Коми фольклорнӧй чукӧр вощис асьсьыс уджсӧ 1990 воын Маргарита Ефимовна Ермакова
Ме чомйысь локтӧм челядь, школаӧ мунi полӧмӧн: тыр выль йӧз, роч кыысӧ тӧда лёка, карсӧ ог тӧд. Кудз кӧ тай тышнас-баннас сёрнитӧмӧн и велӧдчи медводдз восӧ. Мӧд классянь, 2005 воын, нуӧдiсныс менӧ сьыыны “Обдорянка” коми фольклорнӧй группаӧ. Бура нин менум сэтӧн лэсялiс: сёрнитӧныс и сьылӧныс изьва кылӧн, видзӧныс изьватас паськӧм. Сыдз пырис менам сьӧлӧмӧ да олӧмӧ “Обдорянка”.
Бэрвы нин ме тӧдмалi, мый артмис сьылан чукарыс 1990 воын. Сэк некымын водзмыстчысь морт гӧгӧрвоисныс, мый Обдорскын изьватас культураыс кусӧ: кылан эчаджык изьватас сёрни, ыллаын гежда аддзан сарафана бабарэд. Маргарита Ефимовна Ермакова босьтic ставсӧ ас киӧ да чукартic изьватас йӧзсӧ сьыыны. “Сыа звэниталiс ставыслы и шуис: колӧ локны да обязательнӧ аддзыны изьватас паськӧм! Висьтоолicныс кӧ, мый сарафан абу звэниталic совхозъяссӧ кӧрдорса аньяслы и коралic ные. Ныа пыр вӧлiныс зэй скромнӧйӧсь и из волыныс, но паськӧмнаныс юксисныс” – казьтылӧ Татьяна Власовна Гостюхина. Маргарита Ефимовна кык во нин абу – миянкӧд. Сыа вӧлi зэй рам да бурсьӧлӧма мортӧн, но кужысьӧн организуйтны да чукартны делӧ вылӧ йӧзсӧ. Окмысдас кык арӧсӧдз лунысь лун висис изьватас культура да традиция помла. Ме пэмнита, кор ми Обдорянкакӧд сетлiм концертъяс и ные видзӧдны волic Маргарита Ефимовна, менум вӧлi зэй важнӧй, мый сыа шуас. Лёкӧс никор из шулы, но мылякӧ пыр полi.
Медводдз веськӧдлысьӧн вӧлi Александр Тихонович Бердышев. Сэки репертуар подулӧн лоисныс коми хорлӧн сьыланкывъяс, кодi вӧлi Салехардын 30-40 воясын. Бара Обдорын кучис юргыны коми сьыланкыв!
Кык во мысти кучic веськӧдлыны коллективнас Сергей Клюв, а сы бӧрын дас во чӧж – Виктор Викторович Гиниборг.
Обдорянкаын пыр сьылiсныс и сьылӧныс быдпӧлӧс арлыда да профессия йӧз. Воясӧн коллективыс быдмис выль йӧзӧн да сьыланкывъясӧн, вощисныс педкӧдлыны сценасянь ворсан да обряда элементъясӧн.
Дас квайт во нин Обдорянкаӧн веськӧдлӧ Ольга Вячеславовна Кожина (сыа газетлӧн медводдза листбок вылын). Ачыс роч морт, но синмыс ӧзйӧ коми культура да кыы сӧвмӧм вылӧ. Пыдди пуктӧмӧн нуӧдӧ уджсӧ да эзтӧ выль коми кодзувъяс.
Сыдз, дас во саин, Ольга Вячеславовна восьтic “Маръямоль” коми челядь группа. Уна челядь ветлic дас вонас “Марьямолькаӧ” да паськӧдicныс изьваса сьылан культура. Ветлӧныс медчаса изьватас челядьяс, но овлыллӧныс рочъяс, украиничъяс,ӧсьтякъяс да сыдз водзӧ. “Маръямоль” ветлалiс гастрольясӧн Россия пасьта: “Сочи, Москва, Санкт-Петербург, Казань, Ханты-Мансийск”. Челядьяслӧн синмыс ӧзйӧ сьылӧм вылӧ, а сичкӧ “Обдорянка” аслыс быдтас бур сьылысь поколенньӧ.
“Обдорянка” эторни рэбитэ, мед радуйтны миянтӧ выль сьыланкывъясӧн. Босьтӧныс унджыксӧ Коми республикаысь, а бэрвы вуджӧдӧныс изьва сёрни вылӧ. Ныа сьылӧныс ассьыныс песняяныссӧ важ да мича изьва кылӧн. ӧнiя кадӧ нылӧн репертуарын ветымынысь унджык йӧзкостса сьыланкыв. Комын вонас вӧлi уна карӧма, мед лоозьӧдны, видзны да сӧвмӧдны Ямалса коми культура.
“Обдорянкаӧс” тэдӧныс Коми муын, Ханты-Манси да Яран кытшъясын, кытчӧ на ветлiсныс гастрольяс вылӧ да ваисныс быдпӧлӧс тшупӧда наградаяс.
Ме вылӧ пукта, мый туй кодӧс восьтiс Маргарита Ефимовна “Обдорянкаын” сьылысьяс нуӧдӧныс водзӧ. Быд воторник да пекнича рытъяссӧ ОЦНК-ын чукартчӧмӧн да сьылӧмӧн.
