Школаын велэдчыген, ме гӧгэрам пыр вӧлiныс мича сарафана бабаяс, озыр сосаэсь да бура кӧрталэма бабаюр, выытiныс на хвата. Мыля мен коли сыа юрам?
Салехардын ме кучи ооны кор велэдчи на 2 класстын. Наталь тьӧтэ, мамелэн ыджыд чойыс, изьватас паськем видзис. Ми доранум пыр волiсныс
Салехардса изьватасьяс, рӧдьяс и тӧдсаяс, кодьяс видисныс весь лунэ быдлунья паськем.
Асьныс бабарӧдьяс тавныс косiндзыкесь, провораэсь. А праздник дырья медбӧр воясас воччасныс парчаысь вурэма югьялан сарафаньясэ, мед вӧлiныс моднэйджыкесь важен вурӧма паськемысь.
А вот родьяснум миян Мыжыысь, Казым-Мыскысь… Ныа, Обдорске волыганыс, пасьтоолiсныс пыр зэй важья паськем, кодъяс на вурэмась вӧлэмась, гашке, 19 нэм вылас. Ныа лыдзысисныс мед донаэн.
Эгрэфена, Наталь тьӧтэ, Дань Клавдия – Клавдия тьӧтэ, Ириння тьӧтэ, Анна тьӧтэ и мӧд гӧсьяс – ставыслы нылы, кудз и мамелы мӧд рӧдвужьяскед –«Царство небесное и вечная память», пыр волiсныс карын олысь чойяс дорэ, лунбыд тшай юисныс да сернитiсныс куш изьватас кылэн.
Кыыясыс «мада», «жале», «любее» тон позе кыыны куш кор сюран изьватас кылэн сёрнитысь костэ. Небыд и тэрмасьтэм серниыс топ лолад пырэ. Тон, кор сюра ме изьватас костэ, кыысэ гӧгӧрвоа, мӧда сёрнитны, но сёрниыс оз пет. Тӧднин, колэ изьватас костын дырджык ооны, кыыны кыысэ, сэк и серниыс ло. Мукеддырья кудз верма сёрнита йӧзлы диве вылэ. Сiдз вӧлi Ижмаын, кэн тон сорлалэмась уна современнэй литературнэй кыыясыс, но сёрнитэныс ставыс и быдлаын. И сэк юрад локтэныс кыыясыс, кодэс корке челядьдырья кыылэма.
А медча бур мен кӧрдорса изьватас костын, кодьяс бура, сӧстэма сёрнитэныс ас кыынаныс. Только ныа зэй эдде, тӧрмасемен висьталэныс, и мен сьӧкыд миме гӧгӧрвоны.
Мен зэй лӧсялэ ветлыны Харсаиме Полина Егоровна Филиппова ордэ. Ачыс сыа на виде изьватас паськем, только сос местэ виде «японка». Пока на ог тӧд мыля сiдз шуэныс. Сылэн ай-мамыс вӧлӧмаӧсь кӧрдорсаяс и ачыс ньыкытэн абу велэдчылӧма. Керкаас на сулалэ пач, кодэс ломтэныс пескен и сэтшэм шоныд сэтысь локтэ. Сэн жэ пӧжалэ ачыс чери кулебакаяс, да вотыса шаньгаяс.
Ачыс Полина – зэй бур, рам, пыр люмялысь морт, ас мича небыд сёрнинас кыске ас бердас быдэнэс. Кудз и водз челядь дырья олӧмын изьватас костын, сiдз и ӧнi Полинакед орча, пыр сьӧлэм вылас лоӧ шоныд да бур.
Пыр бур кылэн висьтолэ сыа ас челядьыс помла, кодьяслэн нин асланыс семьяяс. Переживайтэ, мый бырэ важья олӧмыс, и куш тэ тон верман висьтоолыны нукьяслы кудз важэн тӧлка да бура олiсныс важья йӧз вӧрваыскед орча, сёрнитны чужан кыылэн, и доньёны олӧмсэ сьӧм вылэ видедтӧг.
Но и велэдны бура ооны – сыа бара же став кӧлена ай-мамлэн мог.
Кор петан Полина керка дорэ, тэ водзад паськедчас тӧлоо Обйыс, кытысь позе аддзыны кудз черикыйысьяс да вӧралысьяс бураньясэн керканыс локтэныс. А гожэм – сыа паськыд Обь – матушка, код вердэ чериэн и ваӧн тав йӧзсэ, код олэ сы креж вылын. Ме кудзке думыштi – мыля сыа сiдз менэ вӧрзедэ? И бара син водзам челядьдыр олӧме. Мен вӧлi 1-2 ар, кор ноолэдлiсныс менэ Мыжыӧ и сёрнитi Варе бабекед – маме мамкед. Пӧмнита куш, мый керкаыс вӧлi пемыд керйысь карэма, джуджыд содвыа и турун виж туруныс, а ылын тыдалэ – ыджыд юыс.
Кор ме нин быдми, визьлалi карточкаяссэ, казялi, мый керкаыс и содвылыс вӧлiныс из ыджыдэсь, мый дзоля Обйыс абу сэтшэм паськыд, кудз Харсаим дорас. Сыа ме вӧлi дзоля, а изьватас олӧ- мыс вӧлi ыджыд, мада да бур.
Дельнэй, мый медводз сарафаныс, кодэн ме выступайтi, «Обдорянка»сьылысьяс костын, вӧлi Варе бабелэн – Варвара Егоровна Рочевалэн. Сыйӧ мен сетiс Наталь тьӧтэ, кодлы сарафаныс вӧлi ыджыд, а мен – джэньыд. Но ме став сьӧлӧмсюм ставыскед тшӧтш сьылi зэй тӧдса и кокни сьылан кыыясэн «Ачум садсэ ме садитi…», «Пемыд ягын ныы ветлалэ…», «Паськыд гажа улича, улича…» и мӧдьяс.
90-эд воясас ми иг верме босьны мича тӧвар, мед вурны бур озыр сарафан. Коомысис корны Салехардса изьватасъяслысь, сарафаньяс том «артистьяслы» вӧлiныс джэньыджыкесь. Энi вед томьяс дзонен ыджыд тушаэсь.
И вот, корке вурисныс миян сцена вылэ петан паськем. Салехардса атэльеас, кытче петi округ шӧрса культура керка, зэй бура вурисныс, кудз йӧзлысь культурасэ вылэ кыпедэмен.
Киподтуйя йӧз бура аддзисныс кудз важэн вурлэмась да сы кузя и вурисныс. Петi зэй бура.
Асьыд изьватас паськемтэ ке пасьталан, ачыд топ и мэдэн лоан.
Ме тӧдмалi, мый «сарафан» кылыс персидскей кыылысь аркмема «почетнэй паськем», нылэн сыа бур паськем ноолан рӧд. Сiдз и выйым.
Сарафаннас бабарӧдыс ветлалэ пыр ньӧж, тӧрмасьтэг, юрсэ вылэ кутэмен, бабаюрыс ветче нылысь юрсиныссэ. Мича рӧма чышьяныс на кыске ас динас. Сосыс паськемыслы сетэ унджын мичсэ, озырлунсэ. Сэтшэм паськема мортыс пыр йӧз костас кыпедэ вылэ, сетэ уважене. А кор изьватас кылэн сернитыгас висьталэ на «мадаэ», «дона», «жале» – сэк сьӧлэм вылад лоӧ сэтшэм бур да шоныд и пыр юрад локтэ сэк аслад челядь дырья воясыд, код сетiс менум олӧм, мед ме верми топта сулоны ас кок вылам да тӧдны ассюм вужьясэс.
Татьяна Гостюхина.
