Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

«Васюган эӆты ям номсат тайӆом…»

Last updated on 25 октября, 2021

Щиты ястаӆ Владимир Егорович Енов. Там сусн ӆув Средний Васюган Каргасокской район Томской область мувн уӆмаӆ, шошия уӆты щи куртаң арсыр мират пиӆн литературной ванлтупса вермаӆ

Щи уйтантопсэӆ «Хуӆ веӆпасӆаты ху вуш эӆты па писатель вуш унты» нэмн юкантмаӆ. Васюган хоща иса ин тамхатӆ унты щорас-кем ханты хоятат уӆӆат па ӆув арпелак сыр-сыр мират пиӆн ияха ӆыӆтассат па рут ясңеӆ муй воӆты-хоӆты щирӆаӆ хоӆыева ёрэмасӆаӆ.

Щи еӆпина ӆув ашкулайн утаӆтаты няврэмат ураңан потартас хоты ӆув ус па рупатас. Ӆув ханшам па актам монсьӆаӆ па ӆуңтарӆаӆ ӆуңатсаӆӆы па потарсаӆы. Ӆув Россия мувев Союз писателят тахийн уӆты моньщат ханшты хоят. Ин мосӆ ястатыя, муй щирн 20 таӆ ёхӆы пеӆа, айшак хоята уӆмаӆ порайн, Владимир Енов Васюган мувн Новой Тевриз куртан таӆаң 10 таӆ сыс хоттэӆ ёхӆаӆ пиӆн ус. Щи хув тахайн ӆув кутоп ашкулайн рупата тайс па иса сыр-сыр мир няврэмат, щи кутн: рущат, украинцат, поволжской немцат, туркат-месхетинцат, хатанят па Васюган хантэт ямсыева рущ ясңа па литературая утаӆтас. Юхат ашкула етшоптаты няврэмат ӆувеӆа кашаң товийн экзаменат масат па арсыр тахаята еӆӆы утаӆтатыя ӆэщатысат.

Щимащ верат эӆты Владимир Егорович тамиты потартас: «Ар мир няврэмат пиӆн рупитты манэма щи 1990-мет таӆатн кен хун ус: тыӆащ охан иса ант па сохоптасаюв, щутщаты тыӆщат юкана муң кашаң ӆуң сыс хуӆ веӆсув, тови вуш эӆты па иса суса питты вуш унты торн версув. Ванта, щи порайн ямкем ар хотаң войт энмаӆсув. Щи тумпийн, муңева уӆты хот, певаӆты хот муй па мисхотат омассув. Щаӆта ям араткем ун картопка харат, мув харыйн эномты ӆэтотат пиӆн па ёшӆы-курӆы питты вуш унты иса щата щи волкемасув. Ин па, ма щирэмн, щи йис пора верат ищипа манэма ар ям онтас версат: тамхатӆ ма утаӆтыём арсыр мир няврэмат хоӆыева уна йисат, ӆув воӆаң ун пумащипа ясаң ястаӆат па туп ям щирн ин манэм нумӆат. Ма щи похат па эвет утаӆтом онтасн туңа щира па туса рущ ясаңан потрэматыя па ханштыя утаӆтысом. Мосаң, щимащ верат ураңан тамхатӆ ханты моньщат ханшты хоята йисом».

Литературной уйтантопсая ёхтылыем няврэмата моньщат ханшты хоятэв потартас, муй щирн ашкулайн утаӆтаты арсыр мосты верӆаӆ тумпийн, ёӆн ищиты арсыр вератн аңкиӆаӆа-ащиӆаӆа арсыр рупатайт щирн нёттыя мосӆ. Ванта, яма нумасты па рупитты хоят ван муй хув кутн ищи ӆувеӆа мосты номасн ёхатӆа. Щи номсаӆ онтасн ӆув айӆтыева па еӆӆы уӆопса щираӆн ищипа ям рупата муй ӆув самаӆа питты вераӆ ёшңаӆаӆа паитты щир мощатӆ. Тамиты щи Васюган мувн уӆты хантэт па арсыр мир похат па эвет хорасаң ханты ясаң хуӆантсат па оша версат. Ӆув ясаңӆаӆ щирн, ин тамащ литературной уйтантопсайт еӆӆы ищиты туңа-щира ӆэщаттыя мосӆат!

– Катра там мувн уӆмемн па рупатмемн мортаң ёх ӆув рут ясңеӆ хоӆна яма уитсэӆ па тайсэӆ. Ма упомн Владимир Сергеевич Кучуков шуңатн ай хопн (рущ щирн «обласокн») яңхты, хуӆ па арсыр вой веӆпасӆатыя па ӆув ясңеӆ хуӆты щи ханты мувн нэман утаӆтасаём. Юхат, ванта, ӆув сорма питас па манэма арсыр вер оша паитмем юпийн ищипа еша кеншак еӆӆы уӆопсаемн щирн щи мувн ус, – ястаӆ Владимир Егорович. – Щи вер ураңан ин тамхатӆ унты Васюган (рущ щирн «коричневая вода», ванта, арсыр кал лотат эӆты ай ёхана щи йиңкат ияха овӆат) мув эӆты туп ям номсат тайӆом.

– Таӆаң 20 таӆ ёхӆы пеӆа Васюган эӆты па тахая касаӆтсом па ищипа нумӆэм, муй щирн тата усом-хоӆсом, – нумаӆмас Владимир Енов. – Там ӆыпат хойты тыӆащ 20-мет хатаӆн ма куртаң хоятат ураңан литературной уйтантопса версом, мата отэм лэщатом порайн ханты мирэм, ӆув ясңаӆ па культурайӆ эӆты сыр-сыр айкеӆат тусом. Ма щирэмн, мосӆ ястатыя, хоты кашаң хоята шеңк умащ ус ханты потропса хуӆанты, муйсыр отат юхат ма ищиты ямсыева рущ ясңа толмащтасом. Щи тумпийн, ма ханшом моньщӆам ӆыеӆа рущ ясаңн моньщсом.

Мояңа ёхтам хоята куртаң ёхат муй нэңат иньщассат, муй щирн кимет муван хантэт уӆӆат, ясңеӆ, уӆты-хоӆты щирӆаӆ еӆӆы пеӆа тайӆат муй анта. Муй хорасоп яӆоп законат ин муң мирэв ураңан яӆпа нэпека ханшса, ашкулаятн па па тахаятн утаӆтаӆайт муй анта ханты ясаңан па муй щирн хантэт там кутатн Ямал, Югра хоща уӆӆат.

Владимир Енов потарӆ: – Васюган мувн уӆман, рут ясңием, мирэм такӆы шеңк пора-порайн манэма ӆаварт ус, мосаң, щи ураңан ма тамхатӆ вуш унты самаңа ясңем тайӆэм!

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

20 + = 23

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!