Нажмите "Enter", чтобы перейти к контенту

Изьватас ныылӧн ветлалӧмъяс

Last updated on 22 сентября, 2021

Ирина Терентьева шоччӧма Россияса лунвылын да ассьыс туй гижӧдъяссӧ ыстiс миян

Краснодар крайын ме вӧлi ӧтпыр – школаын на бура велӧдчӧмысь сетiсныс Анапаӧ путёвка. Таво, артмӧ, мӧдысь Россияса лунвылӧ ветлi, ныыёртъяскӧд Сочиӧ шутёвтлiм. Мунӧм водзын быд боксянь ёна и позедлiсныс: короновирусӧн висьысьыс сэн уна, и да юясыс йӧмӧмась да веси карса уличаяссӧ пӧдтӧмась, и саридзыс нясьтысьыс-нясьти. Кучи нин думатчыны, мый лунвылӧ ог шоччыны, а лёкыслы паныд водзасьны мӧдӧдча. Сэсся тай ёртъяс да тшӧтш и удж вылысь коллегаяс благословитысныс жӧ туйӧ петны. Мунi Сочиӧ, а веськалi… Важӧн нин гӧгӧрвои-казялi, мый карын зэй ӧдде воша-ылала. Картаясӧн ог куж вӧдитчыны, путатча. И ӧнi лунвылӧ мунтӧдз став тӧдса-матыссалы юӧртi, мый Сочиӧ мӧдӧдча. А гостиницаыс, меша, абу кар шӧрын. А сэтчӧ воӧм бӧрын мӧд лунас ёртъяслы висьтала, меша, ныыяс, телефонӧ йӧмӧма петкӧдлӧ, мый ми Адлерӧнӧсь. А ми Адлёрӧнӧсь, висьталӧныс менум ныа. Тайӧ Сочилӧн район. Сочиӧдзыс час кымын колӧ машинаӧн мунны. Но, меша, ладнӧ, Адлер кӧ и Адлер. Лунвыы карын ӧторни синмӧ шыбитчис, мый ныр-воманыс масканас тан вӧдитчӧныс зэй эчаӧн – куш ныа, код вӧлись на воӧмась кытыськӧ. Ни лавкаын, ни кафеын миян из тшӧктыныс маскаасьны. Асланыс уджалысьяслӧн ныр-вом ветчӧдыс унджыкысьсӧ тшӧка выланыс вӧлi. Отельӧ оомӧдчигӧн миянысь быдӧнлысь корисныс ковидысь письтиасьӧм сертификат либӧ ПЦР-тест справка, мый он вись. Тӧдсаяс жӧ, кодъяс оомӧдчӧмась каргӧгӧрса станицаясӧ, висьтоолiсныс, мый нылысь никод нинӧм абу корлӧма. Карас тай стрӧгджык та бӧксянь-а. А гожӧялӧныс кудз? ӧтуввезйын (интернетын) сералiсныс, мый Краснодар крайын йӧзыс весиг сутса гожъялӧныс, пляж вылас оз тӧрныс да. Шойччысьыс забыль зэй уна! Быд дас минут мысти Адлерӧ пуксис Россия пасьталаысь кельыд куа йӧз вайӧдан самолёт. Век жӧ гожъялiм иг сутсаӧн, кӧть и жар шондi улын местасӧ дыр жӧ корсьлылiм. Сочи дорса сиктъясас, сiдз шусяна частнӧй секторын, шойччысьясыс эчаджык, ставлы выйим кытчӧ бура инасьны, но сэн гажӧдчыны петоолыны никытчӧ, колӧ автобусӧн карӧдзыс ветлыны. Но быдӧнлӧн аслас кӧсйӧм: кодi окотитӧ куш мореын уялыштны, бӧрйӧ дзоля станица, а кӧсйӧ кӧ купайтчӧм-гожъялӧм бӧрын лунвыыса кафе-ресторанӧ пыролыны, оомӧдчӧ карса отельӧ.

Абу гусятор, мый Россия лунвылын отпускасьӧмыс суйӧр сайын серти ёна донаджык. Границаяс сиптӧдз ми эськӧ думайтiм мӧд муӧ шутёвтлыны, но пандемия дырйиыд иг тай смелмӧдчӧй. Пляж вылын тӧдмасим Мурманскысь Маринакӧд да сылӧн семьякӧд. Аньлӧн висьтасьӧм серти и позис гӧгӧрвоны, ёна-ӧ торъялӧны донъясыс Россияын мукӧд странаяс серти. – Быд во на верӧскӧд да челядькӧд ветлалiм Турцияӧ. Токо таво поозим, мый границасӧ бара тупкасныс да йӧрмам сэтчӧ, – юксис том ань. – Но таво татчӧ, чайта, медводзаысь да и медбӧрысь локтiм. Выытi нин дона ставыс. Суйӧр сайын быд рыт отель бердын дон босьтӧг нуӧдӧныс гажъяс, сыдз шусяна анимация. Тан выйим жӧ сэтчӧм, но пыран билетыс 700-1000 шайта. Став семьяӧн кӧ мунам – 4 сюрс шайт колӧ мынтыны, а дас луннас – 40 сюрс шайт вештыны куш сы вылӧ, медум рытъяснас кык час гажӧдчыны. – Телевизор пыр частӧ висьтоолӧныс туризм сӧвмӧдӧм помлась. Но мый кӧть ин шу – мортыд мунас сэтчӧ, кӧн донтӧмджык да сыдз шусяна сёрниыс бурджык. Жаль, но тайӧ абу миян канму. Уна во нин гырысь каръясын туристъяссӧ дӧнзьӧдӧныс быдпӧлӧс пемӧсӧ пасьтасьӧм аниматоръяс. Матыстчӧныс да вӧзйӧныс – вай снимок карам. Йӧзыс окотапырысь фотографирутчӧныс ныкӧд асланыс телефон вылӧ, а сэсся «пон» либӧ «осёл» кучӧныс «усьласьны», скӧрпырысь сьӧм корӧныс. Ми пӧ тiянлы услуга сетiм, а сыдзкӧ, и вештысь таысь. Кӧть эськӧ водзвыы никутшӧм сёрни та помлась из вӧӧ. Уджалӧныс тайӧ аниматоръяс челядь пыр. Матастчӧныс зонпосни дорӧ, корӧныс ныйӧ снимайтчыны, а сэсся ай-мамлысь тшӧктӧныс кошельсӧ восьтыны. Уна и корӧныс, сё шайт нылы оз тырмы. Карас улича-туйя-сыс бурӧсь да, гашкӧ, сыйӧн машинаӧн журъялысьяс зэй ӧдде ветлӧныс, ӧта-мӧдлы сигналитӧныс. Сэк жӧ Адлерын, шуам, ни ӧтик светофор иг аддзылӧ. Оллӧ, зэй дыр туйвежын сулалан, виччысян, кор машинаӧн журъялысьяс уличасӧ вуджны лӧдзасныс. И частӧджык татшӧм позянлунсӧ сетӧныс мукӧд регионса номера машинаяс, а оз Краснодар крайсаяс, кодъяс бусьтӧ тэ вылӧ и лэбеныс, и веськойд нылы, дэйдитан-ӧ тэ уличасӧ вуджны. Видзӧда да, менам гижӧд серти артмӧ, мый Сочи-Адлерад и тайӧ лёк, и сыйӧ лёк. Абу жӧ. И бурыс тэрме. Миянлы зэй ёна мойвиис поводдянас – вотӧдзнум кисьтӧма-зэрӧма, и Сыктывкарӧ бӧр лэбан лунӧ бара жӧ ёна кымрасис. Бусьтӧ миян ради тайӧ дас лунсӧ шондiыс пӧжӧма. Тан забыль ставыс выйим, кудз шуласныс, инфраструктураыс бур. 2014 вося олимпиада кежлӧ уна мый стрӧйтӧмась-лӧсьӧдӧмась, и ставыс тайӧ туризм водзӧ сӧвмӧдӧм могысь ёна кивыы.

Сэн и тан позьӧ кӧртымооны автомашина, велосипед, электросамокат. Саридзыс сӧстӧм. Шойччысьялы вӧзйӧныс быдсикас экскурсиясӧ. Кадыд кӧ выйим, позе и Абхазияӧ ветлыны, сэтчысь мичлуннас любуйтчыштны. Ми ыджыд лайнерӧн петоолiм саридзӧ рытъя Сочиӧн нимкодясьыштны. Уна во нин зэй окота вӧлi аддзылыны Олимпиада парк, ветлалыштны сэн, кытчӧ частӧ волылӧныс нималана спортсменъяс. Ветлiм, лолыштiм кольӧм Олимпиадалысь сынӧдсӧ, карим снимокъяс. Кӧсъя-ӧ мӧд гожӧмнас тан шойччыны? ӧнi шуа – ог. Радейта восьтыны аслум выль инъяс да муяс. 2014 вося Олимпиадалӧн девизыс вӧлi: «Пӧсь. Тӧло. Тэнад». А Сочи помлась ме эськӧ дженьыда шуи тадз: «ӧнiя. Уна йӧза. Дона».

Ирина Терентьева, г.Сыктывкар.

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

9 + 1 =

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!