Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Ляль ма семьяема ищи хойс

Last updated on 8 мая, 2020

Воӆаң Отечественный ляль ар хоят рутӆаӆ пиӆан вантсат. Кашң семья эӆты ащет, похат, ийкет, унащет, апщет ляля китсаят. Щи ун ляль шоши хоятӆув ияха акатсаӆӆы. Муң 75 немпщат эӆты нох питам таӆ поснтаты питӆув. Муң, ин уӆты энамты ёх – муңев мосаӆ лялясам па тарма рупатм хоятӆув нумман тайты.

Ун пумащипа утчиӆам ястаты хоятат хой интернет сайтат Подвиг па память народа верас. Хой симась нумас верас, хой хоӆна вераӆ. Ӆув ун рупата верӆат.

Щи сайтат ма уйтсаӆӆам. Нэман моӆты нэпек каншсам ма унащиӆам па опращӆам эӆты. Подвиг народа па память народа интернет сайтатн нэпекат мощатсам. Ӆуңатсам хоӆта тутӆысаят па муй ишканщап нэпекат па орденат ма опращӆам шитсат. Уйтам нэпекат ёшн ханшамт, хой тахаятн буквайӆаӆ воӆаң ант ныӆаят. Щи уйтам нэпекат муң самаңа па нумман тайӆаӆӆув.

«Книга памяти Шурышкарского района» хоща ханшам: Порават курт эӆты ихосьяң (11) хоят ляля китамт. Щи хоятат кутан ма опращем – Лазарь Антонович Наков па ӆув яйӆ Назар Антонович. Апщиӆаӆ Василий па Семен, Гурий похат, ищи китамт.

Лазарь Антонович 15-мет хатаӆн Ункер тыӆасьн 1913 таӆн Порават куртан сэма питмаӆ. Ляль еӆпина колхозна «Ударник Севера» Порават куртан рупатс. Щи юпина колхоз им. Жданова хоща вуӆы тащ шавияс. Иймеӆ Анастасия Алексеевна Кельчина. Кат пох тайсатан. Уншак похӆ нэмӆ Егор (Георгий), айшак похӆ ляль порана муш эӆты антома ювмаӆ.

Опращем ӆуңн 1941 таӆн ляля тувм. Ленинградский фронтан мув аратымаӆ. Такан мушмаӆтам юпина ӆуңн 1943 таӆн ёхи китам. Ёхатмаӆн иймеӆ пиӆна катна манӆатан. Егор похӆ утча энмаӆтаӆ.

Ляль етшам юпина тащ хотатн 1960 таӆ унты яңхас. Щаӆта Питӆор вооша уӆты касӆас. Щита совхоз «Горковский» ураңна вой па хуӆ веӆман рупатс.

Ар тынаң мойӆапсаятн лялясам ураңна мойӆаса: «За отвагу», «За оборону Ленинграда», «За победу над Германией», «20 лет победы в ВОВ», «Участнику войны 40 лет Победы», «50 лет Вооруженных сил СССР», «60 лет Вооруженных сил СССР» па Ункер тыӆасьн 1985 таӆн орден Отечественной войны 1 степени мевӆаӆа ханаӆтам.

Назар яйӆ Унщ тыӆась 1942 таӆн ляля манмаӆ. Ӆувеӆ 27 таӆ уӆмаӆ. Щи пора эӆты эӆтэӆ нэмоӆты айкеӆ антом. Нэмоӆты нэпекатн ханшман ант уӆ. Хун мосаң парс, мосаң тапс па ёхӆы ёхтам сыйӆ па антом. Туп ипуш ханшман уӆ – рядовой.

Меет ун яйӆ Гурий Антонович (1898 таӆн сэма питмаӆ) кулак иты пушканан паратам Пулңаватн, 5.04.1938 таӆн. Похӆаӆ Василий па Семён ляля китсаят Лазарь Антонович ёхтам юпина.

Василий (1921 таӆн сэма питмаӆ) Унщ тыӆась 1943 таӆн соӆтана китам. Такан мушмаӆтам па Курк тыӆасьн 1944 таӆн ёхи ёхатмаӆ. Инвалидностьн понам.

Семён (1925 таӆн сэма питмаӆ) ищи 1943 таӆн соӆтана китам. Гвардии рядовой, стрелок 1 стрелкового батальона 200 гвардии стрелкового полка 68 гвардии стрелковой Проскуровской Кразнознамённой дивизии. 1944 таӆн оӆаң-мет Украинский фронтан лялясас. 18 Яӆаптаӆ хатӆ 1945 таӆ эӆты Венгрия мув аратыяс. Щит нэм – Балатонская оборонительная операция. 6-мет Айкер хатаӆн ӆув мохты ипуш хут немпщ паратсаӆӆы. Щи ураңна орден Красной Звезды шитас. Па туп щи орден ёшн ант катӆысӆы… Кимет, 7-мет Айкер хатаӆн 1945 таӆн тапӆ. Щи пора эӆты нэмоӆты айкеӆ ӆув эӆтэӆ антом…

Хащм Воӆаң ун лялев эӆты мосаӆ уйтты па нуммман тайты. Мосаӆ уйтты муй арат тын, муй арат уӆапса масат хоятат там ляль шук этты нох питты ураңна. Кашң ляля яңхам рутӆан нумман таяты, няврэмата потартаты.

Там потр хиӆы-хиӆы Ксения Сюртахова (Накова) опращӆ эӆты ханшас.
Рущ ясңа толмащсаӆӆы Иван Сандрин.

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

47 − 41 =

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!