Щимащ нэмпи Горки вош ариты коллектив 20-мет таԓ поснтас
Хус таԓ хащамн, 2005 таԓн энамты эвиет па вошаӈ нэӈт каш верты хота ариты ёхтыԓыты питсат. Ԓув щи вер самаӈа тайԓэԓ. Щиты айнайн ариты хоятат аршака йиты питсат. Меет оԓаӈн «Сорнеӈ най» хоща куща нэӈа ус Ирина Ершова.
Кимет, 2006 таԓн куща нэӈа пирыԓа Любовь Русмиленко. Ԓув ар юр понас коллективаԓ ураӈна, ар арат мощатас, хоятԓаԓ ияха актыԓыйс.
Ар таԓ сыс хой хоятат ёхтыԓысат, хой хоятат пуӈԓа маныԓысат, туп хой ханты ар па рут ясӈаԓ самаӈа тайԓаԓы инты унты кум шитман ариты хара ёхтыԓыԓат. Щи тумпина хоятԓаԓ ураӈна амтатԓыйԓ, ԓувиԓаԓ ияха актыԓыйԓ, ԓувиԓаԓ ариты лотата па ар тахаята китыԓыйԓ – щит коллектив куща нэ.
Ин ариты нэӈат ияха актыԓыйԓ Лидия Райх. Ԓув ар-сыр концертатн, каш верты тахаятн рупатԓ. Ԓув шеек ям ясаӈ потарԓ нэӈԓаԓ эԓты, хой ариты тахая яхԓат. Ԓувиԓаԓ иса ияха ханты аратн таԓаят. Ариты ёхтыԓыԓат ар-сыр нэӈат, ԓув сыр-сыр тахаятн рупатԓат, хой уншак, хой айшак, хой пенсияян уԓ, хой веԓщи утаԓтыйԓ. Ԓув ар таԓ, ёԓн верԓаԓ хайман, клуб пеԓа репетицияята хухаԓԓат.
Кум шитман ԓув ищипа ар-сыр конкурсата па фестивалята яӈхԓат. Ԓорвош районэв па округев ԓоватан яӈхиԓыԓат. Хус таԓ сыс айнайн арԓаԓ 200 лепа хойсат. Па еԓԓы ԓув яԓап арат ханшты питԓат, па яԓап арат ариты. Кашаӈ тахаян хота ԓув арисат па ипуш тохи ԓаваԓԓаят. Арт тумпина ԓув ханты уԓапса этаԓтыԓат па монсят мосьԓат.
Хуԓам таԓ хащамн, 2022 таԓн ԓув мойԓапса шитсат – диплом лауреата 1 степени номинацияян «Театральное творчество» направление «Театрализованная сказка» Пулӈаватн Окружной центр национальных культур хоща. Кат таԓ хащамн, 2023 таԓн «Сорнеӈ най» нэӈиет Международный фестивалян «Душа тундры» дипломн лауреата 2 степени номинацияян «Аутентичный фольклор» (ансамбли) юкантсаят.
Ункер тыԓащ 5-мет хатаԓн Горки вош каш верты хотан «Сорнеӈ най» сэма питам хатԓэԓ кеша концерт «Музыка Севера» ԓэщатсат. Депутат Районной Думы Екатерина Дитц мойԓапсаят мойԓас па ям ясаӈ ястас. Щит тумпина Ассоциация «Ямал-потомкам!» эԓты Дмитрий Тарагупта мойԓапса ясаӈ па мойԓапсаят китас.
Щи етнайн ариты нэӈат хоԓна ар мойԓапсайн па ям ясаӈн китсайт! Ат па еԓԓы ханты ар сыйемийԓ!
