Ԓорвош районэв ԓоватан таԓаӈ кат хатԓ — 14 па 15 хатԓатн айкер тыԓащн вуԓы тащ шавиты хоятат кеша каш па касапсаят ԓэщатысаят
Щи хатԓ кеша хоятат таԓаӈ таԓ ԓэщатысат. Кашӈ таԓ там емаӈ хатԓ ар хоятан ԓаваԓԓа, ар хоятат иха ёхтыԓыԓат па уйтантыԓат. Россия хон мувев ԓоватн эԓты мояӈ хоятат йиԓат. Па хон муват эԓты па мояӈ ёх ёхтыԓыԓат. Тампуш Сербия мув эԓты кат турист ёхтыԓысат. Па шеек умащԓыман тамщ емаӈ хатԓэв эԓты ёхи матсат. Щи тумпина яԓап Волноваха муват эԓты па мояӈ хоятат ёхтыԓысат.
Меет оԓаӈ хатԓ ун собрани верса, хота районэв вуԓэӈ ёх куща ху Олег Попов пиԓн уйтантысат па потремисат хоты ԓув верԓаԓ манԓат па муй проблемайт ԓув тайԓат па хоты мосԓат верт туӈа-щира ԓэщатты. Етна пелка па ԓув урӈаԓн ун концерт верса па ямашк такан рупатм па сэма питам хатԓат кеша вуԓэӈ ёх мойԓапсаятн мойԓысаят.
Кимет хатԓ иса хоятат аԓаӈ эԓты Ханты-Мужи курт пеԓа таԓасты питсат. Щита таԓаӈ хатԓ мир ԓовата каш верса — ар тынасты лотат, няврэмат ураӈна ёнтапсаят, касты лотат, таԓаӈ 22 урхот ԓонщман ус, кашӈ хота рахас ԓоӈтыты па эпԓаӈ шай па хошйиӈк инщты.
Емаӈ хатԓэв пуншас «Аргиш Ямала», хота хольмаӈ кем вуԓэӈ ухаԓ ияха оԓтасман ватаԓтысаят. Щи онас еԓпина шушас Афанасий Лонгортов — ин атом СВО ляльн ляльсты ху па вуԓэӈ ԓухортам рут ёх пох.
Там емаӈ хатаԓн кат сельхозпредпритяие «Горковское» па «Мужевское» ԓув кутԓаԓн ияха кассат. Аратԓ касман нох питас сельхозпредприятие «Мужевское». Ԓувеԓ тынаӈ квадрокоптер мойԓаса. Щаԓта па вуԓэӈ ёх семьяят эԓты няврэмат кеша па касапса верыԓыса. Емаӈ хатԓ сыс нёхратты чемпионат «Няр нёха» ԓэщатыса. Щита нох питас ун хоят Емельян Куртямов. ԓув хув тэԓан щимащ касапасаятн нох питыԓыяԓ.
Вуԓэӈ ёх ар-сыр касапсаят кутан нох питсат:
– Хувашк хуԓам-пуш навармиман, ухаԓ шоппи наварман, тынщаӈ ёваԓман па вуԓэӈ ухаԓн касман — Эдуард Эдуардович Лонгортов;
– ԓохн хухаԓман — Светлана Лонгортова па Эдуард Лонгортов, Олеся Пугурчина па Станислав Лонгортов;
– Юх катна таԓман юращман — Дмитрий Валей;
– Семейная эстафета — Артём Куртямов семья;
– Этнобиатлон — Эдуард па Станислав Лонгортовы, Максим па Константин Талигины;
– Ёх кутан юращман меет юраӈ — Петр Артеев;
– Нэӈат кутна вуԓэӈ ухаԓ меет харщи уԓмаԓ — Олеся Пугурчина.
Етнапелка кашаӈ хоят шитам мойԓапсайԓаԓ ёша паватсыԓԓаԓ па емаӈ хатԓэԓ порыԓыты питсэԓ! Так нумас потсат па там иты кимет таԓн ияха уйтантыты!
