Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Йиңк сяр эӆты Шушты ики

Last updated on 4 марта, 2020

Михаил Григорьевич Кельчин шуңта па ӆув похңаӆаӆа – Георгияя па Владимира юкан- там потр

(Оӆаң шупӆ 1-мет лопасн ӆуңтаӆн)

Туташак ма хар тут пусаң шияӆасам. Ӆув, мув сох эӆты лаңкасман, ай вот рувна лакки туӆа, курңаӆам кератман. Еша уӆ, каврам хошак йиңк инсьты питӆув хуӆ веӆты ёх емхатаӆан. Наң хуӆ веӆты тус ёх веншат шияӆаӆан. Сикуш веӆпасӆаты тусат, туп муң хон хоятӆуван, па хонат хоятатан ант уйтӆайт. Шитаман уӆӆат – хуӆ веӆӆат. Моӆтас потар, моӆтас ясаң антом. Шитамеӆ си хорпи шитам, исимет Ун Ас маӆаң маӆат. Унт сый хуӆантман, йиңк сый хуӆантман утңат омасӆат. Нан моӆты порайн вантсэн муй хорпи Ас нумпина Турм ӆоңаӆ?

Наң моӆты порайн вантсан, хоты айхоп, лёхиӆам хоят ураңан юха верӆа? «Уӆты хараӆ, эвтам айхоп ӆовата иӆ»,– ин там муң мувева уӆты ёхтам хоятат нэмаӆты порайн оша ант пайтӆэӆ шошең муваң ёх уӆапса. Ханты хоят ӆув уӆты муваӆ Турм пиӆан туп таӆаң. Шошең муваң хоят номас моштаты ураңан мосаӆ ӆув сираӆан уӆтыя, ӆув ясңаӆна потартыя. Хоят ӆыпи сясь ясаңан ястаты сир ант тайӆ. Овс Мув Хоят уӆты сиран куш хоят аат уӆ, исипа юураӆ ант тармаӆ ханты сиран уӆтыя. Хуӆ веӆты хоята сёмӆы уӆты ант рахаӆ. Мосаӆ аӆаң нох киӆӆыты, артат рупитты. Ӆупат метты кема, хомпат рома иты унты. Вантыса, йиңк сяр эӆты антом вотся шушаӆ, мохиӆаӆ, ӆув яра хот хоятӆаӆ иси шушӆат. Ма Наңэн этаӆтаӆэм си монсь. Ясңэм хуӆ веӆты хоятат эӆты, Наң туӆтат моштаӆэн. Хуцы, там потрэм, сэма питты няврэмӆама хайты номасна ханшӆэм.

Артаӆаман тайӆэм, хоты Кельчи рут хоятат уӆӆат па рутмаӆат. Кашң таӆ, кашң ӆуң яӆап хоятат, юхэн нуват иты энамӆат. Кельчи рут Михаил Григорьевич Кельчин онтасна арамаӆ па еӆӆы уӆ. Вантаса, хоты асем, кат пуш патэң ханя тайты ларася хуӆ па нёха ханятаӆ. Тасяңа па ямашак уӆты хоятат ерты пора ёхтас. Хинятна моӆтасшак ӆэтотэн, пормасэн някарӆа. Веӆпасӆаты хоят, няврэмӆаӆ ӆэӆӆы ант хаӆты ураңан, ӆыӆ ант щалитман, ханятаӆ, сопасӆаӆ. Си веран шуук тувам хантэв ар. Вантыса, хоты Ун ляль порайн, Карсь ики ус. Хоты рупитас, хоты нэңат па няврэмат кутан кусяя поныӆыса. Хуӆантыя, муй ӆув потартаӆ: «Си кем мушан ма ляля аат китсайм, сита аат лёхиӆасам. Кашң хатаӆ няврэм шуук вантэм ураңан». Вантаса, ӆаварт шуук туты няврэмиет пеӆа, па яста, муй сиран ӆув ӆаварт шуукеӆ кенашак вер- ты рахаӆ? Уӆты йиңкеӆ уна хорпи восьрэм. Хоты верты? Восьрэм уна йиңк соорм нянь пиӆан инсьман еӆӆы уӆтыя па ӆайӆастыя. Сякты таха антом.

Иса хун атом па шуук. Карсь ики хося иси амат ёхтас. Ӆаптхосьяңмет Ванхатӆапан 1944 таӆна Миша похӆ сэма питас. Асеӆан русят эӆты ханятса, ашкуӆая ант маса. Миша хуӆ веӆас. Си веран нэмаӆ сыйң сыйн сыйтсаӆӆы. Вет таӆа веӆты хуӆ йи таӆ сахат веӆӆысӆы. Хуӆам орден па медалят тайс. Рутӆаӆа, ӆув рут мираӆа, уӆты муваӆа онтасаң онтас
верас.

Моштантыты ясңат:

Лёхиӆам хоят – антома ювам, хаӆм, момиям, посаӆам хоят;
Юха – юх, хоят хаӆтаӆ юпина си ӆыпия понты ӆарась хошап, русь ясаңан гроб;
Хуцы – сяха, моӆты па иш порайн тыйты сир;
Хинь – мув иӆпи ӆуңх, мушат хоятата китаӆ, турм шакатаӆ;
Карсь ики – Михаил Григорьевич Кельчин шуңат асеӆ шуңат нэм. Няӆ яй сак уӆмеӆ; Нави Ох ики (Пётр), Лущ ики (Алексей), Наары ики (Кирилл).
Сыйң сыйн сыйтсаӆӆы – ям сиран ар тахайн нэмаӆ уйтӆа.

Дмитрий Кельчин ханшам потар.
Геннадий Кельчин ханты ясңа толмащсаӆӆы.

(Еӆӆы па уӆ)

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!