Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Соӆтана яңхас шоши мувӆ аратыты

Last updated on 4 марта, 2020

Михаил Лонгортов: – Афганистана китты вер эӆты муңев туңа ант потарса

Кашң хоят, хота сэма питас, хота уӆ, щи мувӆ шеек самаңа тайӆаӆӆы. Ар тахаята, мур ӆоват камн тахаята яхман ищипа самаӆн ёхӆы пеӆа сюняң муваӆа уратӆ. Ищиты муң шоши ханты хоятэв ар мув вантман ёхӆы самаңа тайты Щаня муваӆа ёхтас.

Михаил Ильич Лонгортов нэңат емаң хатӆ еӆпина, 7-мет хатаӆн Айкер тыӆасьн 1963 таӆн сэма питас. Щи порана, ащеӆ – Илья Ефимович, па антеӆ – Елена Андреевна (Тогачева), вуӆы тащ хотатн яхсат. Хотэӆ Тыӆтам курт пуңаӆн ӆоймаӆ. Семьяян хут няврэм энмаӆсатан. Михаил меет ун пох, сишн ӆув айтэӆн ащеӆа тащ воштаты па ат ӆаваӆты нётапса верас.

Щиты, айӆта ашкуӆая манты пора ёхтас. Михаил, ӆув ӆоват няврэмат пиӆан ияха акатсаят па Овкурт ашкуӆая тусаят. Щита ӆув яң таӆ утаӆтыяс па 1981 таӆн ашкуӆа етшаптас. Ӆуң сыс ӆув кимет няврэмат пиӆан антиӆаӆ-ащиӆаӆ хоща Кев пеӆа яхсат. Щи сус ёхӆы курта ёхтамн, айкеӆ – соӆтана китты нэпек ёхатмаӆ.

– Тюмень вооша, Пулңават эӆты тохӆаң хопн тусаям. Щита веӆщи ёхтам энамты няврэмат кут эӆты, Борис Пырысев манэм кащаӆаман еӆ шушмас, – нумаӆмас Михаил Ильич. – Щит ма ӆухсэм, муң ашкуӆаян ияха утаӆтысман. Ӆув ашкуӆа юпина мохты Ӆапатнак вооша утаӆтыты манас па тата щи ияха уйтантысув. Нох аматсув! Щиты муң еӆӆы ияха соӆтана китсаюв. Щи ат, Тюмень эӆты карты юш хуват Туркменистан нэмпи мува, Таджен вооша мантсув.

Таджен воошан яӆпа ёхтам соӆтанат утаӆтысаят хоты танк машнаятн яхты мосаӆ. Ӆув пиӆэӆан щита хоӆна йи ханты соӆтан Данил Миляхов уӆмаӆ. Щита ӆув ияха присяга масат. Ияха ӆув щита таӆшуп уӆмеӆ. Еӆӆы китты вер эӆты туңа-щира нэмоӆты ант ястам.

– Афганистана китты вер эӆты муңев туңа ант потарса, – потарӆ Михаил Лонгортов, – па муң щи эӆты еӆпи айкеӆ хуӆсув. Нэман, оӆаңн, ястасат Германияя, мосаң Чехословакияя китӆаюв. Еӆӆы манты муң сикуш ияха ӆухасӆув пиӆна манты уратсув. Шоши хоятӆув пиӆна кеншак. Па хоты верты, атаӆн ма нох киӆтысаям па еӆӆы тусаям. Ӆухасӆам хащсат, ӆув кимет тахаята китсаят.

Ашхабад – щит ун воош Туркменистан муван. Щиӆта щи Советский соӆтанат Кабул нэмпи вооша Афганистан мува тохӆаң хопан китсаят.

– Тохи ёхтамн, ваттэмн па хорпи сохң соӆтанат ты-тохи шушиӆыӆат, ёшн хоӆна пушканат тайӆат. Еша хурыты питсам. Нумасӆам, ахоӆта тусаям? – ястаӆ Михаил. – Там мувн щи манэм соӆтан уӆапса хоӆна йи таӆ па шуп уӆты мосмаӆ. Тата ма 180-мет мотострелковый полка ӆэщатсаям.

Афганистан мувн мосмаӆ вантман уӆты. Соӆтанат юшт, блокпостат па машнаят шавиман яхсат па ат ӆаваӆсат. Щи мувн иса хиш па кев. Юшт кев ӆыпи эӆты манӆат. Кев ӆыпина щи меет атом тахаят, хота атом соӆтанат ханятыӆат па советский шоши машнаят ортӆат. Сишн мосмаӆ ты-тохи аңкармиман па вантман манты.

– Меет оӆаң-пуш кев ӆыпия манты хатӆэм шеек яма нумӆэм, такан самема пайтасас: щи хатӆ тэӆыя машна тут-йиңк туты мантсат. Ӆувеӆаӆ мосмаӆ эӆты вантман тайты. Моӆты-ки нёӆ па моӆты тут-шукие питаӆ, щит мохты соӆамата тохӆат. Щи эӆты щи паӆсув. Па ромат кев сайт эӆты орты питсаюв, пушкан нёӆт ты-тохи рыйты питсат. Муң юш кутапн ӆойсув, тумиӆан нумӆта нёӆ эсаӆсат, – паӆщам хорпи, потарӆ Михаил Ильич. – Ма танк турӆ хоӆта мосаӆ пертман тайсэм, па нёӆ понты ихуем узбек Рустам. Ӆув пушкан эӆты муй арат вертас ортас па нёӆн хойса. Командир манэм ястас сора-сора мосаӆ леккар вохты. Ма танк эӆты айӆта ким этсам па ваңкман юш хуват кимет, БТР нэмпи машная хухсам. Щита леккара ястасам, па муй, урӆ сора манмаӆ, ихуем щита антома ювмаӆ. Муңев нётты тохӆаң хопат ёхатсат, ӆув нумӆта ерт иты нёӆт эсаӆсат. Муң ӆыӆӆув нох питсат. Хун ёхи ёхатсув, нумассам, паӆщамат, хоӆта ма китсаям…

Кимет пуш кев ӆыпия манамн, Михаил Ильич, больницая питаӆ. Хун нёӆ тохнапӆ, кев-шук ӆув сэмаӆа хойӆ. Щит 29-мет хатӆ Айтахаят потты тыӆась уӆмаӆ. Сэмӆ ямашк йиӆ па еӆӆы ляльсты манӆ. Кимет таӆ хатӆ-хатаӆн ищи 29-мет Айтахаят потты тыӆасьн соӆтан уӆапсаеӆ етшаӆ, ёхи китӆа. Ёхи манты еӆпина соӆтанат мойӆапсаятн хойсаят. Муң шоши хоятэв па ун тынаң мойӆапсаян – орден Красной Звезды – мевӆаӆа ханаӆса.

Ёхи манман ар мув вантас. Соӆтан ӆухасӆаӆ ун Советский Союз муват эӆты, айнайн ӆув мувӆаӆн ким этсат поезд эӆты. Щиты, Михаил Лонгортов, мув ӆоватн ар ӆухас тайӆ.

– Аспотты 11-мет хатаӆн ма Мужи вооша ёхатсам. Мохты военкомата шушсам. Щита нэпекӆам масӆам па ям нумасн ёхи рутӆам хоща мантсам, – ястаӆ Михаил Лонгортов. – Щи юпина еӆӆы утаӆтыты манты утчисам, па хоты верты, ащем-антема ищи нётты мосаӆ. Щиты ма вуӆэң тащ хотатн рупатты питсам.

Мужевский совхоз тащатн Михаил Ильич нийӆъяң пеӆа кат таӆ рупатс. Щита иймеӆ пиӆан уйтантас. Ин ӆув няӆ эвие па кат похие тайӆатан. Эвиӆаӆ уна йистан, ӆув семьяят тайӆат. Па туп ун похӆ ашкуӆаян утаӆтаӆ, ай похиеӆ – садика яңхаӆ.

Ин Михаил Ильич пенсияян сютчаӆ, Овкуртан уӆ. Уӆты хотӆ воӆӆы вевтама йиты питмаӆ. Сишн, камтса таӆ хащамн нэпекат актас па субсидия охн митаӆам, яӆап хот верты питам. 2017 таӆн етшаптаты вер уӆмаӆ па щиты вощкам – хот верты бригада кущайӆ пиӆн хотмеӆ. Хоятат олмащимеӆ. Уншак тахаятн рупатты хоятат ант онтас верӆат, муя па щиты шоши хоятӆув омпсаӆтыӆаят! Тащ хотн хув рупатм, ляля яңхам хоята атом, вевтам хотан уӆты ант мосал.

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!