Михаил Григорьевич Кельчин шуңта па ӆув похңаӆаӆа – Георгияя па Владимира юкантам потр
Оӆаң шупӆ 1-мет па 2-мет лопсатн ӆуңтаӆн.
Тамась потар хуӆантыяты сары, Михаил Гриuорьевич шуңат ун похаӆ – Георгий номпсат. Асеӆ шуңат иты хуӆ веӆман уӆ, рыпсавотан рупитаӆ. Нумтаӆ сиран, асеӆ шуңат, кашң иӆайн ӆыпең уӆаса омастаӆ, охаӆ еша ёхӆышак понаптаӆ, сэмӆаӆ лап тухартаӆ. Нумастаӆ, нумастаӆ па питты хуӆам хатӆа муй вертыя постатаӆ. «Турм шакты питтаӆ, ӆампа. Сишан хаӆэват хуӆ веӆтыя ант манӆам. Турмаӆ моса кат – хуӆам хатӆ яма ант иӆ. Хаӆэват хоӆапӆам усӆаӆ лап ёонтӆам па ӆопасэм сыстапӆам». Тамиты уӆман мосаӆ кашң вер верты еӆпина ӆарпиттыя, яма моштатыя. Кельчинат кутан Михаил Кельчин паӆатан ӆойм хоят антом ус. Ӆув туп вотся ош тайс ванттыя па уйттыя муй сиран ӆув рутӆаӆ уӆты питӆат кат хуӆам нупат хасьты порайн.
Куран муй мув пуратӆан? Там Кельчиас ноптаӆты пан. Ӆорвоош эӆты ӆапат километра кеман, ов шанш сира манман, уӆ. Тата Михаил Григорьевич веӆпасӆас. Няврэм нях сясяӆ ай хотыи ӆыпи эӆты. Сит ма аңкем яйӆам пиӆан, каникулы пора хайӆ. Тата си Михаил Григорьевич антом туп веӆпасӆаӆ, ӆув няврэмӆаӆ па утаӆтаӆ хуӆ веӆтыя па хот хошам хуӆтыя.
Асат еңка потӆайт, товина еңкаӆ нопатӆа. Ӆонсен питаӆ, сяӆта ӆоӆаӆ. Хоятат нумӆат па ёрэ- маӆат. Ӆорвоошна утхот ху номас уӆ па ясаң вераӆ Михаил Григорьевич юкана памятник ӆосяӆта- тыя. Ешауӆ утхот куся ӆёхиӆаӆ, памятник эӆты па ёрэмаӆа.
Ин па наң моштаӆӆан ин мунты ёнтам няврэмиет? Каматса таӆӆуң сора хасямтас, ермат хотыина ёнтам няврэмиет хуӆ па воой веӆты питсат, леккар сира хоят ямаӆӆат па няврэмат утаӆтаӆат. Ма аңкем там хатаӆ унты си порайт нумӆаӆы, уӆаман вантӆаӆӆы. Кельчиас куртыеӆ вантты ӆытӆа, марэмаман уӆ, тохи яңхты уратаӆ муң пиӆэван. Си муң пан сыӆан ӆйӆӆаюв. Ӆайӆты хоят ӆойӆат ӆайӆасман. Вантаӆан са, сита ай похие ӆойӆ, уты хойты хомпат сый хуӆантаӆ па ныты мув кимаӆ пеӆа вантаӆ. Рутӆаӆ ёхатты ӆайӆаӆ. Муй хорпи хоят там похие эӆты энмаӆ? Моса сераюх иты усемийӆ па хурӆаӆ? Ӆув ляксам хоятӆаӆ хоп ӆыпина усат па рупитсат, ханты мир уӆапса мукарӆаман еӆӆы таӆсат па тусат.
Ас путарна ӆойӆам, утӆы вантӆам, Михаил Григорьвича юкантам памятник ант шияӆасам. Моса сит ураңан ӆув хоӆна ӆыӆаң? Ма ай ӆат пораем там ханшам потрэм- на хайӆэм. Там номпсэман торӆы нумасман тайӆэм, муй ма таӆта еӆӆы ант верытӆам вертыя. Хоят ой ӆув сита си ванан – уйтты па хаӆтэн унты аӆ ёрэми наң сэма питам хотыен, наң сэма питам мув суңиен. Ойен сит си! Уӆмитэнна хотыен уӆамна вантӆэн? Мувем нумты, энмам хотэм нумты Михаил Григорьевич Кельчинна утаӆтасайм. Турм эӆты ма мув Наем хошамна хойӆайм. Пумасипа.
Дмитрий Кельчин ханшам потар.
Геннадий Кельчин ханты ясңа толмащсаӆӆы.
