Щимащ нэмпи ариты коллектив Асов курт эԓты сэма питам хатԓ поснтас
Щи ханты фольклорный коллектив Асов куртан 25 таԓ хащамн Ворӈа емаӈ хатԓ сыс сэма питас. Па ԓув инты унты шоши хоятԓув кеша ханты арат акатԓат па каш верман ариԓат.
Меет оԓаӈн ԓапат эви ияха актыԓысат па Ворӈа хатԓ ԓапат мет хатаԓ ункер тыԓашн поснтаԓа. Сишн щи нэм «Ԓапат эви» воԓԓы тохи торԓы тыйс па инты унты щи ԓув хоԓна уԓԓат. ԓув хощаеԓ ёх хоятат па яӈхты ариты питсат. ԓув няврэмԓаԓ па патан яӈхԓат па ханты ясаӈ хуԓԓат. Щит шеек ям хун энамты няврэмат рут ясаӈ хуԓԓат.
Кашӈ емаӈ хатԓ кеша «Ԓапат эви» яма ԓэщатыԓат па ханты арԓаԓ утаԓтыԓԓаԓ. Емаӈ хатԓат кеша ԓув ияха актащиԓат, ариԓат, каш верԓат. Щи тумпина районэв ԓоватан па яӈхԓат па ханты арт ариԓат. Па еԓԓы районэв тумпина ищи яӈхиԓыԓат па ханты уԓапса этаԓтыԓат.
Ворӈа хатаԓн ԓув Асов каш верты хотан творческий юбилейный вечер версат «Нам 25» нэмпи. Ёхтам мояӈ хоятԓаԓ кеша ԓув каш версат — арисат, монсят монсьсат, амаматсет ԓуӈатсат. Кашӈ хоят умащԓыман хуԓантсат па ёнтсат, па щи ураӈна мойԓапсаятн мойԓысаят. Етна пелка ԓув тэԓаӈ пасан хатчасат па няхман, потарман сэма питам хатԓэԓ поснтасэԓ. Ат па еԓԓы ԓув ханты арт туԓат па тумтака уԓԓат!
