Рут мувеԓ ԓаваԓман Воԓаӈ ляль порайн ямкем ар ханты ёх паратса. Там 2025-мет таԓн, ванта, щи вер сохноптом эԓты аратэԓн 80-мет таԓ щи питаԓ. Щи вер ураӈан, ма щирэмн, мосԓ туӈа-щира, ар-пуш ям па хорасаӈ ясаӈн муӈ акиԓав муй опращԓав нумаԓматы, мата хоятат щи Воԓаӈ ляль таԓатн рут мувев ԓаваԓты па шавиты мантсат. Щит муӈ пуляӈ рута щира ԓуӈтасты ху ёхԓав, муйсыр хоятат арпелак хоԓна рущ ясаӈан ямсыева потрэматы ант па хошсат, лялясты щирата ищиты кущайԓаԓн туӈа-щира ант па утаԓтасайт.
Ар ханты ёх щи ляль таԓат порайн Асэв хуватн уԓты хуԓ веԓпасԓаты тахайт эԓты Воԓаӈ ляля ияха акатсайт па нум муватн уԓты лялясты харата тусайт. Тухаԓ ёхат щи кутн рут хоятԓаԓ пиԓн ямсыева хащом щосатн ԓый щирэԓн хоԓна вантастыя ант верытсат. Арпелак хатнэху арсыр ляль харн паратсайт. Тухаԓ хоттэԓ ёхԓаԓа кушкепа похоронка нэпек айкеԓат китсайт, кимет хоятат эԓты кущайт туп ханшсат, хоты ԓый рутԓаԓ-щирԓаԓ ляль харатн иса уштасат. Шеӈк шимаԓ хатнэху щи ляль харат эԓты ԓый рут мувԓаԓа ёхԓы пеԓа ёхтас.
Воԓаӈ ляль порайн 1941-мет таԓн немщат арпелак эԓты Ленинград нэмпи вош ԓап вусат. Еша юхатшак щи таԓ мет ёхи хащом ван хатԓап тыԓащн муӈ Красной Армия куща ёхԓав номас версат, хоты щи ун вошеԓ пуӈԓат немщат эԓты иса сыстамтатыя мосԓ. Щи ураӈан Мясной Бор ай куртые лепн Ленинградской область мувн ԓый арпелак немащ соԓтанат паратсат па хащом отԓаԓ еԓшака нюхаԓсат. Юхат фашистат эԓты сыстамтом тахая Второй ударной армияйн Волховской фронтан лялясты куща ёхат па соԓтанат ёхатсат. Ԓый сора-сора Любань нэмпи уншак вошеԓ унты мантыя питсат.
Щиканща Красной Армия ёхԓава нэмоԓты тахайт эԓты нётопса иса антом ус. Щимащ ԓавартаӈ вер ураӈан ун кер тыԓащн 1942-мет таԓн Мостки, Мясной Бор па Спасская Полисть нэмпи ай куртыет пуӈаԓн муӈ ёхԓув арпелак эԓты немщатн муй па испанской Голубой дивизия соԓтанатн ԓап вусайт. Красной Армияйӈ ёхԓав щи ԓап вуём тахаеԓ эԓты щукаш ар щирн нох питты вуратсат па ищипа ант верытсат. Щи ун ляль харн Волховской фронт Второй ударной армия кущайт па соԓтанат арпелак хоԓыева паратсайт па ԓыԓӈа хащом ёхат юхат сыр-сыр концлагерята ԓавартаӈ рупатайт ԓэщатты фашистатн китсайт.
Тамхатԓ ма вутьщаԓом ханштыя, муй щирн щи Любанской операция вером таԓатн ма пуляӈ акем ики Гавриил Максимович Енов па немщат пиԓн тарма лялясас. Ԓув щи ляль харн ищиты немщатн муй испанцатн паратса. Там вер еԓпийн ма газетая ханшиԓысом, муй щирн муӈ Енов рут ёхԓав эԓты тамащ Воԓаӈ ляля таԓаӈ нийԓ хатнэху вохса. Ԓый арсыр тахаятн ляляссат па иса хоԓыева паратсайт. Щи ураӈан ёхи рут мува нэмоԓты хоят иса ант па ёхтас.
Ёхи хащом таԓатн Югра мув округев военной комиссариат муй па «Память народа» сайт хуватн оша версом сыр-сыр манэма мосты айкеԓаӈ нэпекат.
Щи нэпекат хоща ханшман, хоты Гавриил Максимович Енов 1921-мет таԓн Машпан куртан Суматвош уездан сэма питмаԓ. Щаԓта па Катра Тэк куртан ԓув хощаеԓа рут хоятат уԓмеԓ, щит: ԓув иймеԓ – Наталья Николаевна Енова (щи онтасн оша йис, муй щирн Воԓаӈ ляль еԓпийн ԓув щи Катра Тэк курта уԓты манас па щата нэ тус); ԓув яйԓ ики Василий Максимович (яй тайс, мата ху ищи ляльн паратса); щи тумпийн, Катра Тэк хоща ԓув опеԓ ими Екатерина Павловна 1913-мет таԓн сэма питом нэӈаԓ уԓмаԓ, юхат ищи сорма питмаԓ.
Мосԓ ястатыя, хоты акем ики Гавриил Максимович Енов иса Катра Тэк курт Суматвош район военной комиссариатн Ханты-Мансийской национальной округ Омской область мув эԓты 1941-мет таԓн лялястыя вохса. Ԓув и тахайн 458-ой полк 24-ой гвардейской стрелковой дивизияйн Волховской фронтан служитас.
Еԓԓы архив нэпекатн тамиты ханшман уԓ: «Гвардии рядовой Енов Гавриил Максимович иса ай тахет потты тыԓащ 7-мет хатԓ 1941-мет таԓ вуш эԓты сыр-сыр тахаятн вещката па апраӈа лялясас». Мет ёхи хащом архив нэпекатн ԓув эԓтайԓ ма туп тамащ айкеԓат ԓуӈатсом, хоты па муй щирн ун кер тыԓащ 7-мет хатаԓн 1942-мет таԓн ԓув Любанской наступательной операцияйн лялясман немщатн муй па испанской Голубой дивизия соԓтанатн паратса. Гавриил Максимович Енов Спасская Полисть (па щирн, па иса Глушица нэмпи ай куртые лепн, унт хоща), Чудовской районан Ленинградской область мувн иԓ лоттаса. Щаԓта юхатшак щи тахайԓ эԓты ԓув эԓаԓ муйԓ нох вуса па Мостки куртые пуӈаԓн иса яԓпа ԓэщатом «Любино поле» мемориалн Чудовской районан Новгородской область мувн кимет пуш ямсыева иԓ лоттаса, ԓув нэмаԓ ищиты нох яԓоп мемориал кев хораса ханшса.
Владимир Енов ханшам потар.
