Яр-Сале нэмпи вошан туса нёхратты ёх кассат, Хой мет ямашк хуԓ па нёха ԓэщатԓ
Ямальский район Яр-Сале вошан район ԓоват Вуԓэӈ ёх емаӈ хатԓ хащм ԓапат сютчаты хатԓатан поснтаса. Щита гастрономический конкурс «Ямальская строганина – 2025» ԓэщатыса. Тохи аратԓ округев эԓты яӈ хоят касты ёхатсат, щит: Яр-Сале, Новый Порт, Панаевск па ԓорвош районэв эԓты.
Тампуш эԓты кашӈ таԓ тамщ касапса Вуԓэӈ ёхемаӈ хатԓ сыс верыԓы – ты питла. Щиты аршак хоятат ар-сыр муват эԓты ёхтыԓыԓат. Муӈ районэв эԓты тохи ур мува яӈхас Ямкуртаӈ ху – Александр Николаевич Куртямов. ԓув айтэԓн хуԓ веԓаԓ па уятԓ хоты мосаԓ ԓувеԓ ԓэщатты. Сишн хун тамщ касапсаят верыԓыԓаят, ԓув мохты тохи яӈхаԓ па этаԓтыԓ хоты ԓув хошаԓ яма па эпԓаӈа ԓэщатты ԓэтотат.
Александр Куртямов ур мува патан тувмаԓ ԓув туса ԓэщатом хув анԓаԓ па актам вонщапсайԓаԓ – мур а х , кал рых, вурты рых па шупши. Щи тумпина ԓув хуԓ вой па тохи тутԓыйс. Па щита этаԓтас хоты хантэт хорама хошԓат нёхарты хуԓ па нёхи.
– Нёхрам хуԓэм па нёхэм ма хорам аната потсыԓԓам, – ястаԓ Александр Николаевич. – Па тохи соԓ па перец, па ма ԓэщамтом рыхат эԓты соус потсам, хуԓ вой па тохи. Щит пиԓн нярхуԓ шеек эпԓаӈ питаԓ.
Щимащ эпԓаӈ ԓэтот ԓэщамтом сыс жюри шек такан вантсат па ямшак па хорамшак ԓэвапса пирысат. Щиты няр хуԓ нёхарман нох питас муӈ ханты хоятэв Александр Куртямов. Няр нёха нёхарман урн нэ Ольга Сэротэтто нох питас Панаевск эԓты. Щит тумпина народное голосование па верыԓыса. Мир ԓоватн пирысат хой умащшак па хорамшак ԓэтот ԓэщатас. Щиты шоши хоятэв Александр Николаевич па ипуш нох питас. Сишн рахаԓ ястаты ԓорвош районэвн Щаня мувн уԓԓат тус па вещкат хоятат! Ат па еԓԓы щиты уԓ, па шоши хоятԓув еԓԓы нох уратԓат!
