Нажмите "Enter", чтобы перейти к контенту

Ун леккар ханты ай куртые эӆты

Last updated on 26 ноября, 2021

Владимир Прокопьевич Ругин тампуш нийӆъяң таӆ сэма питам хатаӆ поснтас

Ӆув Ас потты тыӆащ 15-мет хатаӆн Ханты-Питӆор куртан сэма питас. Айтэӆн ащеӆ эӆты утӆас хуӆ па вой веӆты. Щиты, мосаң, ӆув еӆӆы вой веӆпасӆыман ус ӆулн, па ашкуӆаян утаӆтыты пора ёхатмаӆ…

Меет оӆаңн Ханты-Питӆор ай ашкулаян утаӆтыяс, щаӆта Питлор куртан, па еӆӆы Мужи воошан. Аяшк уӆам пораян ащеӆ мушн ёхатӆа па антома йил. Сишн ашкула етшаптам юпина, Владимир Прокопьевич, нумас понаӆ еӆӆы леккара утаӆтыты мантыя. 1959 таӆн ӆув Омск нэмпи воша манаӆ. Щита Омский государственный медицинский институт имени Калинина лечебно-профилактический факультет хоща утаӆтыты вуӆа. Щита ӆув шеек яма утаӆтымаӆ, па нумас понмаӆ хоты ямашк нёттыя шоши хоятӆаӆа тумтака уӆты па арсыр муш эӆты шавитыя. Меет оӆаң ханшам нэпекаӆ таяс нэм – «Работа фельдшерско-акушерского пункта в условиях Крайнего Севера».

Утаӆтыты етшам юпина, 1965 таӆн, мохты Пулңавта рупатты китӆа. Щит медицинский училище хоща энамты ёх ямсыя утаӆтас. Щаӆта заместителя директора по практическому обучению понам. Щи тумпина окружной леккар хотан ун леккара рупатас. Щита ивевн шоши шимӆаң рут мир хоятӆув ӆыӆ вантыяс. Нумасас хоты рахаӆ сорашк нётап верты ай куртатн уӆты хоятата. 1976 таӆн, ӆув, ун леккара уӆамн, шеек мосты нётап ханшмаӆ па ӆэщатмаӆ – «Положение о передвижном, постоянно действующем отряде в условиях Крайнего Севера». Ин щи нэпекаӆ пиӆн леккарат зхоӆна рупатӆат. Кимет таӆатн хоӆна меет уншак тахаян рупатман, ӆув округ ӆоватн, районатн передвижной отрядат леккарат эӆты верас. Щимащ отрядат ай куртата, тащата, хотата яңхсат. Ар хоята нётап па тумтак версат. Ар хоят муш эӆты нох паятсат.

Ӆорвош районэвн ӆув ар таӆ куща леккара рупатас. Тата ӆув ар нётап шоши хоятӆува верас. Хуӆ веӆты ёх па вуӆэң ёх ватты ураңна леккарат веӆпасты паната па тащ хотата китыӆыяс. Ин там йис щиты леккарат воӆаң ант яңхӆат.

Владимир Прокопьевич рупатаеӆ шеек яма верӆаӆы па вещката тайӆаӆы. Щи ураңан хоятатан ям нумасн нумӆа. Ӆув пирыӆыса вице-президентом Ассоциации «Ямал-потомкам!» по вопросам здравоохранения. Щаӆта народным депутатом окружного Совета рупитыяс. Ар ишканщап нэпекатн мойӆыӆыса арсыр тахаят эӆты. Хуӆампуш почетный грамотаян губернатор эӆты китыӆыса. Медицинский Совет эӆты Владимир Ругин мойӆам Высшим национальным орденом имени Гиппократа за выдающиеся заслуги, вклад в развитие науки, медицины па здравоохранения.

Ин Владимир Прокопьевич пенсияян уӆ па сютчаӆ. Хоятатан яма нумӆа. Ар ям ясаң там сэма питам хатӆаӆан ӆув эӆтэӆ ястаӆа.

– Няӆъяң моӆтас таӆ ӆув леккара рупатас, яртьяң таӆ – Ӆорвош районэв леккар хот кущая, – ястаӆ Ӆорвош район куща, Олег Николаевич Попов.

– Хун ӆув районэв депутата уӆмаӆн ищи ар нётап шоши хоятӆува верас, – потартаӆ Елена Леонидовна Рочева. – Районэв ӆоватн нэпек ӆуңатты хотата нётас нэпекат па книгаят тутыя. Таӆаң яң куртата нётап верас! Шеек ям!

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

+ 70 = 74

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!