Илья Ефимович Лонгортов – ляль порайн рупитам няврэм Тата ма ащикем шуӈат эԓты каматса ясаӈ ханшсам.
Илья Ефимович Лонгортов – ляль порайн рупитам няврэм, Овс муван хув рупитам хоят. Ветеран труда па ветеран Ямала, Ԓорвош район ям хоят – Почётный гражданин Шурышкарского района – нэматан юкантса.
Ащикем вуԓы хотан 1927-мет таԓан ункер тыԓащ ветхощъяӈмет хатаԓан сэма питас. Ащеԓ – ханты, Ефим Никитич Лонгортов, антеԓ – охаль, Анна Степановна Новьюхова. Ефим Никитич па Анна Степановна ԓапат няврэм энмаԓсаӈан, ԓув кутԓаԓан Илья няԓмет няврэма ус. Энамтаԓ хуват, ԓув ащеԓа вуԓы шавиты нётас. Илья Ефимович няврэм порайн ун хоятат кеман рупитас.
Хоты ащикем потартыйс: «Воԓаӈ Ляль порайн няврэма уԓмеман, ёх пиԓан Пулӈават вош унты хуԓ, нёхи вуԓэӈ ухаԓн таԓсув. Ёхԓы мантэван, вош мохет ураӈан нянь верты ԓант тусув. Ԓуӈ порайн Кеван вуԓэт шависув. Хоԓна ляль таԓатан вой веԓман усув».
Ныйем Любовь Ильинична Рохтымова каматса ясаӈ ащеԓ эԓты ястас: «Ащем 1950-мет оԓаӈ таԓатан колхоз «Верный путь» яртъяӈмет тащ хотан вуԓэт шавиман рупитты питас. 1961-мет таԓан совхоз «Мужевской» верса. 1960-мет таԓ эԓты 1985-мет таԓ унты яртъяӈмет тащан кущая рупитас. Щита кущая уԓмаԓан, ԓув тащ шавиты ёхԓаԓ иса яма рупитсат, тащаԓ кашӈ таԓ норма хуват яма манас. 1977-мет таԓан яртъяӈмет тащ шавиты ёх кат щёрас пеԓа хольмаӈ няԓ вуԓыхорсат. Нёхеԓ няԓъяӈ пеԓа хуԓам тонная хойс. Тащ шавиты ёх ԓаварт уԓапсайн, щит шеӈк ям рупата. 1985-мет таԓ эԓты 1988-мет таԓ унты ԓапатмет тащан вуԓы шавиман ус. Ащем вуԓы шавиты рупата верат шеӈк яма уятсаԓԓы па энамты ёх вуԓы шавиты утаԓтасԓы. Щи юпийн пенсияя манас.
– Нык охаԓмаԓ юпийн, Илья Ефимович Овкуртан хот верас па Хорьер куртан паварт хот омпсас. Хорьер куртыеԓан уԓты питас. Кашӈ таԓ вуԓыԓаԓ утщая катԓысԓы. Куртаԓ пуӈаԓан вуԓы хот ԓонщиԓыйс па щи лепан таԓ хуват каԓаӈԓаԓ шавиԓыйс. Ԓуӈан куртаԓан хуԓ веԓман ус, – ястас Любовь Ильинична. – Ащем вещката па каркама рупитмаԓ ураӈан, яртъяӈ меваԓ посан па ар ишак нэпекан мойԓаптаса».
Ащикем Илья Ефимович па антимем Елена Андреевна Лонгортовӈан (эви опращ нэмаԓ Тогачева) хут няврэм энмаԓтсаӈан: хуԓам эви па хуԓам пох. Няврэмԓаԓ кутан, вет хоятаԓ вуԓы шавиты рупата пеԓа мантсат. 2013-мет таԓ щёхар тыԓащ хус ветмет хатаԓан ащикем антома йис.
Илья Ефимович Лонгортов хув, ԓаварт уԓапса ус, щи юкана ԓув иса нопсаӈа па вещката ус. Муӈ – ԓув няврэмԓаԓ, хиԓыԓаԓ па хиԓы няврэмԓаԓ иса ԓувеԓ ям ясаӈан нумты питԓэв.
Валентина Рохтымова ханшам потар.
