Нажмите "Enter", чтобы перейти к контенту

Сьӧкыд, но ме жӧ вына

Last updated on 19 сентября, 2021

Мыжыын во мысьти Анна Александровна Худалей пуктас изьватас чом. Мыля, кодлы, кытысь – тӧдмалам сёрниын

Некымын вежолун саыйн петiсныс администрация водзӧ уна водзмыстчысь морт асланыс проектъясӧн. На пиын вӧлi и Анна Александровна Худалей, код петiс водзмыстчӧмӧн пуктыны изьватас чом. Вермис грант. «Дас вит во сайын карим изьватас керкасӧ, а кор сэтысь мунi менам пыр вӧлi дума чом пуктыны. Сэсся кудз уна челядя мамлы сетiсныс мутор. Висьталi Анна Геннадьевна Брусницыналы думъясӧс и сыа поддержитiс, шуис, мый колӧ гижны грант. Ме сылы висьтоолi, мый и кудз ме мӧда, а сыа бура грамотнӧя гижис», – шуӧ вермысь. Ныыяслӧн ставыс артмис – грант шедӧдiсныс. Тайӧ сьӧкыд туй, грантыс, но сьӧм никор из вӧ кокни шедӧдны. «Дзолясянь ми пыр кылiм чом олӧм помлась. Ми керкаанум пыр вӧлiс чом олӧмыс. Уна кӧрдорса народ становитчилiсныс. Став кӧрдорсаыс менум рӧднӧй народ» – казьтылӧ Анна Александровна. Кузьма прадедыслӧн вӧлӧма нёль пи и ӧтик ныы: Федот, Филат, Яков, Михаил и Александра. Ныа вӧлӧмась кӧрдорса народ. Волӧмась Ластаысь Архангельскӧй губерниысь, ӧнiя Изьва районысь. Кузьма вайӧдӧма став семьяссӧ, кӧрсӧ Лорвож пелесӧ. Менам дедӧ Михаил. Сылӧн бабаыс вӧлӧма Сартыньяысь, кулӧма кор Александр Михайловичлы, Анналӧн айыслы, вӧлӧма кык ар. Колемась куим аяпия, волӧма на ыджыдджык вок Саньлӧн – Андрей. Вӧрзялӧмась Лорвож муяс-сянь Карскӧй мореӧдз.

Кор вӧлӧма Александр Михайловичлы кызь кык ар корасьӧма Хозяинова Мария Фёдоровнаӧс. «Мамӧ висьтоолiс суседӧн олiм, а айыд вӧлi сэтшӧм чольӧб. Муна рэбита вылӧ, а сэтӧн айыд кӧр куле. Шутитӧмӧн менӧ ортсооны кӧрсӧ кульны. Вӧлӧма мамӧлы дас окмыс ар, ныа гӧтрасьӧмась. Мамелӧн волӧма полӧм, кор воӧма чомйӧ, нинӧм абу тӧдӧма чомса олӧм помлась. Колӧ сэн и лямкаасьны, чомсӧ разьны-пуктыны, поньтооны, вольпась лэсьӧдны. Айӧ ставсӧ ортсалӧма карны и висьталӧма, мед сыа нинӧмысь из по», – радпырысь казьтылӧ ай-мам-лӧн ныы.

Ай-мамыс чомйын ветлалӧмась токо вит во. Нылӧн рэдитчӧлӧма кык челядь, но, сьӧкыд чомса олӧмысь, кулӧмась. И кор Мария Фёдоровна тырсялӧма двойнякаӧн, врачыс тшӧктӧма кольчыны керкаӧ. Вит вонас ань ставсӧ велалӧма карны чомйын, весиг аньяслысь челядь примиталӧма, сэтшӧм народсӧ шуӧныс – гӧг баб. Мария карӧма сыйӧ томен, но вӧлӧмась бур пэрысьджык велӧдысьяс. Абу полӧмась, сэсся вӧлӧма никодлы ылыс тундраын – колӧ и карӧныс. «Маме бура вурсис. Гӧнасӧ ставсӧ вурис: и пим, и мальча, и тэбӧк, и кынь шапкаяс. Айӧ кулiс сизимдас сизим арӧн и медбӧр лунӧдзис вӧлi кӧрдорса олӧмыс сылӧн сьӧлӧмасс. Арнас пыр висьтоолiс, мый ӧдденин кӧрыс воас – свеж вир юам. Няр мальча гожӧмнас пасьталас, пукалӧ и висьталӧ, мый проть абу жар сылы», – юксе миян ёрт. Анналӧн мамыслӧн волӧма зэй топыд семья. Фёдор Миронович дедыс воӧма татчӧс муясӧ дас сизим арӧн Мохчаысь. Мирон прадедыс кузнечӧн жӧ волӧма, Степан вокыскӧд да пиискӧд татчӧс важъя вичколысь крышасӧ дзоньталӧмась-вочӧмась. Вӧлӧмась ыджыд труженикъясӧн. Кор Фёдор Мироновичлы волӧма нелямын ар, бырӧма гӧтырыс и колема сыа вит челядьӧн ӧтнас. «Сыа корасьӧма Катя бабӧс. Бабелы вӧлi кызь ар, но прабабӧ сетӧма. Катя баб ортсалӧма кыпӧдны челядьяссӧ, а куим во мысьти ассьыс вайӧма», – казьтылӧ Анна внучканыс. Фёдор Миронович уна кыйӧма лэбач да чери. Вӧлӧма зэй прӧст мортӧн, ортсасьӧма ставыслы и Мария ныысӧ сыдз велӧдӧма. «Дедӧ ваяс утка, чери и тӧчас ыджыд тазйӧ и мамелы тшӧктӧ, сыа вӧлi меддзоля нылыс, ӧтiя ну ӧталы, ӧтiя ну мӧдлы. И маме вдӧваяслы да салдат-каяслы нулӧма. Менам вӧлi зэй бур семья. Айӧ-маме, чомйысь кольчисныс – образованньӧ никутшӧм из вӧ, нёль класс ӧштӧдӧмась, колӧма ортсасьны семьялы и школасӧ четӧмась», – шуӧ Анна Александровна. Миян ёрт меддзоляӧн вӧлӧма кыкнан рӧдас. Ставыс сылы сетӧмась ассьыныс радейтӧмныссӧ, сыйӧн Анна пытшкын сы мытта пымыс и бурыс. Анна Александровна тӧдӧ уна примета, велӧдӧма таӧ айыс. – Шондi пыранниныс пемыд – мӧдасы зэрас, – шуӧ ань, – небесаыс вылын, сӧзь – кӧйдӧдас. Бергӧдчам бӧр чом дорас. Анна Александровна нин аддзӧма морт код карас, и сыа нин карӧ, ыыяс. Полина Егоровна Филиппова Харсаимысь вермась сетны ӧтик нюк. Чомйыс кучас сулооны во гӧгӧр, сыйӧн колӧныс и нюкъяс, и брезентъяс. Анна Александровналы чом вылас сетiсныс сё ветымын сюрс шайт. Дзонь чом вылӧ, тӧднин, оз судз, но тайӧ ыджыд ортсӧг. «Ме мӧда сыдз карны мед сыа вӧлi менам рӧдӧвӧй местӧ. Мед став дедъяслӧн, айӧлӧн лолыс сэн вӧлi. Енмыс кӧ ортсалас – ставыс артмас. Мэда, мед гармонь чомъяс вӧлi. Менам дедӧ и айӧ зэй бура ворсiсныс. Миян пыр керкаын нимлун-праздникъяссӧ айӧ босьтiс гармонь и ми сьылiм. Мэда, мед вӧлi эргӧн посуда. Миян уна вӧлi, но маме сеталӧма, куш ыджыд поднос коли. Мэда, вурны гӧна эддяла, баляысь. Дзолянанум бабӧ дорын пыр сы улын узьны любитiм. Колӧныс став вольпасис: балаган, перина, вольяс,подушкаяс. Латаяс да пызан колӧ карны, пач ньӧбны. Мэда, мед ставыс вӧлi кудз важӧн», – казьтылӧ ань.

Выйим Анна Александровналӧн и дум авко вайӧдны. Кучим сёрнитны, кудз да мыйӧн вердны, сэк менам ёрт воссис мӧд бӧксянь – бурдӧдысь. «Нитш – зэй бура лёксӧ пытшкад вие. Ми нитшсӧ чукартам, юам. Ме сынас ставсӧ лечита. Пие дзолянас зэй висис, сдайтiм анализ петкӧдiс лёк вирус. Висьталiсныс юны вына лекарство, но сыа дзоля и ме полi. Ютi нитшнас – висьӧмыс мунi. И сэсся кучи народлы висьтооны, мый нитшыс лёксӧ вие. Заваритан литровӧй банкаӧ: джынсӧ нитш, а джын пым ва, позе вотыс содтыны. Час мыда сулалас и ю васӧ. Кыкысь позе сы нитшнас заваритны. Ме пыр думатча, мый ачум ме нинӧм ог куж, ставсӧ ортсалӧныс, код водзджык меысь олiс. Менам дедӧ, мамесянь, Фёдор Миронович, сыа вӧлi кузнеч и сыдзжӧ лечитӧма народ. Йӧзсӧ бурдӧдӧмыс менум кудзкӧ ген кузя воис. Комын во сайын нин кучи киӧн лечитны. Вощан кӧ, кужӧмыс, туйыс ачис кияд локтӧ. Менам дзонь библиотека, ӧторни велӧдча, лыддя, корся. И тӧдӧмлунӧястӧ пыр, ме думатча, колӧ сетны мӧдлы, ортсооны. Кор аддза, мый мортлы колӧ ортсӧг – матыстча да предложита ассюм ортсӧг. Ме велӧдчи фельдшер вылӧ, томнам, сэсся из вӧӧ кытӧн ооны и ме сэтысь мунi, но Гиппократлы вед клятва сетлi. Уна морт волылӧ ме дорӧ», – юксе миян ёрт. «Изьва муӧ ветла, эча ола сэн, воа и сы мытта менам пытшкын вын, дума. Нолӧдлi сэтчӧ и челядьӧс. Даня пиӧ, вӧлi дзоля и дивитчис, мый сэн ставыс сёрнитӧныс изьва кылӧн. Менам пыр юрын вӧлi , мый колӧ карны изьватас керка . И кор кучим карны-нуӧдны «Чужан войтыр» фестиваль, меводзысь миме воис сё кызь морт. Уна во нуӧдiм. Дас во сайын, кор рэбитi методистiн клубын, вӧлi «Кӧрдорсаяслӧн луныс», ме висьталi, мый колӧ пуктыны изьватас чом. Ми медводзысь пуктiм изьватас чом. Ульяна Ивановна Рочева, мамелӧн зэй бур ныыёрт, ветлалiс чомйын, сыа менум ортсалiс. Лунтыр ми гӧстьяс примитiм, вердiм. Сыдз мыдзи, топсе нӧйтiсныс менӧ. Сэтшӧм нылӧн сьӧкыд рэбитаыс. Но тайӧ аслад рӧднӧй делоыд сетӧ уна вын», – висьталӧ Анна ёрт. Дас кӧкъямыс арсянь нин Анна Александровна ветлалӧ Изьва муӧ. Медводзысь нуӧдӧма сэтчӧ коми хорсӧ: «Мыля ме уна тӧда, мыля ме ордын вӧлiсныс статнӧй бабаяс, менӧ велӧдiсныс. Кудз бура-правильнӧйя пасьтасьны. Анна чӧтӧ, Агафья Ивановна, Дина Константиновна пыр ортсасисныс менум. Но медшӧр велӧдысьӧн менам олӧмын вӧлi менам маме. Кор рэбитi телевиденньӧ вылын, пыр висьтоолiс кудз, мый бура висьтооны. Коркӧ гижис-серпасалiс чом и кудз сэтӧн ставыс шусьӧ. Менам сыа пырна выйим. Семья – тайӧ медшӧр институт, кучан кӧ кыызыны ай-мамтӧ – велалан ооны. Ме пыр ны дорын олi, медбӧрӧдз киясныссӧ кутi». Анна Александровна тӧдӧ ставсӧ Мыжыын, ставыскӧд сёрнитӧ и сетӧ ассьыс олӧм дорӧ радейтӧмсӧ, бур русӧ и пымсӧ. Ми кӧсъям, мед ставыс енбия аньлӧн артмас и ми вермам юны чай ыджыд изьватас чомйын!

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

37 + = 38

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!