораян хуԓ яма артан хойԓ, хой пораян па роман шимԓа йиԓ, – ястаԓ Владимир Романович. – Таԓ пораян Ас йиӈк шакты питаԓ па щи порана хуԓ артан шаканты питԓат па хаԓԓат. Щиты нумԓэм такан артан хуԓат 2007 таԓн Щаня ёханан хаԓсат. Щаԓта айԓта хуԓат энамԓат па уна йиԓат. Тампуш нумастэмн йиӈк аршак катԓасты питаԓ па хуԓ яма ԓэԓ па энамԓ.
Владимир Романович аратԓ 47 таԓ рупатԓ, 3 таԓ щит соԓтана яӈхамн, хащм таԓԓаԓ иса хул веԓпасман рупатаԓ йи тахаян – Горковский рыбозаводан. Щи таԓат-сыс ԓув ар пуш планат нох пайтыԓыяс. Ипуш ԓув ун сух мощатас – 62 киԓа – па рыбозавода масԓы. Щи тумпина ԓув хоԓпата арпуш ун сортат па вушат хойԓысат. Щаԓта ԓув нумаԓмаԓ – яйԓ Андрей пиԓан ноптаԓты хоԓап вощкасат – еша ронам юпина хоԓпаԓ нох шуйԓас, щи арат хуԓан хойм. Щи порана ԓув кат хопан хоԓап эԓты няԓсот моԓтас ямԓоват сарах паватсат. Хоԓна нумԓаԓԓы хоты йи ат-сыс рахас няԓсот-ветсот киԓа мохсаӈ мощатты. Ин щиты-ки ястаԓан ант эваԓԓаян. Катра хоятат нумԓат щи ям пораят. Ин па хуԓ воԓԓы шимԓа йиты питас па планат ԓавартан юр понман нох паватԓат. Щи планат маԓат туп хоятат хой рупатайԓ самаӈа тайԓат. Щи хоятат кутан Владимир Романович Лонгортов.
– Ԓув рупатайԓ шеек яма уйтԓаԓԓы па самаӈа тайԓаԓԓы. Мощатам хуԓат шавиман тайԓаԓԓы потам хота туты унты. Уԓты па веԓпасты ёханат, панат па ԓорат яма уйтԓаԓԓы. Яма уятаԓ хота маты хуԓ маты пораян уԓ па хун веԓпасты рахаԓ. Аԓ щиты ԓэваса нялкат ант кетмаԓ, ԓув уятаԓ хуԓ энмаԓты па мосаԓ, – потарԓ Николай Петухов, генеральный директор АО «Горковский рыбозавод». – Рупатты ураӈн мийм моторат яма шавиман тайԓалԓы. Владимир Романович юр понам пиԓан Азовский рыбоучасток олаӈ местаята ивевана питыԓыяԓ па планԓаԓ иса верԓыԓԓаԓ. Сам Владимир планԓаԓ йи таԓ-сыс кат пушан маԓԓы: 2019 таԓн план щирн 10 тонна – ԓув мас 24 тонна еша антомшак, щаԓта па туняԓ, 2022 таԓн план щирн 10 тонна – ԓув маԓ 18 тонна кем. Щимащ юраӈ па рупата самаӈа тайты хоятат пиԓан «Горковский рыбозавод» кашӈ таԓ план щиран нох этаԓ.
Владимир Лонгортов пеԓа вантман энамты ёх ищи уратԓат самаӈа па такан рупатты. Ин ԓув пиԓеԓан хус вет энамты хуԓ веԓты ёх рупатԓат. Энамты ёх иса муй моԓты ант хошԓат, инщасԓат па Владимир Романович мохты ястаԓ муй хоты мосаԓ верты. Асовн па Ԓорвош районэвн Владимир Романович яма уйтԓа, па ԓув пеԓаеԓ вантман хоятат ямашк уԓты па рупатты уратԓат!
