Нажмите "Enter", чтобы перейти к контенту

Ун ляль эӆты ёхи письмаят ханшиӆысат…

Last updated on 11 мая, 2021

Щи порана атом пора. Хой айкеӆат ёхи ханшыӆасат, ант ёхтыӆысат. Атом али ям, ищи айкеӆ

Ар шоши хоятӆув ляля китыӆысайт. Щи арат хоят, ант па нумӆа. Сишн еӆӆы нумты па уйтты щирн, Ӆорвош раайонэв музейн рупатты хоятӆув ар юр версат, ар рупатсат па камтса книга ханшсат. Книга нэмӆ «Книга памяти Шурышкарского района». Щита иса ханшман уӆӆат хой хун холта китса, хой парас, хой ёхи ёхтас. Щит шек ям рупата. Хоя мосӆ щиӆта рахаӆ рутӆаӆ каншты.

Ӆорвош районэв ай куртат эӆты ёх Мужи вошн ияха актащисаят. Щиӆта еӆӆы ун кат ятпи колёсный пароходатн Омск вош пеӆа тутӆисаят. Щита уӆмаӆ сборный пункт Черёмушки нэмпи курт хоща. Щита веӆщи ёхтам соӆтанат рупатсат па утаӆтысаят туңа-щира хоты мосаӆ ар-сыр пушканатн ортты. Щи тумпина ӆув картушка омасман рупитысат па кимет ёхтам ёхатн сусн актыӆысаят. Ар рупата верыӆысат.

Щиӆта щи шоши хоятӆув кум шитман ёхи письмаят ханшиӆысат. Ханты-Мужи курт эӆты 15-мет хатӆ Унтӆор тыӆащ 1942 таӆн тохи Георгий Пастырев питас. Ӆув таңха яма утаӆтыяс па яма ханшты хошмаӆ. Ӆув хуӆм письма ёхи китмаӆ.

Оӆаң письмайӆ 23-мет Айтахаят потты тыӆащн 1942 таӆн ханшмаӆ. Аңкеӆа па опиӆаӆа, апщиӆаӆа тумтака уӆтыя ханшмаӆ. Ӆув яма уӆтаӆ. Рупаттал. Яма ӆапатты, хуӆмпуш хатаӆн. Ӆув пиӆэӆн Сергей Иванович Тогачев уӆтаӆ. Лув письма ӆувеӆ тувмаӆ, ёша миймаӆ.

Кимет письмайӆ ханшмаӆ 24 хатӆ Яӆаптаӆ тыӆащн 1943 таӆн. Щита ханшаӆ айӆта ляль пеӆа китты питамт. Ӆув нэпек письмайӆ хоща иӆта хоӆна Степан Пугурчин камтса ясаң рутӆаӆа ханшман китмаӆ.

Хуӆмет письмайӆ 10-мет хатӆ Курк тыӆащн 1943 таӆн ёхи китмаӆ. Ханшаӆ: муң яӆап сохн ӆуматтысаюв. Ляля туӆаюв. Муя па нын манэм нэмоӆты айкеӆ ант ханшсаты… Муң вет хоят Ӆорвош районэв эӆты – Хашкурт, Ӆорвош, Ямкурт эӆты Степан Пугурчин, Васьёханов эӆты Арсентий Чупров. Там письмаем юшн манман ханшӆэм. Паяма уӆаты!

Щи па нэмоӆты ӆув ант ханшиӆыяс. Туп айкеӆ ёхтас: «Георгий Петрович Пастырев 9-мет хатаӆн Уйтӆор тыӆащ 1943 таӆн немщатн паратам…»

Щи письмайӆаӆ яма самаңа шависаят ӆув рутӆаӆн. Татьяна Орлова щи письмайт Ӆорвош район музея шавиты масӆы.

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

8 + 2 =

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!