Ай куртатн энмам хоятат айтэӆн унта яхӆат, вой па хуӆ веӆӆат. Ай пора эӆты вантӆат муй хорпи хорам мувн уӆӆат. Щи вантман моӆты ямшак вер верты уратӆат. Ищиты энмас Геннадий Хартаганов.
Ӆорвоош районэвн Питӆор пуңаӆн ай куртые уӆ. Щит Ханты-Питӆор курт. Там ай куртыенан щи туса вератты-нёхратты ай похие сэма питас. Щи хатӆ 10-мет Курк тыӆась 1945 таӆ уӆмаӆ. Ащеӆ Ефрем Семёнович, хуӆ веӆпасман па вой веӆман рупатс. Ун Емаң ляля немщат пиӆн ляльсты яңхас. Антеӆ Евдокия Егоровна колхозна рупатмаӆ.
Тампуш, ӆуӆн, Геннадий Ефремович нийӆъяң пеӆа веет таӆ юбилей поснтас. Туняӆ, Айкер тыӆасьн ӆув антома ювмаӆ. Ӆув мур ӆоватн уйтӆа. Муй ӆув айтэӆн вантас иса нэпека, тонтыя, юха понтсаӆӆы. Хоты хоят шушӆ, хоты ватӆ, хоты хопн манӆ – иса ӆув щираӆн хора версаӆӆы па нёхарсаӆӆы.
Уӆмаӆн ӆув ӆув эӆтэӆ потартас: «Нёхратты вер айтэӆн самаңа тайӆэм.
Ащем кешет ханяйн вуйӆысӆам. Ашкуӆа юпина вощӆах эӆты камн-хорпи ут войт, щищкет ханаӆтысам. Соӆтана манмемн ханшты юхн хорт ханшты питсам, инты унты щи вер самаңа тайӆэм. Муй арат манэм нумӆэм, уӆтэм хуват иса ханшты па нёхратты вуратӆам. Аӆ щиты омасты ант вератӆам, ёшӆам ӆопиӆат. Нёхарӆам ма щирэмн, хоты манэм ныӆа, хоты ма вантӆам».
Щиты айӆта нёхратты эӆты Геннадий Ефремович верам рупатайӆаӆ мур хуват ванты питсаят. Оӆаңн район ӆоватн, щаӆта округ хуват. Па еӆӆы ун вантапса харата па мувата китсаят, щит – Польша, Венгрия, Чехия, Финляндия, Швеция па Канада мувт. Хоӆна верам рупатайӆаӆ Пуӆңават музеян уӆӆат. Щи тумпина Ёмвоошан па Тюмень, Суздаль, Москва воошатн.
Там пуш сэма питам хатӆаӆ кеша ун вантапса хар Пуӆңаватн, Шема-
новский нэмпи музеян верам. Вантапса хар нэмӆ – «Мой прапрадед
Ханты-Питлярский сор».Оӆаң хатаӆн ар хоят ёхтас: ун куссят эӆты ай
хиӆыӆаӆ унты. Нын-ки кум шитӆаты па яңхаты хорамат вантыя.
– Ма нумпсэм шеек ям. Щимщ ям ун вантапса хар версув. Йикем шуңат ар хорам пормасат верс. Ин ат хоятат вантӆат щи хорамат пеӆа па ӆувеӆ нумман тайӆэӆ, – аматман потарӆ Лидия Павловна Хартаганова. – Ун пумащипа утчиӆам ястаты хоятата хой нётас верты тамщ ун хорам вантапса хар!
