Ун кер тыԓащ 28-мет хатԓ эԓты па Ас нопатты тыԓащ 2-мет хатԓ унты Москва вошан ВДНХ вантапса харатн ХХ Международный выставка-ярмарка «Сокровища Севера. Мастера и художники России – 2025» ԓарпиԓыса.
Вуԓэӈ ёх уԓапсая постам хар пуншман уса. Щита аратаԓан альсайт, муй хорпи хотат Овс мув шимԓаӈ мир ёх тайԓат. Мойӈ хоятат верытсат хуԓ па нёхи эԓты верам ԓэтотат уӈԓа хойԓтыты, ԓавемиты.
Вантопсая ёхтыԓыйм хоятат таԓаӈ ԓапат хуԓантсат, вантсат, яксат, ԓутассат па тынассат. Ёшн верам пормас тэԓыя, патэԓ ант ныԓа. Хус регион эԓты хоятат ԓув туса вером отԓаԓ алиԓысԓаԓ.
Кашӈ мув сыԓ ԓув тус ёшаӈ верантты ёх мойӈ хоятат кеша мастер-классат тусат. Утаԓтасԓаԓ, хоты сахат мосаԓ сак каратты, ԓов эԓты пормас нёхарты, щашкан па пунаӈ сох эԓты ёнтасты. Щи тумпина арисат па яксат.
Щиты хус регион кутан муӈ Ямал мувев хоятԓув оԓаӈ места шитсат. Ԓорвош районэв эԓты тохи ищи яхсат – Галина Артанзеева, Любовь Витязева па ԓув няврэмԓаԓ «Хатԓ най» пиԓн.
