Нажмите "Enter", чтобы перейти к контенту

Хоты Нёрапса ху опрась нэм шитаптас

Last updated on 21 января, 2021

Дарья Ивановна Озелова-Чугаевская

(Оӆаң шупаӆ 8-мет лопасн 2020 таӆн)

Турм муң сирэвн хун уӆ, ханты хоят уӆапса ар ята питыӆыяӆ. Унтари нэмпи асирасем мет уна хасис, ӆув ай нёрапса ёх порӆиты хара вохилисӆы Турм-Аси поякты, нови вуӆы этра альты, Курк–Ӆух–Ики поякты, Турам-Анти нумман тайты.

Ехан–Ов нэмпи курта ёхтас яӆап Советская власть. Русят ӆитсат нуша ёха ям уӆапса верты. Ханты хоятат русь уӆапсана уӆты ант ӆитсат. Тасяң ханты ёх ханятыман яхсат порӆиты хара, нови вуӆы йира хорсат. Лапт-Нум-Турм-Аси, омасты Емаң Мув нёӆ пояксат. Мужи вош яӆап кусяит ясңа хантэт ант хуӆатмеӆ. Катра йисъёх уӆапса сирн ханты ёх уӆты ӆитмеӆ. Нуша ханты ёх полсь туӆат Мужи вош кусяита. Русятан си вер моштаса па мохты оша паватса. Матты-ки, Восьлах-Озелов Андрей Григорьевич ханятыман ханты хоятат хусяӆ ант хуӆатты яӆпа тыям Советской власть пеӆа.

Ма асирасем Восьлах Унтария нуша хантэтан руся айльса, русь нэпек хуват ӆув Озелов Андрей Григорьевич сэма питмаӆ ай Ёхан куртан, 1897 таӆн. Ӆув ханты ху. Ӆув нёрапса ху. Восьлах рут. Ӆар хиӆы. Ай куртые Ёхан–Ов русь сирн Усть–Войкар, Шурышкарский район. Ма асирасем сита энмас, рупитас, воснэ эви тус, няврэмат энмаӆтас. Имеӆ нэм Ребась Евдокия Николаевна. Ӆын тайсатан няӆ няврэм: кат пох, кат эви. Хун асирасем касна хота омпсаӆса, няврэмат айт уӆмеӆ. Ма асем хутхосьяң таӆн хасьмаӆ, мет ай похаӆ – хуӆам тыӆась ӆоват. Асирасем кат эви таймаӆ: Елена па Анна. Елена асиӆы хасис яң таӆ, Анна – нийӆ таӆ.

Пунаң сахат, вайт Мужи воша тувамат. Таӆ тарм иськина яӆап нюкет нох хорамат. Сясем ими ай няврэмӆаӆ пиӆан каман хасьмеӆ. Тась шавиты ампат лакки ортамат. Русят увман яхмеӆ курт хуват: Восьлах-Озелов Андрей Григорьевич – «враг народа!». Ханты хоятат оша ант павтӆэӆ, сит муй ясаң? Ошаң ханты ёх иси хошемимел, атом вер ёхтас. Хатаӆ сыс тасяң воснэ Евдокия Николаевна нушая йис. Тась антом, ох антом. Ма асирасем Андрей Григорьевич ханты ёх кутан хуӆ веӆты кусяя рупитас – бригадир лова колхоз нэмпи «Красный путь» хося. Восьлах-Озелов Андрей Григорьевич касна хота туса 25 декабря 1940 таӆн органами НКВД. Си етан хот патэӆ нох рувемаса: русятан нох вуйм облигации хуӆмет пятилетки 150 (сответъяң) соӆкова нэпек, сберкнижка таймаӆ ветсот (500) соӆкова, хоӆна па страховое свидетельство нох вуямат. Ма асирасем касна хота омпсаӆса талаң вет таӆа.

Ма асем, Иван Андреевич хутхосьяң таӆ ӆоват няврэм муй ар веритас, туп сэмӆаӆ аӆ ватсат, хоты ёш вуӆыӆаӆ лакки таӆсаит нуша ёхан. Катра порана русят номас версат, моӆтыки ма асирасем атом хоят, муръёх ёвра хусяӆ, советский власть пеӆа атом сэман ватаӆ, исимоӆты утся уӆты уратаӆ, яӆап власть хося ант хуӆатӆат, няврэмӆаӆ школая ант ӆитаӆ матыя. Асикем Андрей Григорьевич Нерапса ёх Емаң нёӆ порӆийӆ. Антеӆ-асеӆ уӆам номас еӆӆы туты уратаӆ. Си верат русь ёха сама ант рахсат. Русь ёх яӆап уӆӆапса си версат, си хуват муң ин си уӆӆув, муң сэма питам ясңев уштасэв, руся керӆисув.

Асирасем ун пох, ма асем нэм Озелов Иван Андреевич нийӆъяң пеӆа ӆапат таӆ ус Ёхан-Ов куртаӆан, нийӆ няврэм энмаӆтас: хут эви, кат пох. Асем тась шавиман ус, хуӆ веӆас. Яма рупитмаӆ ураңан ар медаль тайс, ар-сыр мойӆапсайн мойӆиса, мет оӆан моторна «Стрела» мийӆиса яма рупитмаӆ хуватан. Хун антем парас, ӆув муңев нох энмаӆсаӆӆы. Симось ям аси муң си тайсув, ям ими хорпи ус, утся ай эвиӆаӆ, похаӆ энмаӆтас, сэма питам хотэв хошам ус. Исимоӆты антев ким аӆ этмас, ешауӆ ёхи ӆоңемаӆ, няврэмат нуша вер ант вантсат, тэӆаң хотан энапсув.

Ма, асирасем кутӆап хиӆы, Тюмень воша нэпек ханшсам, оша паватты ураңан, хота Озелов Андрей Григорьевич касна хотан омпсас. Имоӆтына нэпекат си ёхатсат Тюмень вош эӆты. Асирасем Восьлах-Озелов Андрей Григорьевич касна хотан омасмаӆ, ӆув паратам Щёхар (сентябрь) тыӆась 1942 таӆн. Асирасем порӆиты хар ураңан касна хота омпсаӆса, нови вуӆы йира хормаӆ ураңан, Ӆапт-Нум-Турм-Аси, Нёрапса ёх Курк-Ӆух, емаң Наңк-Авт пойкмаӆ ураңан русятан касна хота омпсаӆса. Яӆпа тыям советский власть пеӆа, маттыки, ант хуӆатмаӆ, няврэмӆаӆ ашкоӆая утыӆтыты ант миймаӆ, ханты уӆапсана уӆты ӆитмаӆ, хоятат хусьтаӆ ант хуӆаты яӆап уӆапсая. Кат сёрс тасяӆ нуша ёха лакки орӆа, хасям тасяӆ колхоза «Красный путь» мойӆам.

Сясем-ими Евдокия Николаевна хаӆтаӆ унты ӆавӆасас, муң иси шеңк ун асев ӆаваӆсэв. Восьлах рут интам унты пойкаӆ Ӆапт-Нум-Турм-Аси, ӆапт пуш ох понаӆ нерапса ёх Курк-Ӆух пеӆа, кушкепа яӆпа энамты няврэмат тумтака ат энамӆат, уӆӆат, рупитӆат, утыӆтыӆат!

Тумтак уӆаты Восьлах рут – Озеловы! Ям ёш, ям кур нёрапса ёх па эвет!

Нэпек ханшас нёрапса нэ, турам эви хиӆы, Восьлах-Озелова рут.

Ханты лопас ӆэсятас Иван Сандрин.
Хорат масат: Иван Сандрин, Михаил Озелов, Герман Сандрин па Татьяна Паршукова.

№3 16 января 2021

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

50 − = 43

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!