Добро пожаловать на сайт газеты to Северная панорама   Click to listen highlighted text! Добро пожаловать на сайт газеты to Северная панорама
Нажмите "Enter", чтобы перейти к контенту

Изьватас керкалыдас вит во!

Last updated on 16 декабря, 2021

Мыжы вӧлэсьтын И.Г. Истомина нима улича вылын сулалӧ зэй мича да гажа «Изьватас керка». Сэтшӧм музейыс округ пасьтаас туч ӧтік. Дас вит во сайын медводзысь воссис ӧбэсыс тайӧ керкаыслӧн. Сыа вӧлі дасӧд лунӧ кык сюрс квайтӧд во вылын. Тая пасыс пырис культурнӧй олӧмас Лорвож районыслы. Сы лунас быд во сідзжӧ пасйеныс и Лорвож районлысь нимлунсӧ. Медводз веськӧдлысьӧн изьватас керкаас вэлі Анна Александровна Худалей, код зэй бура тӧдэ став культурасӧ, олӧмсӧ и кыысӧ изьватас йӧзыслысь. Ачыс чужлӧма изьватас семьяын, Конев чукарас.

Кыпыда восьтыны тайӧ музейсӧ воліс и зэй дона гӧсь Из сайысь Сыктывкар карысь, заслуга культураса деятель, сьылысь Василий Прокопьевич Рочев. И кор «Изьватас керкаыслысь» тырис дас воо, сыа баражӧ воліс гӧсти и ас сьыланкыыяснас гажӧдіс йӧзсэ.

Изьватас керкаыс карӧма гӧгрӧс керйысь, вейтыс нёль ската важья моз. Музеяс кык жыр, кӧн петкӧдлӧныс быдчема пӧлэс важья лес. ӧтік жырйыс лӧседэма изьватас керка пытшкӧс моз дасокмыс нем помсянь да кызь нем шӧрэдз. Став лессӧ ваисныс и водясем вылэ сетісныс Мыжыса да районса олысьяс. Эстэн позьэ адзьыны пуысь карӧм тасьтіяс, паньяс, чашкаяс, сундукъяс да посуда шкапьяс, тшугуньяс, ульӧ видзан крынкаяс. Серпасалӧма роч пач дорас сулалӧныс нянь зыръяс, шомкыскалан шыпка, крук. Сэн жэ кэтшас манера пелесын сулалэ ва видян бак сюрс кӧкъямыс сё сизим дасквайтӧд вося, подонича, важья ас карӧм пызан да лавичьяс, шомъясамвар, рукомойник, сулок, рач, да нӧшта быдчема пӧлэс лес. Водзын, кӧн пасйӧма узьлан местэыс сулалӧ мича тӧчэма крӧватьдора кӧрт крӧвать, потан и лайкъялан потан – зыбка. Cэн жэ позьӧ адзьыны важья пуысь карӧма да тшугун утюгъяс. Важсянь изватас видзисныс скӧт. Пыр быдӧнлӧн соддораныс баргисныс баляс. Сыйӧн быд керкаын вӧліныс косакозяль да нистысян, печкысян мыйӧн печкисныс вурунсэ, и кыйисныс вурун чулки да носки. Асыывыы пелесас эшалӧ важья образ.

Мӧд жырйыс керкаас лӧседэма вежласян выставкаяс улэ, кӧн сідзжэ позе тӧдмоны изьватас йӧз помлась. Медводз выставкаыс вӧлі карӧма медводз велӧдысьлы, изьватас морт Яков Васильевич Хозяиновлы, кодлы сы пӧраас тыріс сё вит ар. Восьтыгас чукартчисныс став рӧдвужыс и мукэд йӧзыс, код бура тӧдіс тӧлка да зэй радейтысь челядь велӧдысьсэ. Сэк моньыс, Анна Фёдоровна Хозяинова, сетіс водясем вылэ музейыслы быдчӧма пэлӧс снимокъяс да документъяс.

Коли некымын пӧра и выставкасӧ вежисныс. Мӧдыс вӧлі зэй сяма, ӧтік вӧлэсьса велӧдысьлы, серпасалысьлы, гижысьлы, яран кылӧн округ газет редакторлы, Ямалса сьылысьлы, Иван Григорьевич Истоминлы. Сэк Людмила Александровна Филиппова, районса музейысь уджалысь, петкӧдліс и висьтоліс йӧзыслы сы олӧм помла. Быд во нимлун кежас «Изьватас керкаса» уджалысьяс карӧныс сы помла быдчӧма пэлӧс выставкаяс. Сідз жэ нуӧдэныс дзоля челядьяслы занятиеяс И.Г. Истомин мойд кузя. Быд кык либӧ куим месеч мысьті выставкаясыс вежласеныс.

Март тӧлысь кык сюрс кӧкъямысӧд восянь веськӧдлысьӧн «Изьватас керкаас» лои Татьяна Васильевна Ануфриева. Июль месечсянь сы воас же воис уджооны Наталья Ивановна Вокуева. Музейса видедысьӧн вӧлі Наталья Захаровна Вокуева, а бӧрвы арнас нояб тӧлысе вежис Любовь Ивановна Расколова. Сы бӧрын уджалісныс Нина Ивановна Максарова, Надежда Михайловна Ануфриева, Ольга Григорьевна Самсонова и эні во дорӧ нин «Изьватас керкасӧ» дзимлялӧ да ортсасе Ирина Ивановна Мироненко.

Медводз дорйысем «Удал зон» детиная костын вӧлi 2015 во вылын

Уна ва визытіс сы пӧрасянь. Эні водя экспозицияыс тырӧма нӧшта унджык лескӧн. А мӧд жыръяс уджалісныс татшӧм вежласян выставкас кудз: «Видз-му оомӧс районас», «Лорвож РОВД-75», «Важ да бур керкаса кино», «Дзоридз лым пытшкын», код лэседэма вӧлі И.Г. Истомин пьеса сьӧрті, «Важ чачаяс», «Самварлӧн ёрт», «Печкан», «Вына, збой, чольӧб», «Кичышкан, сулӧк, рушник», «Тӧӧло изьватас паськӧм да кӧмкот», «Сыръя чышъян». Сэн петкӧдлісныс уна пӧлэс важья чышъянъяс мукӧдыслы нин вэлі сё ветымын во. Кӧкъямыс вит во Лорвож район кежӧ «Изьватас керкаса» уджалысьяс участвуйтісныс проектын «Эстафета поселений», сэн сулаліс мог: ӧктыны быдчэма дельнэй материал. Сэк Наталья Ивановна Вокуевалы уси пайяс чукартны материал Восяхов да Войкарвом вӧлӧсьт помла. Сы бӧрын петі выставка «Вояховсянь Вершинаӧдз», а Татьяна Васильевна каріс Мыжы да Киеват помлась и сідз водзӧ. Бэкті оз коль и темаыс Ыджыд тыш помлась. «Изьватас керкаын» сы пӧраыс кузя вӧліныс выставкаяс «Герасим Дьячков», кэн позис тӧдмасьны Ыджыд тыш участниккӧд, ветеран Герасим Аристархович Дьячков олӧмен, позис видзӧдны документальнӧй кино сы помла. Нӧшта ӧтік выставка шусис «Снайпер Курской битвы». Сэн позис тӧдмасьны Василий Григорьевич Ануфриевкӧд. Неважӧн коли петкӧдлэм, код шусис «История Мыжыса Госбанклӧн». Дас вит во кежас «Изьватас керкалы» уджалысьяс лӧседисныс выль выставка участниккӧд, кӧн кучасныс петкэдлыны и висьтооны снимокъяс кузя кутшӧм удж вӧли 15 во быднас.

«Изьватас керкаын» нуӧдӧныс быдчема пӧлэс гаж. Медводз ыджыд мероприятиеыс шусис «Изьватаслэн культура лун». Сэк муні челядьяслэн уна йэзкосса этнографическӧй «Важья рэдвуж» лагерь. Сэк ӧктысисныс быдлаысь зэй уна челядь. Волісныс Украинаысь, Россия пасьтаысь, Венгрияысь. Хэть бӧкевей челядь из гӧгӧрвоныс, мый помлась сьылэныс изьватас кылӧн, но вӧліныс радэсь адзьысемвылас. Олыштэма изьватасыс петкӧдлісныс важья кадриль, а венгерса челядь велэдісныс ныйӧ ас йӧктӧмен. Ёрта ёртнысӧ гӧгэр из вооныс, но сэтчедь бура гажэдчисныс да тшӧтш тшай юисныс чӧскыд шаньгаӧн из и казёоныс кудз пӧраыс коли и воис кад янсӧдчыны. Нӧшта изьватас керкаас петкӧдлісныс важья кӧлысь. Лӧседчыгас и нуӧдыгас зэй ыджыд пай пуктісныс: изьватас программа редактор АНО «Ямал-Медиа» М.И. Ёлтышева, Мыжыса олысьяс Т.В. Конева, А.Ф. Хозяинова, А.З. Ануфриева, невестаӧн да жӧнихӧн ворсісныс– Надя Попова да Денис Конев, бӧрдэдісныс – А.И. Семяшкина да Т.З. Попова, невестаыслӧн аймамыс вӧліныс – М.А. Рочева да А.М. Терентьев, женихыслӧн – М.С. Конева да Г.С. Конев, дружкаясӧн – И.Г. Рочев да В.Ф. Попов. Кӧлыссьӧ сэк ворсисныс да снимайтісныс кык лун. Петкӧдлісныс корасем, кикутӧм, бӧрдӧдчем да пир. Ставыслы зэй сьӧлӧманыс воис тайӧ гажыс. Томъяс тӧдмалісныс кудз важӧн кӧлысясисныс, а пӧрысьыс казьтыліс ассьыныс том лунныссӧ. Мӧдпӧна снимайтісныс изьватас кӧлысь, но сы бӧрын петі кык торья кино.

Зэй гажа мунӧныс «Изьватас керкаын» и мукӧд чукар чемьяс, сэтщӧм кудз: Рыттъя пукалӧмъяс Масленича, Рӧжӧство да Ыджыд лун. Ыджыд лун кежӧ пыр соддорас сулалэ ыджыд качай. Том и челядь радпырысь качаченыс сэн.

Кор «Изьватас керкалы» тыріс вит во, сэк нимлунсӧ пасйисныс ворсӧмӧн «Дивнӧй видз».

Быд кык во мысьті Мыжы вӧлэсьтын нуэдісныс фестиваль «Чужан войтыр» и мӧд лунныс пыр вэлі «Изьватас керка» соддорас. Зэй уна сэк йӧз чукатчылісныс. Ставыс югыд да мича изьватас паськӧмӧн йӧктісныс да сьылісныс, бура гажӧдчисныс.

Уджалысьяс сідз жэ оз вунӧдныс пасйыны и ӧтіка олысьяса йӧзыслысь юбилейныссӧ. Мэйми тыріс кӧкъямыс дас да вит ар Фёдор Егорович Коневлы, окмысдас арныссӧ тыртлісныс Анисья Герасимовна Артеева да Фёдор Алексеевич Рочев нимлун кежаныс вэлі лӧседэма выставка да коли мероприятие. Эні сизимед февраль тӧлысь лунӧ кучасныс пасйыны сё вит во Иван Григорьевич Истоминлы чужӧмлы.

Музеяс сідзжэ петкӧдлісныс «Пыртчӧм». Важья пырчӧмсӧ петкӧдліс Татьяна Захаровна Шурышкар вэлӧсьтысь.

Зэй бура коли куим во поманю важья «Кыйсьысьяслӧн лун». Дзоля кыйсьысьяс, школаын велӧдчан детинаяс, дорйысисныс ас костаныс, код ӧдзеджык ӧстас бипур, бураджыка войедас лямпа-лыжӧн, лыйсяс лукен, тӧдмалас зверсӧ синтэг. Мед сямаӧн да бур кыйсьысен пыр лойи Тимофей Ануфриев.

Кӧкъямыс воо нин мунӧ районса дорйысьӧм ныыяс костын «Мича изьватас». Медводз воас вӧлі куш кык ныы, ӧтікыс Мыжыысь, Света Соломатова, а мӧдыс Горкаысь, Ира Айдакова. Мукӧд воясас содчис нин унджык ныы. Детинаяс костын «Удал зон» дорйысем мунӧ квайт во. Эстэн челядьыс изьватас кылӧн висьталӧныс ас помласьныс, сьылӧныс, шуэныс ас рӧдвужныссӧ, петкедлісныс удал лунныссэ. Медводз дорйысемас асьныссэ петкӧдлісныс куим детина Андрей Созонов да Ефим Харитонов Горкаысь и Миша Конев Восяхов вӧлэсьтысь. Бӧрвы конкурсас дорйысисныс ныыяс и зонъяс Шурышкарысь, Овгортысь, Мыжыысь, Восяховысь. Хэть вӧлі и сэтшӧм пӧра кор из позь этла чукарчыны, сэк ордйысемсӧ нуӧдісныс интернет пыр. Учасникыс вэлі уна из куш ми районсюнум, но и Из сайысь, Ханты-Мансийскӧй округысь, Салехардысь.

Быд гожӧм татчӧ сідз жэ волэныс туристъяс быдлаысь и Германияысь, Австрияысь и мукӧд бӧкевей муысь, но уджалысьяс «Изьватас керкаысь» быдӧнлы зэй радӧсь, ставсэ примитӧныс и петкедлэныс ассьыныс культура и олӧмсӧ татшӧм Войвыы мувылын.

Уна быдчема пӧлӧс мероприятиеяс, выставкаяс да чедяльлы занятиеяс нуӧдісныс Татьяна Васильевна да Наталья Ивановна дас вит вонас. Кӧсъям нылы бур шуд, ыджыд мыкыд, вермӧмъяс, нӧштана мед унждык воласныс йӧзыс этійя бур гажа керкаас.

Будьте первым, кто оставит комментарий!

Добавить комментарий

Ваш адрес email не будет опубликован. Обязательные поля помечены *

77 − = 74

1940-2020©СЕВЕРНАЯ ПАНОРАМА Газета зарегистрирована Управлением Федеральной службы по надзору в сфере связи, информационных технологий и массовых коммуникаций по Тюменской области, Ханты-Мансийскому автономному округу - Югре и Ямало-Ненецкому автономному округу. Свидетельство о регистрации ПИ № ТУ 72-01224 от 16 марта 2015 г. Индекс 54344.
Click to listen highlighted text!